Пратеникот Драган Ковачки од 3-5 ноември е дел од собраниската делегација која учествува на брифинзи во седиштето на НАТО.

-Настанот претставуваше уникатна можност учесниците изворно да се информираат за начинот на функционирање и соработката меѓу парламентарниот и владиниот дел на Алијансата, како и за нејзините актуелните приоритети, политики и идни предизвици во пресрет на Самитот на НАТО во Хаг следната година. Беше поздравено значителното инвестирање и одвојување средства во делот на одбраната кај сите земји членки, со потенцијал истите да продолжат да се зголемуваат во следните години, рече тој.

Ковачки посочи дека особено беше потенцирана потребата од континуирана комуникација меѓу земјите членки, координацијата на заедничките активности, како и зголемената соработка со индустријата, како клучни за нивно поуспешно делување.

Денес, се собравме заедно за да одбележиме еден важен ден за ромската заедница – Денот на ромскиот јазик, кој секоја година се прославува на 5 ноември. Овој ден претставува можност да се потсетиме на значењето на ромскиот јазик, како и на богатата култура и историја на ромскиот народ, кои се суштински дел од нашето општество.

Ромскиот јазик е многу повеќе од само средство за комуникација. Тој е симбол на идентификација, на култура и на единство на ромската заедница од целиот свет. Преку него се пренесуваат приказни, обичаи, песни и танци, кои се одржуваат од генерација на генерација. Јазикот е она што ја врзува една заедница, што ѝ дава чувство на припадност и ја одржува нејзината автентичност, истакна премиерот Христијан Мицкоски по повод денот на ромскиот јазик.

Нагласи дека во последните неколку децении се прават сериозни напори за заштита и унапредување на ромскиот јазик и култура.

„Сепак, се соочуваме со многу предизвици бидејќи овој јазик и понатаму е под закана од губење поради асимилацијата и недостигот на системска поддршка. Затоа, важно е да се потрудиме да ги охрабриме младите Роми да го зборуваат, учат и користат ромскиот јазик во својот секојдневен живот. Образованието е од клучно значење. Но, за жал, постојат предизвици што спречуваат многу млади да ја добијат оваа шанса. Некои од нив се економските бариери, недостигот на ресурси и нееднакви можности. Овие предизвици мора да ги надминеме заедно. Наша задача е да изградиме систем што ќе овозможи квалитетно и достапно образование за сите. Токму затоа инвестицијата во образованието е инвестиција во иднината. Со вложување во образованието ние вложуваме во градење генерации што  ќе бидат подготвени да ги решат проблемите на иднината. Младите кои ќе создаваат иновации, ќе промовираат позитивни промени, практично градат посилно и поодговорно општество“, нагласи Мицкоски.

Според Мицкоски, треба да се потсетиме и на потребата од заедничка работа за поголема инклузија и поддршка на ромската заедница.

Сите ние, додаде тој, без разлика на етничката, религиозната или културната припадност, сме дел од една голема заедница – заедницата на човештвото. Оцени дека само заедно, со меѓусебно почитување и разбирање, можеме да создадеме свет во кој секој јазик, култура и секоја приказна ќе имаат еднакво значење и ќе бидат слушнати и почитувани.

Министерот Панче Тошковски учествуваше и се обрати на експертски состанок за подобрување на разбирањето на врските со насилниот екстремизам, тероризмот и организираниот криминал во Западен Балкан во организација на Глобалната иницијатива против транснационалниот организиран криминал (ГИ-ТОК) со поддршка со Министерството за внатрешни работи на Холандија.

Министерот Тошковски потенцира дека ваквите иницијативи се клучни во заедничката борба за подобра безбедносна перспектива бидејќи проблемите со кои се соочуваме не познаваат граници и бараат заеднички, координирани и одлучни одговори.

„Организираниот криминал и насилниот екстремизам претставуваат сериозни закани за стабилноста на Западент Балкан. Тие имаат потенцијал да ги разјадат нашите институции, да ги ослабат заедниците и да создадат атмосфера на страв и несигурност. Затоа од витална важност е да ги зајакнеме механизмите за отпорност во најпогодените заедници и да вложиме во долгорочни решенија, што ќе ги спречат овие појави уште во нивната почетна фаза“, нагласи министерот Тошковски.

Тошковски на крајот истакна дека ваквите иницијативи имаат потенцијал да создадат трајни партнерства и вмрежувања, кои ќе ја зголемат ефикасноста на нашите заеднички напори и само преку такви синхронизирани и интегрирани мерки можеме да ја заштитиме стабилноста на нашите држави и да обезбедиме побезбедна и просперитетна иднина за сите наши граѓани.