Македонија
Вучиќ: Курти крева духови на немир во Северна Македонија и на југот на Србија

Српскиот претседател Александар Вучиќ на телевизиско гостување денеска го коментираше настапот и изјавите на косовскиот премиер Албин Курти во Македонија, оценувајќи ги како „скандалозни“ и дека Курти „крева духови на немир во Северна Македонија и на југот на Србија“.
-Ова е обид на Курти да крене духови на немир, не само во Северна Македонија, туку и на југот на Србија и сето тоа со премолчана подршка на меѓународната заедница, кажа Вучиќ.
Тој посетата на Албин Курти на Северна Македонија ја оцени како „скандал над скандалите“.
-Таму беше промовирана идејата за „Голема Албанија“, истакнати се нејзините симболи, а Курти меѓу другото беше претставен како премиер на сите Албанци и премиер на Тетово, истакна Вучиќ.
Тој се осврна на преименувањето на улицата Втора македонска бригада во Скопје во улица на Адем Демачи, потсетувајќи дека се работи за човек кој поминал 28 години во затвор, во времето на Тито, кое било либерално, како најлош и најголем големоалбански идеолог и сепаратист.
Тој истакна дека Демачи му бил ментор и идол на Курти и дека треба внимателно да се слуша што зборуваат луѓе како Дем Бериша, кој ги следи албанските медиуми, и посочи дека од Приштина со пари и други работи го ставиле под своја контрола и Шаип Камбери и дека го „зедоа“ и Рагми Мустафи, со цел да произведат кризи и тема да не биде само Косово туку и поширокиот регион и конечно да се тргне во Голема Албанија.
-Тоа се работи што се загрижувачки. Да не бевме воено толку посилни, толку пати посилни и помоќни во однос на технологијата, оружјето и се друго, знаете ли колку пати Курти ќе го нападнеше секој дел од Србија? Погледнете ја неговата идеологија, тој не би ја нападнал само централна Србија, туку и Северна Македонија, Црна Гора, а прашање е што би се случило и со Албанија, предупреди Вучиќ.
Тој истакна дека има обид Курти да поттикне немири со, како што додаде, непримерен молк и премолчена поддршка на дел од меѓународната заедница.
Вучиќ истакна дека треба да се внимава затоа што има обиди да се префрли вината на Србија, оти Косово е нивно дете – појасни тој мислејќи на меѓународната заедница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ивановска се кандидира за градоначалничка на Центар: „Не барам моќ, туку сакам да им ја вратам на граѓаните“

Поранешната претседателка на Антикорупциска комисија, Билјана Ивановска, официјално најави кандидатура за градоначалничка на Општина Центар како кандидат на граѓанската политичка платформа „Независни заедно“.
Ивановска најави дека во кампањата ќе се фокусира на решенија, а не на лични напади. Таа истакна дека во Центар ги дели истите проблеми со граѓаните и дека правдата, интегритетот и одговорноста се вредности кои ќе ги применува во креирањето на политики.
„Мојата визија е Општина Центар да биде на граѓаните, а не на профитот. Досегашната состојба е резултат на многу корумпирани и лукративни политики кои го занемарија интересот на граѓаните. Мене не ме водат апетити за профит, јас ги вложувам моите интегритет и капацитет за да понудам решенија кои можат да бидат добри за живеење и да го вратат достоинствениот живот. Не барам моќ и функција, туку сакам моќта да им ја вратам на граѓаните“, рече Ивановска.
Во рамки на платформата „Независни заедно“ членуваат граѓанските иницијативи „Шанса за Центар“, „Зелените за Гази Баба“ и „Групација 398“. Платформата е во процес на собирање потписи за формирање политичка партија.
Македонија
Мицкоски: Над 40 милиони денари за субвенционирање на сметките за електрична енергија за ранливите граѓани

Преку Министерството за енергетика, минерални суровини и рударство е распишан јавен повик кои што можат да аплицираат оние семејства кои што ги исполнуваат условите за субвенционирање на сметките за електрична енергија.
Премиерот Христијан Мицкоски рече дека за таа цел се превидени повеќе од 40 милиони денари, одговарајќи на новинарско прашање дали владата ќе ги субвенционира ранливите граѓани во покривање на трошоците за електрична енергија.
Мицкоски нагласи дека Македонија има најниска цена на електричната енергија, што не е случај со државите од соседството кои што имаат зголемување на цената на струја од 15, 20 па и 30 проценти.
„Но, она кое што исто така можам да го кажам во многу период на регулирање на електричната енергија откако е оваа Влада 14 месеци, ние немаме покачување на електричната енергија за домаќинствата што не е случај во околината.
Ако ги гледате другите држави ќе видите дека таму електричната енергија е покачена, 15,20 па во некои држави од соседството и 30 проценти. Така што и според Евростат и според сите параметри ние сме држава во Европа која што има најниска цена на струја за или една од двете, трите најниски цени за електрична енергија за домаќинствата.“, посочи премиерот Мицкоски.
Македонија
Пуштена клучката Подмоље, власта уверува дека на автопатот Охрид – Кичево се работи забрзано

Денеска е пуштена во употреба клучката Подмоље, која го спојува Охрид со Струга, како и Македонија со Албанија, информира потпретседателот на Владата и министер за транспорт Александар Николоски.
„Денеска решаваме уште еден горлив проблем во изградбата на автопатот Охрид-Кичево, а тоа е пуштањето во употреба на клучката Подмоље. Ова беше наследен проблем од минатото, бидејќи претходната власт делумно го работеше проектот погрешно, ја сруши клучката без решени имотно-правни односи и експропријации. Со формирањето на новата влада предводена од ВМРО-ДПМНЕ, ги решивме сите административни пречки и од денеска клучката е функционална, што значи побрз и побезбеден сообраќај за Струга и соседна Албанија кон Скопје“, изјави Николоски.
Тој посочи дека работите на автопатот се во забрзана динамика и дека се координираат на дневна основа со директорот на Јавното претпријатие „Државни патишта“ и премиерот Христијан Мицкоски.
Премиерот Мицкоски додаде дека се работи на стабилизирање на делниците со свлечишта, како што се околината на селото Ботун и просторот од тунелот кај Врбљани до Кичево, за целата траса да биде безбедна за возење.
„Се работи паралелно на сите критични точки, а очекуваме есенва да се завршат градежните и теренските работи на овие делници. Во исто време, со несмалена динамика се одвива изградбата на други автопатски делници – Тетово-Гостивар, Гостивар-Букојчани и Прилеп-Битола. Во фаза на евалуација се и тендерите за Букојчани-Кичево и Г.П.Блаце-Скопје“, рече Мицкоски.
Премиерот потенцираше дека оваа офанзива ќе резултира со завршување и заокружување на автопатската инфраструктура во Македонија, по повеќе од една деценија. Тој се заблагодари на компаниите, работниците, градоначалниците и пратениците од охридско-струшкиот регион, како и на граѓаните за трпението.
„Подобро е патот да се заврши и да биде функционален, отколку да остане незавршен и да биде споменик на едно време“, заклучи Мицкоски.