Со традиционалната португалска фадо-музика и прекрасниот вокал Жуана Амендоира вечерва на сцената „Долни Сарај“ од 21 часот ќе биде одбележан 63-тиот роденден на фестивалот Охридско лето. Португалската уметница Жуана Амендоира ќе настапи во придружба на Педро Амендоира на португалска гитара и Жуао Фелипе на фадо-гитара.

На денешната прес-конференција по повод роденденот на фестивалот, директорката на НУ Охридско лето, Наташа Поповиќ, потсети дека богатата историја на Охридско лето е доказ за влогот на многу генерации и нивните напори да се исткае успешната приказна на врвната културна сцена.

„Со огромна почит вечно ќе ѝ благодариме на Ана Липша-Тофовиќ, која во далечната 1961 година под сводовите на прекрасната ‘Света Софија’ го означи раѓањето на најголемата културна манифестација во земјата и ни овозможи да ја славиме врвната уметност, да ѝ се радуваме на убавината и да создаваме трајни вредности. Нејзиното име ќе го слават и многубројни генерации по нас“, рече Поповиќ.

Осврнувајќи се на годинешното фестивалско издание, таа истакна дека уметноста што се создава на Охридско лето има универзален јазик и се пренесува со бескрајна моќ и влијание.

„Годинешното издание изминува во знакот на истакнати домашни и светски уметници, исполнети гледалишта, задоволна публика и многубројни пофалби како од стручната јавност така и од уметниците, кои се дел од програмата. Особено се гордеам на поддршката што ја добиваме од амбасадите во Република Северна Македонија. Првпат фестивалската програма има поддршка од дури единаесет амбасади, Романија, САД, ЕУ, Србија, Грција, Полска, Шпанија, Словенија, Италија, Франција и Украина“, додаде директорката Поповиќ.

Селекторката на музичката програма на фестивалот Охридско лето, Бисера Чадловска, рече дека 63-тото фестивалско издание е едно од најуспешните со квалитетните настапи на светски познатите музички уметници, како и со младите уметници, кои се на прагот од создавање успешна кариера.

„Особено се гордееме што оваа година успеавме во Охрид да пречекаме големи имиња од светот на класичната музика, почнувајќи од свеченото отворање, каде што имавме можност да ја слушнеме големата оперска дива Анџела Георгиу. По отворањето, на сцените на кои се одржува фестивалот секојдневно сме сведоци на концерти преполни со публика, чиј одѕив и реакции нè прават како организатори презадоволни од работата што сме ја сработиле. Да се потсетиме на неколку од нив, виолинистот Немања Радуловиќ со оркестарот Double Sense, џез-триото на Френк Дупре, Нишкиот симфониски оркестар, оркестарот ‘Кончертанте’, камерниот ансамбл La Spagna, пијанистот Дино Имери, кларинетистот Пабло Бараган и пијанистката Елоис Бела Кон, виолинистот Роман Симовиќ, квартетот ‘Шуман’, виолинистката Ирина Мурешану и оркестарот на институтот Fames, пијано трио со концерт посветен на флејтистот Илија Зимбо, камерниот ансамбл ‘Камерата академика’, тенорот Џани Лечезе и пијанистот Екланд Хаса, пијано дуото Дезомбре – Леклер, сите овие се дел од годинешното издание на Охридско лето. Особено сум среќна што од стручната музичка јавност во Македонија секојдневно добивам многу позитивни критики за годинешната програма“, рече Чадловска.

Според драмската селекторка на фестивалот, Сања Арсовска, изминатите денови беа запечатени со исклучителна театарска возбуда и силни впечатоци.

На денешната прес-конференција по повод 63. роденден на Охридско лето директорката на оваа национална установа, Наташа Поповиќ, потсети дека фестивалот од 1994 година е дел од Европската асоцијација на фестивалите, финансиски поддржан од Министерството за култура, а под покровителство на претседателот на државата. Како најголема манифестација е помогната и од Општина Охрид, а огромна заслуга за успесите имаат и верните пријатели на фестивалот, спонзори и помагатели, љубители на уметноста и поддржувачи на културните вредности.