Македонија
(Видео) Вучиќ го дочека Пендаровски во Прохор Пчински: „Секогаш сте добредојдени во Србија“
Претседателот на Србија, Александар Вучиќ, денеска изјави дека Србија и Северна Македонија веќе немаат никакви отворени прашања и дека постои само желба за подобра и поголема соработка.
По средбата со македонскиот претседател Стево Пендеровски, во манастирот Свети Прохор Пчињски, Вучиќ му се заблагодари на патријархот Порфирио за историската одлука на Српската православна црква, донесена минатата година за признавање на МПЦ.
„Ние Србите ги сакаме Македонците и Северна Македонија, ништо не бараме, ништо не ни треба освен да соработуваме уште подобро и повеќе. Ги немаме овие проблеми кој што и кому кажал или не“, рече Вучиќ.
Тој на Пендеровски му го честита Илинден – државниот празник на Македонија, а на српските православни верници големиот празник Свети Илија
„Ви посакувам среќен празник и секогаш да чувствувате дека сте добредојдени каде било на територијата на Србија, знам дека ја чувствувате како своја земја, како што ние ве чувствуваме како наши браќа и се чувствуваме како дома кога ќе ве посетиме“, рече Вучиќ.
Се наведува дека двајцата лидери ги потврдиле исклучителните односи помеѓу двете држави, а беше споменета и трговската размена која изнесува 1,5 милијарди евра на годишно ниво. Вучиќ најави и поврзување на железниците во двете земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Не сум основал медицински факултет во Струга, туку тригодишни студиски програми за медицински сестри, вели Шаќири
Од одредени политички субјекти сум прозван дека сум основал Факултет за здравствени науки при Меѓународниот универзитет во Струга. Некои пак споменуваат Факултет за медицински науки, а тоа се два различни поими. Нема да навлегувам во причините за ваквите објави, дали се тенденциозни или од незнаење, но оваа информација категорично ја демантирам, вели министерот за образование и наука во заминување Јетон Шаќири.
„Би сакал да појаснам дека министер не може да основа високообразовна установа. Тоа е цела постапка во која се инволвирани повеќе надлежни институции и органи, а меѓу нив и Министерството за образование и наука кое во суштина, има најмалку надлежности“, вели Шаќири преку соопштение до јавноста.
Тој вели декa како и за повеќе други факултети, така и за овој – Факултет за здравствени науки каде ќе има тригодишни студиски програми за медицински сестри, а не студии за доктори.
„По доставениот извештај од страна на комисијата во МОН, потпишав Решение за исполнетост на условите за почеток со работа на високообразовната установа. Ништо противзаконски и ништо самоволно“, вели министерот за образование.
Дополнува дека основањето на една високообразовна установа, во случајов факултет во состав на веќе постоечки универзитет започнува со иницијатива на самиот универзитет, која прво треба да добие позитивно мислење, односно согласност од Владата. Потоа, Одборот за акредитација при Агенцијата за квалитет на високото образование го акредитира проектот доставен од универзитетот. Понатаму, следи носење на акти за основање и работа на факултетот од страна на матична комисија при универзитетот и дури потоа, по завршување на овие фази, врз основа на мислење на комисија за увид во исполнетост на условите за работа, во рамки на МОН, министерот за образование и наука носи одлука за исполнетост на условите и дозвола за почеток со работа. Во меѓувреме, Одборот за акредитација спроведува постапка за акредитирање на студиските програми, до чие завршување факултетот не може да запишува студенти. Оваа постапка е во тек, посочува Шаќири.
Неговото соопштение доаѓа по информациите дека на Меѓународниот универзитет во Струга, зад кој стои струшкиот градоначалник Рамиз Мерко, ќе се студираат и медицински науки.
Македонија
Гаши се сретна со германската амбасадорка Дрекслер
Претседателот на Собранието Африм Гаши денес оствари средба со Амбасадорката на Сојузна Република Германија во Република Северна Македонија, Н.Е. Петра Дрекслер.
Беше искажано особено задоволство од реализација на средбата и благодарност за германскиот проактивен пристап и поддршка во остварувањето на нашите стратешки цели, претходно членството во НАТО и нашите тековни напори кон поноправно членство во Европската унија. Претседателот Гаши ја поздрави инцијативата и активностите кои произлегуваат од Берлинскиот процес, вклучително и неодамнешната парламентарна димензија и поддршката од специјалниот пратеник за Балканот Сарацин. Несомнено меѓу најзначајните, е благодарноста за Резолуцијата на Бундестагот за нашиот пат кон ЕУ, особено признанието на македонската култура, идентитет и јазик, како еден важен сегмент од интензивната соработка на сите нивоа меѓу двата парламента. Истакната беше и програмата ИПС за млади лица која треба да продолжи и во иднина, како и поддршката на Фондациите Фридрих Еберт и Конрад Аденауер на политичките партии земјата.
Амбасадорката Дрекслер, упатувајќи честитки на Претседателот Гаши, му посака успех во водењето на оваа функција во период со многу предизвици. Ја потврди одличната соработка меѓу двете држави и двата парламента, изразувајќи благодарност за нашиот пристап кон ИПС прорамата и задоволство за корисноста на програмите на двете германски фондации кај домашните политички чинители. Во однос на Берлинскиот процес, информираше за овогодинешниот десетгодишен јубилеј и одржувањето на Самит во Берлин, притоа изразувајќи надеж за учество и на парламентарна делегација на овој настан. Амбасадорката изрази надеж дека во периодот што следи, земјата ќе продолжи на својот евроинтегративен пат со несмалено темпо и со спроведувањето на досега преземените обврски.
Двајцата соговорници разменија мислења за идните можности за соработка и за потенцијалите во доменот на економијата, развојот на пазарното стопанство и други области од взаемен интерес.
Македонија
Уште еден успешен Министерски состанок во Скопје – Османи: Уште еднаш ја потврдивме нашата позиција на меѓународната сцена
Денеска во Скопје, го заокруживме нашето едногодишното претседавање со Процесот за соработка во Југоисточна Европа, во рамките на кое се постигнаа два значителни успеси за регионалната иницијатива: номинирање на Амер Капетановиќ за нов Генерален Секретар на Советот за регионална соработка, како и со консензусот за Декларацијата од Скопскиот Самит, со што Република Северна Македонија стави потпис на уште еден успех на меѓународен план.
Министерот за надворешни работи, Бујар Османи на завршната прес конференција истакна дека со овој чин е зачувана стабилноста, континуитет и функционалноста на Советот за регионална соработка, со тоа и на целиот Процес. „Уште еден успех за Република Северна Македонија после претседавањето со ОБСЕ во 2023 година. Нашата земја, уште еднаш, ја потврди својата позиција на меѓународната сцена“, рече Османи, при што додаде дека идејата беше амбициозна, но целта првенствено беше наменета да се обезбеди платформа за плодна интелектуална и политичка дебата и дијалог, како и да произведе идеи и да поттикне нови перспективи за регионот на Југоисточна Европа.
Османи заклучи дека како претседавачи со Процесот особено е горд на ова постигнување. “Покажавме дека сме способни да го сочуваме кредибилитетот на регионалната сопственост и лидерството кои ги градевме и надградувавме низ годините наназад преку оваа значајна регионална иницијатива”.