Македонија
Меџити ја затвори вратата во ДУИ а отвори нова: формира своја партија
![](https://makfax.com.mk/wp-content/uploads/2023/07/медѕити.jpg)
Изет Меџити ги започна активностите за формирање на новиот политички субјект во државата. Во Чаир тој беше придружуван и поздравен од пратеникот Кастриот Реџепи, пратеничката Мерита Коџаџику, градоначалникот на општина Чаири, Висар Ганиу и други приврзаници.
На состанокот кој според првичните информации ќе се одвива зад затворени врати, има 3 точки: Информации за актуелната политичка состојба во државата; дискусија за иницијативата на новата политичка иницијатива и разно.
Денешните активности ќе се одвиваат зад затворени врати, без присуство на медиумите, додека по завршувањето на активностите се очекува изјава за медиумите.
Наспроти актуелната тема за уставните измени, фракцијата на ДУИ, таканаречената „огнена група“ денеска најави дека ќе формира ново политичко движење во земјава, по неколкумесечно несогласување со нејзините сопартијци на чело со Али Ахмети.
Ваквата најава според познавачите, доаѓа 8 години по основањето на партијата „Единство“, кога неколку функционери на чело со Гзим Острени ја напуштија ДУИ.
Од ДУИ пак се убедени дека активноста на фракцијата нема да предизвика некоја поголема штета кај нивниот електорат.
Името на новото политичко движење засега останува непознато, а не се знае и кои ќе бидат неговите неговите претставници и лидер, имајќи предвид дека против формирањето на движењето се изјаснија дел од високите функционери на „Огнената група“, нагласувајќи дека војната мора да продолжи во ДУИ.
Досега неформален лидер беше Изет Меџити, поддржан од Блерим Беџети, Муса Џафери и Невзат Бејта.
Движењата „Беса“ и Алтернатива ја подадоа „раката на помирување“, а нивните лидери потпишаа декларација за соработка на опозицискиот фронт. Ова се случи неколку месеци откако Алтернатива излезе од Владата, за да и отстапи место на Алијансата за Албанците.
Пратеничката група на Алијансата за Албанците на 29 мај ја одби поканата на првиот човек на Движењето „Беса“ Билал Касами да се приклучи на таканаречениот опозициски фронт. Поканата на Касами важеше и за пратениците на “Огнената група§. Тие ја поздравија иницијативата за опозициски фронт, но рекоа дека битката ќе ја продолжат во ДУИ.
Засега останува непознато дали ова ново движење ќе соработува со опозициските партии.
Зад Меџити, според информациите од неговиот блок останува чаирскиот градоначалник Висар Ганиу, Саранда Имери и Башким Хасани. Меџити најавува дека новото движење ќе биде само вовед во предизборен опозициски блок, зашто се очекува и средба неделава со Африм Гаши и Билал Касами.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Проглас за семакедонско обединување: Албанската влада да ги заштити македонските права од бугарската агресија за денационализација и асимилација
![](https://makfax.com.mk/wp-content/uploads/2024/06/albanija-makedonija.jpg)
Некогашниот градоначалник на Пустец, Едмонд Темелко, во името на Друштво Преспа, објави проглас со повик за семакедонско помирување и обединување во Албанија за одбрана на идентитетот на Македонскиот народ – името, јазикот, културата, историјата и територијата. До албанската Влада се апелира да ги заштити македонските права и слободи во Албанија од бугарската агресија за денационализација и асимилација на Македонците во Бугари.
Прогласлот во продолжение го пренесуваме во целост:
Соочени со агресијата на бугарската асимилација на Македонците во Албанија, свесни за последиците на антимакедонизмот на Софија во Албанија, потврдуваме проглас за семакедонско помирување и обединување во Албанија.
(1) Повикуваме на семакедонско помирување и обединување во Албанија за одбрана на идентитетот на Македонскиот народ – името, јазикот, културата, историјата и територијата, затоа што единствени сме посилни од сечија агресија и обиди за денационализација и асимилација.
(2) Ги отфрламе пописните резултати во Албанија од минатогодишниот попис одржан од 18 септември до 30 октомври па продолжен до 16 ноември 2023 година и ги сметаме за груб фалсификат, бидејќи не ја отсликуваат реалната бројка на етничките Македонци во Албанија.
Изразуваме загриженост од објавата на Институтот за статистика на Албанија (ИНСТАТ) дека во Албанија живеат 2.281 “Северномакедонци”, иако на пописот во 2011 година биле регистрирани (ни тогаш прифатливи) 5.512 Македонци.
За груб пописен фалсификат ја сметаме објавената бројка од 7.957 “Бугари” во Албанија, повеќе од пописот во Македонија во 2021 година – 3.504.
И натаму тврдиме дека, во Албанија “етнички Бугари“ нема, во ниту еден попис од 1912 до 2023 година не постои макар и еден “Бугарин” на целата територија на Албанија!
(3) Најостро ја осудуваме употребата на терминот “северномакедонци“ од Институтот за статистика и употребата на име на земја како супститут за Македонската етничка заедница во Албанија која веќе е призната во Законот за заштита на националните малцинства во Албанија од 2019 година.
(4) Бараме градоначалникот на општина Пустец и Македонците во Албанија да ги отфрлаат сите посети и секоја материјална помош од бугарскиот амбасадор во Тирана, Владата во Софија и разни бугарски фондации, затоа што Бугарија тоа го прави да прикаже пред светот дека Македонците се Бугари во Албанија.
(5) Етеничките Македонци се лојални албански државјани и претставуваат неотуѓив, нераскинлив и неостапен дел од Македонскиот народ како носител на државноста во Македонија.
(6) Со сите разлики помеѓу нас Македонците, по род и државјанство, само Македонија е нашиот еден и единствен заеднички именител, само Македонија е нашиот еден и единствен содржател. Со Македонија не’ има, без Македонија сите заедно ќе не снема!Македонија е нашата матична држава.
(7) Бараме вонреден изборен конгрес на единствената македонска партија во Албанија – Македонска алијанса за европска интеграција за сите органи на сите нивоа, заради кадровска консолидација и единство на сите во одбраната на македонскиот идентитет – името, јазикот, културата и историјата на Македонскиот народ на целата територија на Албанија.
(8}Апелираме до Албанската Влада да ги заштити македонските права и слободи во Албанија од бугарската агресија за денационализација и асимилација на Македонците во Бугари. Бараме одговорност од Владата на Албанија, затоа што овозможи бугарската амбасада во Тирана и бугарската влада во Софија грубо да се мешаат во внатрешните работи на Албанија за време на одржувањето на пописот со поткуп и делење бугарски пасоши во населените места каде живеат Македонци во Албанија!.
9) Ја повикуваме Владата на Македонија на грижа за правата и слободите и положбата на Македонската заедница во Албанија.
(10) Бараме Европската Унија да преземе мерки против Република Бугарија која врши манипулација со Македонците во балканските држави, давајќи им бугарски пасоши како можност за емиграција во Западна Европа поради лошата економска ситуациа во Албанија, под услов да потпишат писмена изјава дека се “Бугари”.
(11) Изразуваме подготвеност сами да организираме неформален попис на Македонците во Албанија, поради недовербата во Институтот за статистика на Албанија.
(12) Ги повикуваме на единство сите Македонци од Албанија кои живеат и работат во светот заради одбрана на македонскиот идентитет во Албанија пред институциите на власта во Албанија и Македонија и пред меѓународните органзиаци за човекои и граѓанските права и слободи.
(13) Овој Проглас ќе го потпишат сите заинтересирани страни.
Македонија
Тетовец со багер оштетил кабел, касарната Еребино останала без струја и вода
![](https://makfax.com.mk/wp-content/uploads/2022/08/arm-vojnici.jpg)
Полицијата поднесе кривична пријава против А.Л.(33) од Тетово, поради уништување или оштетување на јавни инсталации.
На 20 март, пријавениот, управувајќи работна багер, оштетил електричен кабел, кој го користи Армијата, односно касарната Еребино, која останала без електрично напојување и без вода, објави МВР во дневниот билтен.
Македонија
И седмоодделенците ќе имаат учебници од септември, МОН и БРО најдоа преодно решение
![](https://makfax.com.mk/wp-content/uploads/2024/07/MON-BRO.jpeg)
По неколкудневни разговори Министерството за образование и наука и Бирото за развој на образованието изнајдоа решение за непречена реализација на воспитно – образовниот процес за учениците од седмо одделение. Од септември тие ќе можат да ги користат учебниците кои се применуваат досега, со додатни материјали кои ќе бидат изработени од страна на Бирото за теми кои недостасуваат во истите, а предвидено е да се изучуваат годинава. За оваа цел е донесена и одлука за одложување на имплементацијата на Концепцијата за основно образование, во седмо, осмо и деветто одделение, извести МОН.
Предизвикот со генерацијата ученици кои од септември ќе бидат седмо одделение, настана поради тоа што досега не беа изработени нови учебници за нив, согласно новите наставни програми и Концепција. Иако претходното раководство јавно информираше дека сите учебници се изготвени и се печатат, реалноста е дека ниту еден не е испечатен, а најголем дел не се ниту изработени, ниту одобрени.
Министерството за образование и наука изразува благодарност до директорот на Бирото за развој на образованието, Абдулфета Фетаи и до сите кои учествуваа во процесот на изнаоѓање решение и очекува продолжување на добрата соработка во интерес на учениците и нивна квалитетна едукација.
Информираме дека целосно нови учебници за седмо одделение ќе има од учебната 2025-2026 година. Доколку Концепцијата за основно образование која влегува во процес на ревидирање, согласно мислењата на наставниците и другите засегнати чинители во воспитно – образовниот процес, биде изменета и има потреба, ќе бидат изготвени и нови наставни програми и учебници и по други одделенија, велат од МОН.