Свет
Ердоган убеден дека Путин сака да го продолжи договорот за жито
Турскиот претседател Таип Ердоган изјави дека e уверен оти рускиот претседател Владимир Путин сака да го продолжи договорот со кој се дозволува извоз на украинско жито преку Црното Море откако Москва го прекина своето учество.
Ердоган додаде дека се надева на напредок по разговорот на турскиот министер за надворешни работи Хакан Фидан и неговиот руски колега Сергеј Лавров.
Договорот за жито, постигнат со посредство на Обединетите нации и Турција во јули минатата година, имаше цел да ја ублажи глобалната криза со храната со тоа што ќе овозможи безбеден извоз на украинското жито блокирано од руско-украинскиот конфликт.
Русија денеска го прекина учеството во договорот, соопшти Кремљ, додавајќи дека делот од договорот што се однесува на Русија не е спроведен.
„И покрај изјавата дадена денеска, верувам дека рускиот претседател Путин сака продолжување на овој хуманитарен мост“, рече Ердоган додавајќи дека двајцата ќе зборуваат при враќањето на Ердоган од неговото патување во земјите од Заливот в среда.
„Ќе разговараме и за тоа како можеме да дејствуваме за да го отвориме патот за транспорт на руско ѓубриво и жито“, рече Ердоган додавајќи дека двајцата лидери ќе се сретнат лично во Турција во август.
Договорот за жито беше продолжуван неколкупати, но требаше да истече денеска. Русија со месеци вели дека условите за продолжување не се исполнети.
Москва долго време се жали дека пречките остануваат за нејзиниот извоз на жито и вештачки ѓубрива, иако тие не беа директно санкционирани од Западот, и презентира низа барања за кои рече дека не се исполнети.
Москва соопшти дека ќе се врати на договорот веднаш штом ќе се исполни рускиот дел од договорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.