Свет
Европски авиокомпании ги укинуваат летовите во делови од Африка

Дел од европските превозници ги откажаа летовите во некои делови од африканскиот континент откако нигерската хунта вчера го затвори воздушниот простор над земјата.
„Затворањето на воздушниот простор на Нигер драматично ја проширува областа над која повеќето комерцијални летови меѓу Европа и јужна Африка не можат да летаат“, се вели во соопштението на службата за следење летови FlightRadar24.
Француската авиокомпанија „Ер Франс“ ги прекина летовите до и од Уагадугу во Буркина Фасо и Бамако во Мали до 11 август. Авијацискиот аналитичар Џејмс Халстед рече дека авиокомпаниите генерално ќе мора да најдат алтернативни правци и тешкотиите треба да се ограничат со оглед на малиот број африкански авиокомпании.
„Тоа ќе влијае на рутите од Европа до Нигер и Јужна Африка и веројатно од Етиопискиот Залив до Западна Африка“, рече тој.
Портпаролите на „Луфтханза“ и „Брисел ерлајнс“ изјавија дека времето на летот може да биде меѓу еден и пол и три и пол часа подолго за пренасочени летови. „Бритиш ервејс“ соопшти дека им се извинува на клиентите за нарушувањето на нивните патувања и работи напорно за да ги врати на нивните патувања што е можно поскоро.
Водачите на државниот удар во Нигер го затворија воздушниот простор на земјата, поради, како што кажаа, заканата од воена интервенција од нивните соседи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.