Македонија
(Видео) Ковачевски убедува пратеници: Предлогот е македонски, во Собранието секогаш постојат структури што сеат страв
Од собраниската говорница премиерот Димитар Ковачевски неколкупати повтори дека предлогот за измена на Уставот е македонски со цел да ги убеди пратениците да гласаат. Како и претходните денови, тој посочи дека поддршка има од Берлин и Вашингтон, а никој не нè асимилира, загрози и нападна. Според него, зад Македонија стојат најсилните и најголемите. Ковачевски посочи дека Европа има потреба од Македонија.
„Со гласањето ‘за’ ќе бидеме сите победници, а со ‘против’ ќе бидеме губитници. Денес е денот кога ќе стане јасно кој сака да ја види државата во ЕУ, а кој ја блокира. Кој ќе се заложи за државата да оди напред, а кој со изговори ќе биде од одговорност“, рече премиерот.
„Се водевме од единствениот најдобар начин да понудиме, да ги објасниме аргументите ‘за’ и да побараме поддршка за краткото изменување на Уставот. Не изолиравме никого, не одбивме дебата. И во 1991 година и сега – влезот во ЕУ беше, е и ќе биде најдобар државен политички процес, наш механизам да бидеме држава со сите стандарди. Тоа е со нашето членство во НАТО, што нè прави држава со сегашност, држава со јасна иднина“, рече Ковачевски.
Објасни и кои се интервенциите во Уставот.
„Речиси и да нема дебата и за слични прашања во Собранието, во која секогаш постојат политички структури и поединци, кои сеат страв, омраза, го преплавуваат просторот со лаги и црнила. Не заради нив, туку заради граѓаните, ќе се осврнам на конкретниот предлог. Предложените интервенции на Уставот се однесуваат единствено за додавање делови од народи при набројувањето на деловите од народите што живеат во државата“, посочи премиерот.
Посочи дека предлогот не е бугарски, туку македонски.
„Бидејќи за нашата историја знаеме, преку нас знаат и тие надвор. Предлогот за дополнување на Уставот има еден мотив, тоа е влез во ЕУ. Тоа што го бара и очекува огромното мнозинство граѓани во државата, ништо помалку, ниту повеќе. Предлогот е наш, македонски, според договорот од 2021 година, според кој ги отворивме преговорите за членство. Предлогот е направен во Скопје. Ги отфрлам лажните тези дека постои диктат од кого било за што било. Постои само нашата сегашна, а историска можност, да направиме добро за државата“, додаде Ковачевски.
Според него, не може да се загрози македонскиот народ и за него тоа е единствената вистина.
„Секој разумен човек знае и гледа дека предлогот нема да се одрази негативно на кои било атрибути. Уставните измени не загрозуваат идентитетско, македонско прашање. Тоа им е целосно јасно на сите во државата и затоа денеска, кога ќе ги видите улиците на Скопје и сите улици во државата, ќе видите дека сè е мирно и граѓаните очекуваат одлука за европската иднина“, додаде тој.
Поради нас самите, мора да бидеме европска држава, а патот не е ниту лесен ниту краток, посочи Ковачевски.
„ЕУ е наш најголем поддржувач, кредитор. Има најмногу инвестирано во Македонија. Европските компании се најсилните генератори на странски инвестиции. Членството во ЕУ овозможи раст на платите“, рече тој.
Тврдеше дека ново вето за што било и кој било – нема да има при преговорите. Се осврна и на минатата власт предводена од ВМРО-ДПМНЕ за која рече дека создала заробена држава. Според него, причината за гласање на измените на Уставот се младите.
„Младите не се иселуваат поради Уставот, не стануваат и заспиваат со Уставот, туку со потребата да живеат човечки, европски, дома, мирно“, додаде Ковачевски.
Се осврна и на историјата, која ја опиша како тешка и мачна, со корупција. Ги праша пратениците и Владата: „Дали сакаме правна држава, што ја немаше досега?“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кадровски промени на Водно, правникот Божинов и новинарот Момировски ќе раководат со претседателскиот кабинет
Претседателката на Македонија Гордана Сиљановска Давкова за генерален секретар на својот кабинет го именувала Ѓорѓи Божинов, пратник кој работел во Министерството за земјоделство, а за негов заменик новинарот Горан Момировски.
Од функциите се разрешени генералниот секретар Миле Бошњаковски и неговите заменици Билјана Радева и Тоше Зафиров, кои беа ангажирани во мандатот на доскорешниот претседател Стево Пендаровски.
Генералниот секретар Ѓорги Божинов е дипломиран правник со речиси тридецениско работно искуство во областа на правото во земјоделскиот сектор, законодавната и институционалната рамка, процесите на јавни набавки, корпоративно советување, програмите за финансиска поддршка, државна помош, како и примена и хармонизација на легислативата на Европската Унија во овие области.
Претходно, Божинов својата кариера во областа на правото ја остварува на раководни административни позиции во Министерството за земјоделство, шумарство и водостопанство.
Македонија
Вработена во МВР наплатувала по 15.000 евра за лажно посредување за социјален стан
Основното јавно обвинителство Скопје донесе Наредба за спроведување истражна постапка против 41-годишна вработена како аналитичар во СВР Скопје која е осомничена за продолжено кривично дело измама според член 247 став 4 во врска со став 1 од Кривичниот законик.
Од април 2023, искористувајќи ист траен однос и исти прилики, осомничената довела во заблуда три лица, на кои лажно им се претставила како началник во полициска станица Гази Баба и член на Комисија за доделување социјални станови.
На трите оштетени невработени лица им ветувала дека ќе им посредува да добијат социјални станови во Лисиче по цена пониска од реалната, наведувајќи ги да и исплатат по 12.000 евра за стан и 3.000 евра за посредување и изготвување документација.
Парите и ги давале во повеќе наврати, а при последната исплата на 12.500 евра, во близина на полициската станица, била затекната веднаш по предавањето на парите.
Јавниот обвинител до судијата на претходна постапка достави предлог за определување мерки на претпазливост – забрана за напуштање живеалиште, обврска повремено да се јавува кај службено лице во судот и одземање на патната исправа.
Македонија
Отфрлени се тужбите на „Европскиот фронт“ од Уставниот суд, ќе има прегласување
До доцна во ноќта Уставниот суд расправаше по тужбите на одлуките на Државната изборна комисија – ДИК за неколку избирачки места поднесени од коалицијата „Европски фронт“. Од судот соопштија за шест одлуки според кои тужбите се отфрлени како неосновани, а тоа значи, согласно одлуките на ДИК, дека ќе има прегласување на конкретни избирачки места.
„Европскиот фронт“ имаше поднесено седум тужби на одлуките на ДИК, а Управниот суд беше ограничен со роковите за нивно решавање.
Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Според Изборниот законик, доколку одлуката за прегласување на едно избирачко место може да влијае на конечните резулатите од изборите, ДИК ќе организира повторно гласање 14 дена од одржувањето на изборите, односно на 22 мај.