Свет
Орбан ја нападна ЕУ, тврди дека води ЛГБТ+ офанзива и се залага за федерализам
Унгарскиот премиер Виктор Орбан денеска повторно ја нападна Европската Унија, овој пат за водењето на „ЛГБТ+ офанзивата“ и застапувањето на федерализмот, нагласувајќи дека Будимпешта ќе ги зачува христијанските корени на земјата.
Во говорот во Романија, Орбан, долгогодишен критичар на Брисел, рече дека се надева оти европските избори следната година ќе ги зајакнат владите што се спротивставуваат на „федерализмот“ за кој се залагаат Германија и Франција.
На власт од 2010 година, Орбан пред две години забрани содржини за кои верува дека промовираат хомосексуалност и промена на полот во училиштата, тврдејќи дека децата треба да бидат заштитени од „ЛГБТК пропаганда“.
Унгарскиот премиер се судри и со Брисел за други прашања како владеењето на правото, реформите во медиумите и судството. ЕУ е „или империја или (индивидуални) нации“, рече Орбан. „Не смееме да имаме илузии. Федералистите се обидуваат да не истиснат. Тие отворено сакаа промена на власта во Унгарија во 2022 година“, тврди Орбан, додавајќи дека тоа сега се повторува и во Полска.
Полјаците ќе излезат на избори есен, каде конзервативната партија Право и Правда (ПиС) ќе се обиде да освои трет мандат. ПиС усвои бројни мерки слични на Фидес на Орбан, а двете земји се судрија околу владеењето на правото со Брисел, што доведе до суспензија на дел од европските фондови.
Орбан смета дека рамнотежата меѓу федералистите и државите кои не сакаат да му предадат дополнителни овластувања на Брисел се променила кога Велика Британија излезе од ЕУ, па сега само Варшава и Будимпешта одржуваат „антифедералистичка позиција“.
Орбан ја засили анти-ЛГБТ реториката во време кога Унгарија се справува со економски проблеми и висока инфлација, која беше 25 отсто во првиот квартал од годината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелците со тенк убија пет свои војници во Газа
Петмина израелски војници загинаа во пријателски оган во северниот дел на Појасот Газа, а тројца се тешко ранети, соопштија израелските одбранбени сили.
Според израелските медиуми, војниците загинале вчера во пријателски оган од израелски тенкови за време на судирите со милитантите на Хамас.
Извештаите велат дека тенк удрил во зграда во бегалскиот камп Џабалија каде што биле сместени војници.
Според податоците на израелската армија, од почетокот на војната во Газа, во борбите загинале 626 војници, а околу 3.500 се ранети.
Свет
Тинејџер исчезна во Алжир во 1998 година, по 26 години пронајден е жив во шталата на соседот
Алжирецот кој исчезнал пред 26 години бил пронајден во шталата на соседот, на само неколку минути пешачење, објави оваа недела Министерството за правда на земјата.
Човекот, идентификуван само како Омар Б., исчезнал на 19-годишна возраст, за време на граѓанската војна во Алжир во 1998 година, а неговото семејство претпоставувало дека бил киднапиран или убиен, пренесува „Си-би-ес“.
Сега, на 45-годишна возраст, тој бил пронајден меѓу стоговите сено на само околу 200 метри, откако братот на киднаперот се пожалил на социјалните мрежи за спор околу наследството.
Алжирските медиуми објавија дека кога членовите на семејството почнале да ја пребаруваат куќата на осомничениот, тој станал напнат кога се приближиле до стогот сено и на крајот го пронашле Омар Б. како седи под него во тишина.
Соседот (61) на семејството на Омар е приведен откако се обидел да избега, соопшти Министерството. Алжирските медиуми објавија дека жртвата изјавила дека не можел да повика помош „поради магијата што ја фрлил врз него неговиот киднапер“.
Киднаперот на тинејџерот е обвинет и дека го убил своето куче со отров, јавуваат алжирските медиуми.
Министерството соопшти дека истрагата се уште е во тек, додавајќи дека мажот добил медицинска и психолошка нега по злосторството, кое беше опишано како грозоморно.
Алжирските медиуми објавија дека мажот бил прегледан од лекар и префрлен во специјално психолошко одделение.
Свет
Заздравувањето на Фицо е доведено во прашање, на напаѓачот му пречела и владината политика кон Украина
Здравјето на словачкиот премиер Роберт Фиц се уште е тешко и рано е да се каже дали ќе закрепне, изјави неговиот заменик Роберт Калинак, ден по атентатот што ја шокираше Европа.
„За жал, сè уште не можам да кажам дека победуваме во напорите да го спасиме животот на Фиц, ниту дека прогнозите се позитивни бидејќи последиците од повредите предизвикани од четирите прострелни рани се такви што одговорот на телото на нив ќе продолжи да биде многу тежок“, рече Калинак.
Миријам Лапуникова, директорка на Универзитетската болница Рузвелт во Банска Бистрица, каде што се лекува премиерот Фицо, рече дека 59-годишниот премиер бил подложен на петчасовна операција во која учествувале два медицински тима за да ги санираат повеќете прострелни рани.
„Во овој момент успеавме да ја стабилизираме неговата состојба, но сепак е многу сериозна. Тој ќе биде задржан на интензивна нега“, изјави таа за новинарите.
Министерот за внатрешни работи Матус Сутај Есток на прес-конференција рече дека напаѓачот кого полицијата го товари за обид за убиство, дејствувал сам и дека претходно учествувал во антивладини протести.
„Станува збор за волк-самотник кој се радикализирал неодамна, во периодот по претседателските избори одржани во април“, изјави Сутај Есток.
„Како причини за нападот осомничениот ја наведе политиката на владата кон Украина, плановите за реформа на јавниот сервис и распуштањето на специјалното обвинителство“, рече министерот за внатрешни работи.
Словачки експерти во средата ги критикуваа безбедносните мерки преземени за заштита на премиерот по обидот за атентат врз Фиц.
„Самиот Фицо пред неколку недели зборуваше за опасностите од пукање врз политичарите“, изјави поранешниот началник на словачката полиција Стефан Хамран за весникот „Денник Н“ во четвртокот.
Тој се запраша кој ја анализирал потенцијалната опасност и ја проценил заканата. Хамран ја критикуваше реакцијата на телохранителите по пукањето.
Поранешниот шеф на словачката единица за обезбедување на заштитени лица, Јурај Забојник, исто така ги критикуваше телохранителите на премиерот.