Македонија
Ќе се поврзуваат ли ликвидациите во Македонија, Косово и Грција: подземјата се пресметуваат, обвинителите молчат

Тајна е информацијата дали Обвинителството ќе прави поврзување помеѓу убиствата во Чаршијата и Бутел со оние во Грција и Косово. Додека обвинителите молчат, јавноста до детаљ ги поврза сите убиства – од тоа кој со кого се дружел, до тоа кој кому му должел и на кој клан му припаѓал. Суштинските прашања за сите ликвидации и натаму остануваат неодговрени. Нема осомничени ниту, пак, став дали сторители на сите убиства се истите лица што и натаму се на слобода. Во исто време, четири години се води истрага за пукањето во хотелот „Александар палас“, две години за убистовто на Камер Идризи кон кого се пукаше во Бутел 2, една година за убиството на неговиот брат Јонуз Идризи, застрелан на истото место. Обвинителството вели дека и натаму прави проверки.
„Јавното обвинителство не е во можност да објавува детали од криминалистички истраги, особено евентуални проверки во насока на поврзување конкретни кривично-правни настани. За да се расчистат настаните што се во надлежност на Јавното обвинителство, се преземаат сите потребни дејства“, велат од скопското Обвинителство за „Макфакс“.
Криминалните подземја се пресметуваат со години. Се знае дека раскараните кланови „Дуќанџик“ и „Беланоца“ некогаш носеле исти дресови. Пукањето во „Александар палас“, кое се случи во декември 2019 година, е од понов датум кое го памети јавноста. Цел беа „Дуќанџик“, напаѓаа „Беланоца“. Во хотелот беше и Камер Идризи, кој две години подоцна беше ликвидиран. Една година подоцна го убија и брат му Јонуз Идризи.
Годинава, имаше уште една ликвидација. Во кафулето „Шиша бар“ во Чаршијата со десетици куршуми беше застрелан и убиен Јетон Кривањева, наречен Жила, заедно со уште едно лице – Енес Исени. Минатиот месец беше убиен Блерим Даци во Приштина. Тој, пак, се врзуваше со двојното убиството на Жила и Есени.
Последно во низата е убиството во Грција, каде што ликвидиран е Орхан Бајрами-Оки, познат како неформален лидер на групата „Дуќанџик“. Дека се знаел со убиениот Жила и дека се дружеле, сведочат и фотографиите објавени на социјалните мрежи. Пред 14 години, исто така во јули, беше убиен Агим Шерифи од Синѓелиќ, кој е вујко на сега ликвидираниот Орхан Бајрами-Оки. Шерифи беше фрлен во депонија. Роднинската врска меѓу нив двајца е преку сестрата на Шерифи, чиј внук е Оки.
Ниту едно од овие убиства и пукања не се расчистени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.
Скопје
Арсовска: Претседателката на „Комунална“ е осудена за убиство и 3 години саботира нова опрема

Градоначалничката на Скопје, Данела Арсовска, денеска остро ја обвини Јулијана Спировска, претседателка на Управниот одбор на ЈП „Комунална хигиена“, дека ја саботира работата на претпријатието и со години опструира одлуки од витално значење за функционирањето на службите за одржување на јавната чистота.
Во своја објава на Фејсбук, Арсовска посочи дека Спировска е осудено лице за кривично дело убиство и дека, како што тврди, три години не поддржала ниту една инвестиција за нова механизација, ниту решенија за вработување на работниците кои со години работат на терен.
„Јулијана е осуден криминалец со казна затвор за убиство. Таа три години не гласа за нови камиони, за инвестициска програма, за вработените кои пет години ги чистат улиците да можат да земат решение“, напиша Арсовска.
Според неа, Спировска делува под директива на политичките партии ВМРО-ДПМНЕ и Вреди, чиј што кадар е поставен во Управниот одбор преку Советот на Градот. Арсовска директно ги обвинува овие партии дека преку Спировска ја саботираат работата на претпријатието и придонесуваат за влошување на состојбата со отпадот во Скопје.
„Јулијана по наредба на ВМРО континуирано прави опструкции додека градот не се удави во смет. Не биди ѓубре, не биди криминалец, не биди Јулијана“, додаде Арсовска.
Таа истакна дека вработените во „Комунална хигиена“ се едни од највредните работници во градот и дека заслужуваат институционална поддршка, а не, како што вели, саботажа од партиски кадри.