Свет
Проширена кривичната постапка против Доналд Трамп за задржување доверливи документи

Обвинителството ја прошири кривичната постапка против поранешниот американски претседател Доналд Трамп поднесувајќи нови обвиненија против него и против еден од неговите вработени во процесот на неовластено задржување доверливи документи откога тој ја напушти претседателската функција.
Во проширеното обвинение се наведува дека Трамп и неговиот соработник Карлос де Оливеира се обиделе да ги спречат истражителите да ги прегледаат снимките од безбедносните камери од Мар-а-Лаго, одморалиштето на поранешниот американски претседател.
Вкупниот број точки на обвинението е зголемен за три и сега изнесува 40 бидејќи Трамп повторно е обвинет за незаконско задржување доверливи информации поврзани со националната одбрана, објави „Ројтерс“.
Обвинителите соопштија дека поранешниот американски претседател и двајцата вработени, Волт Наута и Карлос де Оливеира, се обвинети дека барале од едно лице да ги избрише снимките од безбедносните камери во Мар-а-Лаго за да го спречат тоа да биде претставено пред федералната голема порота.
Наута се појави на обвинителна клупа покрај Трамп во јуни 2023 година и беше обвинет за помагање на поранешниот претседател да ги измами истражителите кои се обидоа да добијат доверливи документи, кои останаа во сопственост на поранешниот претседател откога тој ја напушти Белата куќа.
Претставниците на претседателската кампања на Трамп рекоа дека обвинувањата против поранешниот претседател претставуваат континуиран очајнички обид на американскиот претседател Џозеф Бајден и Министерството за правда, како што наведоа, да ги вознемируваат Трамп и блиските.
Во своето прво појавување на судот во јуни Трамп се изјасни за невин по сите точки од обвинението што го товари за неовластено задржување доверливи документи.
Информациите за проширувањето на обвинението беа објавени неколку часа откако поранешниот американски претседател откри дека неговите правни застапници се сретнале со претставници на Министерството за правда, кои ги истражувале наводите за обидите на Трамп да го поништи неговиот пораз на претседателските избори во ноември 2020 година.
„Моите адвокати имаа продуктивен состанок со претставници на Министерството за правда, на кој детаљно објаснија дека не сум направил ништо лошо, дека се консултирав со многу адвокати и дека ова обвинение само уште повеќе ќе ја уништи нашата земја“, напиша Трамп на социјалните мрежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шпанија со закон го забранува извозот на оружје во Израел: „Сакаме да се стави крај на геноцидот во Газа“

Шпанските пратеници денес гласаа за закон со кој се воведува ембарго за извоз на оружје во Израел, мерка што долго време ја заговараше социјалистичкиот премиер Педро Санчез за „запирање на геноцидот“ во Газа.
„За“ гласаа 178 пратеници, а 169 беа против. Малцинската влада на социјалистичкиот премиер конечно ја доби поддршката од четири пратеници од крајно левичарската партија Подемос, која не откри како ќе гласа до денеска наутро.
Шпанското ембарго е на сила од октомври 2023 година, но социјалистичката влада сакаше да ја „зацврсти правно“ одлуката.
Санчез го објави тоа на 8 септември, по што израелската влада реагираше жестоко, но Израел го повлече својот амбасадор од Шпанија во 2024 година, откако Мадрид ја призна Палестина.
Регион
Вучиќ: Турција сонува повторно да ја обнови Отоманската Империја

По пристигнувањето на турските беспилотни летала во Приштина, имаше остра реакција од српскиот претседател Александар Вучиќ, кој ја обвини Турција дека сонува за обнова на Отоманската Империја. Со овој потег, Србија премина од „златно доба“ во односите со Турција и пријателството со Ердоган на отворени политички тензии за само една година, пишува N1.
Косовскиот премиер Албин Курти претходно објави на Фејсбук дека пристигнале беспилотните летала, додавајќи дека десетици безбедносни сили веќе се обучени да ги користат.
Курти објасни дека договорот со турската компанија Бајкар бил потпишан во декември минатата година, а дроновите биле испорачани три месеци пред предвидениот рок. Тој нагласи дека Косово „продолжува да ја зајакнува ударната моќ на својата армија“ со модерна технологија.
Реагирајќи на веста, Вучиќ остро го осуди потегот на Турција, велејќи дека е „ужасен“ и дека тоа „јасно покажува дека Турција не сака стабилност на Западен Балкан“.
„Згрозен сум од однесувањето на Турција и грубото кршење на Повелбата на ОН и Резолуцијата 1244 на Советот за безбедност на ОН, како и од континуираното вооружување на властите во Приштина. Сега е сосема јасно дека Турција не сака стабилност на Западен Балкан и дека сонува за оживување на Отоманската империја. Србија е мала земја, но ние добро ја разбравме пораката“, рече Александар Вучиќ.
Реагираше и владината Канцеларија за Косово и Метохија, а нејзиниот директор Петар Петковиќ ја повтори оценката на Вучиќ дека Србија „ја разбрала пораката“ и дека „не е случајно“ што беспилотните летала биле доставени во Косово три месеци пред предвиденото.
Турција го направи ова, смета Петковиќ, „само неколку дена пред локалните избори“, со цел да му ја обезбеди на премиерот на Приштина „потребната поддршка пред изборите на 12 октомври, за да може да продолжи да го тероризира српскиот народ“.
Петковиќ рече дека Белград „ќе продолжи одговорно да го зачувува мирот и стабилноста, и покрај вооружените сојузи што се создаваат на штета на мирот и претставуваат директна закана“.
Фото: ЕПА
Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.