Македонија
Маричиќ: Уставни измени и преговори со ЕУ е планот што го поддржува Западот, не постои план Б

Вицепремиерот за европски прашања, Бојан Маричиќ, во интервјуто за „Гласот на Америка“ рече дека не е време за предвремени избори, туку време за носење одлуки и дека предвремени избори може да има само доколку опозицијата се согласи веднаш да гласа за уставните измени.
„Само тоа е опција што ние како Влада би прифатиле предвремени избори. Мислам дека не е време за предвремени избори, туку е за понесување одговорност и за имплементација на она што ни е обврска. Граѓаните ќе ни бидат благодарни доколку ја завршиме таа обврска пред изборите за да не бидат изборите оптоварени со тоа кој е ‘за’, а кој против уставните измени, затоа што тоа ќе нè внесе во нов десетгодишен тунел, од кој не знаеме дали ќе можеме да излеземе, како што бевме изминатиот период со спорот со Грција. Тоа не ни донесе подобри позиции и не ни ја зајакна улогата, не ги подобри перформансите, ниту внатре во државата ниту не приближи до нашата цел – членство во ЕУ. Затоа не треба граѓаните да бидат предмет на пропаганда и илузија, треба да се зборува отворено и одговорно“, изјави Маричиќ.
Маричиќ зборуваше за посетата на САД и пораките што високите претставници на Стејт департментот ги испратија посочувајќи дека имаме шанса која не смееме да ја пропуштиме и која не се знае дали и кога би ја имаме повторно, за која стратешките сојузници бараат лидерство, одговорност и поттик Северна Македонија да оди напред, а не политикантство.
„Пораката е дека постои момент за Западен Балкан, вклучувајќи ја и Северна Македонија, за приклучување кон европските интеграции, заедно со и поврзано со ситуацијата во Украина. Дека таа шанса не смееме да ја пропуштиме, втора шанса не знаеме кога ќе имаме, нема да има можност повторно да се преговара и разговара за оние исти прашања што ги решивме минатото лето со Бугарија во францускиот предлог, едноставно, време е за лидерство, за носење одлуки и за поттик на државата за напред.
Не е време за политикантство, не е време за избори и за партиски престрелки. Време е секоја партија и секој пратеник и секој политичар да покаже на дело дека е за исполнување на нашите стратешки приоритети во случајот – исполнувањето на членството во Европската Унија, истакна вицепремиерот Маричиќ.
Зборувајќи за тековни активности и процеси што ги води Владата во Скопје и во Брисел, Маричиќ напомена дека за тековните активности во Скопје и Брисел треба да се туркаат реформите и европските процеси, дека треба да се врати функционалноста на Собранието и да се работи на консензусот за Европската Унија.
„Партиите може да се расправаат на многу теми, но за темата ЕУ не смее и треба да бидат на една страна затоа што тоа е во интерес на граѓаните. Чувствувам дека консензусот за ЕУ е нарушен откако ВМРО-ДПМНЕ зазема премногу цврст став дека не ги поддржува уставните измени. Ние не можеме само декларативно да сме за ЕУ, мора да покаже на дело. Денеска, за тоа се уставните измени, кои треба да ги завршиме, утре ќе бидат многу други одлуки, кои ќе треба пак со 2/3 мнозинство да се носат, а се врзани со конкретни европски политики, дали се тоа реформи во правосудството, дали за системски закони, дали е за одлука поврзана со некоја важна политика во животната средина, која ќе треба да ја усвоиме, а ќе биде скапа и тешка, ќе има простор каде да се покаже консензусот, но мора да почне денес“, порача Маричиќ во интервјуто за „Гласот на Америка“.
Маричиќ укажа дека не постои план Б и дека поддршката што доаѓа од сите, вклучувајќи ги и Соединетите Американски Држави, е за реализација на единствениот план А, а како што вели тој, тоа е: завршување на уставните измени, продолжување на преговорите со ЕУ и членство на Северна Македонија во 2030 година.
„Секоја партија и секој политичар што ќе се спротивстави на овој план ќе носи историска одговорност за евентуален негов неуспех. Јас сум сигурен дека имаме доволно време до ноември да ја доведеме целата пратеничка група или дел да гласа за овој предлог бидејќи премногу е голем влогот за да ја изгубиме оваа шанса. Треба и пратениците на ВМРО-ДПМНЕ и партијата да дадат одговор зошто работат на тоа оваа шанса да ја пропуштиме бидејќи наредната година или таа по неа, бидејќи ќе имаме друг контекст, а ние веќе ќе задоцниме во однос на она како ќе се движи целиот регион, а веќе и доцниме. 17 години чекавме да ги почнеме преговорите, немаме веќе време ниту ден за губење“, потенцира вицепремиерот.
На прашањето дали борбата против корупцијата на Западен Балкан како главен приоритет на американската администрација е закана за националната безбедност, Маричиќ одговори дека е многу важно за заштита на развојот, просперитетот и безбедноста на нашата држава да се интензивираме борбата против корупцијата и дека најдобар начин да се справиме со ова прашање е да ги продолжиме преговорите и во текот на преговорите да ги зајакнеме нашите капацитети.
„Ние како Влада не сме бегале од оваа тема, сметам дека направивме многу, но има уште што да се направи и подготвени сме со нашите партнери да најдеме решение како да се зајакне улогата на независното судство и како да се зајакне капацитетот на Обвинителството како клучна алка во борба против корупцијата за да тоа има ефект.
Корупцијата е феномен и појава со која треба да се бориме на сите полиња и во сите области“, изјави Маричиќ додавајќи дека и досега покажале во многу случаи на корупција од високо ниво и многу актуелни случаи дека умеат да се борат против корупцијата, само, како што вели Маричиќ, потребна е силна поддршка и градење капацитети на институциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ќе се бориме за да ги браниме националните интереси, иднината на државата е во рамките на ЕУ, порача Мицкоски од Лондон

Економијата, безбедноста и процесот на интегрирање на Македонија во рамките на ЕУ, како што соопшти премиерот Христијан Мицкоски биле теми коишто биле опфатени на Самитот на Берлинскиот процес во Лондон.
„Тука беше додадена уште една тема, а тоа беше нелегална миграција. Морам да кажам дека денот беше инспиративен, го започнав со средба со министерот на Франција за Европа, господинот Бенжамин Хадад, којшто е исклучително близок на претседателот Макрон, на којшто ги кажавме нашите позиции, односно позициите коишто цело време ги повторуваме, дека мора да има испорака во дел на гаранции од страна на самата ЕУ, мора да има испорака од нашиот источен сосед во делот на почитување на меѓународното право, почитување на европските институции како што е Судот за човекови права, интегрирање на македонската заедница во рамки на Министерскиот совет за малцинства кај нашиот источен сосед итн.
Тоа не се дополнителни услови, туку тоа значи партнерство, тоа значи добрососедски односи помеѓу двете земји“.
Во делот на безбедноста, како што појасни, бил потенциран фактот за енергетската безбедност, развојот на гасните интерконектори.
„Овој што во моментот го градиме со нашиот јужен сосед со Грција и тој којшто планираме многу скоро да го отпочнеме да го градиме со нашиот северен сосед, а тоа е Србија. Потоа континуирано ги споменуваме коридорите 10 и 8, коишто се за нас како држава многу важни, но и за Европа се многу важни, посебно за јужното крило на НАТО, бидејќи ги поврзуваат Јонското и Јадранското море со Црното море, тоа е коридорот 8, и коридорот 10 коишто ги поврзува практично Медитеранот, овој дел на Медитеранот со Егејското море, со Централна Европа“.
Во делот на нелегалната миграција, нашиот став, како што подвлекува Мицкоски е апсолутно јасен.
„Ние практично ја браниме Европа од Европа, бидејќи кај нас мигрантите реално од земји членки на ЕУ нелегално влегуваат. Ја изнесов оваа идеја и пред премиерот Стармер, за време на билатералната средба, дека би биле добредојдени британски експерти, британска експертиза, па дури и полициски офицери, припадници на Армијата на Британија, да заедно со нашите припадници ја штитиме нашата јужно-источна граница од нелегалната миграција и на тој начин да ја штитиме и Европа, ја презентирав нашата отворена покана“.
Потсети и на процедурата на потпишување на меморандумот на разбирање со американско-британскиот конзорциум којшто, како што рече, ќе инвестира во фабрика за производство, а е дел од наменската индустрија.
„Околу 150 милиони долари и каде што неколку стотици би рекол, до илјада луѓе ќе се вработат, но тоа е само почеток, планот е да стигнеме до бројка од една милијарда.
Јас многупати кажувам дека мора да победуваме дома и тука немам никаква дилема, дека домашната задача е најважна, но мора да победуваме и во Лондон и во Брисел и во Париз и во Берлин и во Рим и во Вашингтон и во другите главни градови на земји-членки и на ЕУ, но и на влијателни држави во светот.
Ќе се бориме за да ги браниме националните интереси и интересите на Македонија, генерално и на граѓаните. Иднината на државата е во рамките на ЕУ, тоа е една од нашите последни стратешки цели.
Ние ќе сториме се што е во наша моќ да ја исполниме оваа стратешка цел, но истовремено да ги заштитиме македонските интереси.
Нормално дека пораката од нивна страна е дека местото на нашата земја е во рамките на ЕУ, како и генерално на целиот регион на Западен Балкан. Прилично инспиративна и конкретна дискусија имаше германскиот канцелар господинот Мерц, којшто јасно кажа како го гледа регионот, нормално тоа е затворен состанок и сега не би сакал јас да ги зборувам деталите, но многу јасна насока даде, како го гледа регионот и кои се плановите за иднината на регионот поврзани со интеграцијата во рамките на ЕУ“.
Мицкоски вели дека останува оптимист, но важно е според него да се испорача домашната задача.
„Тоа се реформите и тоа ќе го правиме во периодот којшто следува, очекувам прогрес и во делот на откочување на проблемот којшто го имаме во овој момент, но ајде да видиме, рековме наша цел е да го заштитиме нашето национално достоинство, нашиот идентитет и нашите национални интереси“.
Македонија
12 лица под истрага по полициските претреси во Скопје: осомничени се за лихварство и перење пари

Под раководство на јавен обвинител од ОЈО ГОКК, единиците на МВР денеска, по обезбедени Наредби од Основниот кривичен суд – Скопје, извршија претреси на повеќе локации низ Градот Скопје, поради основано сомневање за сторени кривични дела Лихварство и Перење пари и други приноси од казниво дело, соопшти обвинителството.
Обвинителот, постапувајќи по кривичната пријава поднесена од МВР, донесе Наредба за спроведување на истражна постапка против 12 осомничени лица за кои постои основано сомневање дека деветмина од нив како соизвршители или помагачи ги сториле двете кривични дела, додека тројца се осомничени за кривично дело Перење пари и други приноси од казниво дело.
Деветмината осомничени од почетокот на 2022 година до денес се организирале во криминална група што се занимавала со давање на пари со договор, притоа договарајќи несразмерна имотна корист во пари, средства или недвижен имот. Тие искористувајќи ја финансиската состојба на оштетените лица им позајмувале пари со пресметување на камата од 5% или 15% месечно зголемена за секое задоцнување. Од оштетените барале да им ги вратат позајмените парични средства со пресметана камата или месечно да го исплаќаат износот по основ на камата. Кога оштетените не биле во можност да ја вратат позајмицата, осомничените барале да го предадат или оптоварат имотот со кој располагале, пренесувајќи го на име на некој од осомничените. Наплатата на паричните средства се вршела директно преку некој од осомничените или преку трансакционите сметки во банка, од сметка на оштетен на сметка на некој од осомничените лица.
Паричните средства што во несразмерен износ ги враќале оштетените, се внесувале на сметките на осомничените во банка или во сеф, по што ваквата несразмерна имотна корист на различни начини ја внесувале во легалните финансиски текови. Така, постои основано сомневање дека во истиот период, дванаесетмината осомничени и едно осомничено правно лице, како организирана криминална група за перење на пари, се стекнале со противправна имотна корист од 125 033 527 денари прибавена со кривичното дело Лихварство. Дел од прибавените пари кои осомничените во повеќе наврати од повеќе физички лица ги примиле на своите сметки или им биле дадени на рака, со цел да се добие привид дека средствата се легално стекнати ги пуштале и користеле за реализирање на трансакции кон сметки на правни и физички лица, дел ги презеле на сопствени сметки и со нив вршеле плаќање на своите животни потреби, со дел купувале недвижен и движен имот и воделе луксузен живот, а голем дел биле извадени во готовина.
Јавниот обвинител до судијата на претходна постапка при Основниот кривичен суд – Скопје во текот на утрешниот ден ќе достави соодветни предлози за обезбедување присуство на осомничените, информираат од обвинителството.
Македонија
Ароганцијата на некои во „Вреди“ станува одвратна, Чаир беше лекција, а секоја лекција се прифаќа со достоинство, вели Османи

Чаир беше лекција, а секоја лекција се прифаќа со достоинство, напиша на социјалните мрежи Бујар Османи.
„Ја презедов мојата одговорност и му честитав на победникот, бидејќи дури и во овие околности сакам да оставам зад себе наследство на политичка култура, како што правев во текот на целата кампања.
Но, ароганцијата на некои во „Вреди“ станува одвратна.
Не прифаќам дека поради оваа причина резултатот на ДУИ и коалицијата треба да биде погазен.
Со 114 илјади гласови, НАИ останува најголемата сила и легитимен претставник на Албанците.
Али Ахмети е и останува неоспорен идеолог и лидер на Албанците“.
Навредите кон него, како што додава Османи, не се знак на политичка сила, туку знак на морална слабост.
„Овие ниски напади имаат една цел, да донесат деморализација пред вториот круг,
но ќе се случи спротивното: единство и решеност.
Албанците дадоа масовна поддршка во првиот круг, а во вториот круг мора да потврдиме кој навистина ја држи нивната политичка волја.
НАИ останува гласот на Албанците, додека Али Ахмети, нивниот морален и идеолошки столб.
Ги поканувам сите Албанци во вториот круг да го потврдат ова достоинствено и масовно“.