Европа
Амстердам ги забрани бродовите за крстарење
Градскиот совет на Амстердам донесе одлука да ги забрани крузерите во центарот на градот. Се надеваат дека ваквата одлука ќе го ограничи бројот на посетители и ќе го намали загадувањето. Градските власти тврдат дека бродовите за крстарење не се во согласност со одржливите амбиции на градот. Тоа значи дека централното пристаниште за крстарење на реката Иј, кое е блиску до централната станица во Амстердам, ќе се затвори.
Тоа е најновата мерка во борбата против масовниот туризам во градот. Во март Советот почна онлајн-кампања, со која ги повика младите Британци, кои размислуваат за ергенска забава во Амстердам, да престанат да доаѓаат.
Бродовите за крстарење станаа симбол на проблемот со прекумерниот туризам, а предлогот за нивно преместување од центарот помина со големо мнозинство. Амстердам стана жртва на сопствената популарност. Градот привлекува околу 20 милиони посетители годишно, а многумина се привлечени од неговата репутација како град за забави.
„Крузерите кои ја загадуваат животната средина не се во согласност со одржливите амбиции на нашиот град“, се вели во соопштението на центристичката партија Д66, која управува со Градот заедно со социјалдемократите и еколошките активисти, цитирано од новинската агенција АФП.
Тие додадоа дека минувањето бродови за крстарење исто така не е компатибилно со плановите за нов мост помеѓу историскиот јужен кварт на градот и областа Норд, која беше во фокусот на неодамнешните развојни проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц ја откажа изборната кампања и ги посети поплавените региони во Германија
Германскиот канцелар Олаф Шолц денеска ги посети поплавените региони во западната германска сојузна покраина Сарланд, каде обилните дождови предизвикаа поплави и лизгање на земјиштето, а неколку згради беа евакуирани.
Шолц ја откажа својата изборна кампања во Сар, на границата со Франција, и наместо тоа, го обиколи делумно поплавениот пат во селото Клајнблитерсдорф заедно со регионалниот гувернер Анке Релингер.
Тој ја потврди солидарноста на сојузната влада со Сарланд.
„За жал, не е првпат да треба да се справиме со голема природна катастрофа, па ќе разгледаме што треба да се направи овде и што е неопходно“, им рече Шолц на новинарите.
Службите за итни случаи одговорија на илјадници повици за помош во главниот град на покраината, Сарбрикен.
Европа
Напаѓачот на Фицо доби мерка притвор за да не побегне и да не го повтори делото
Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај годинава во градот Хандлова со пет истрели го застрела премиерот Роберт Фицо и тешко го рани во стомакот.
Притворот за осомничениот е побаран поради опасност да не избега или да го повтори делото.
Осомничениот за нападот врз словенечкиот премиер Јурај Цинтула денеска призна вина.
Адвокатите предупредија дека признавањето на вината е спорно, бидејќи Цинтула веднаш по атентатот и апсењето бил сослушан во шок, без присуство на адвокат.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.