Свет
„Јас сум злобна личност, јас го направив ова“ – морничави белешки најдени кај медицинската сестра која уби седум бебиња
Британската медицинска сестра Луси Летби во петокот беше прогласена за виновна за убиство на седум новороденчиња и обид за убиство на уште шест во неонаталното одделение во болница во северозападна Англија.
Луси Летби (33) беше осудена за убиство на пет момчиња и две девојчиња и напад на други бебиња во болницата додека работела во ноќни смени во 2015 и 2016 година.
Судот в понеделник ќе ја изрече казната, веројатно повеќегодишна затворска казна, а можеби и доживотна.
Некои жртви ги отрула со инјектирање инсулин, а на други им вбризгувала воздух или насилно ги хранела со млеко.
„Ги убив намерно затоа што не сум доволно добра за да се грижам за нив“, пишува во рачно напишаната белешка што ја пронашле полицајците кога го пребарале нејзиниот дом.
„Јас сум ужасно злобна личност. Злобна сум, јас го направив тоа“, напишала таа.
На друга белешка пишувало: „Никогаш нема да имам деца или да се омажам. Никогаш нема да знам како е да се има семејство“.
Летби им кажа на поротниците дека белешките ги напишала откако била суспендирана од работа во исчекување на истрага за необичните смртни случаи – и дека исто така содржеле многу молби за невиност.
На Луси Летби и било доверено да заштити некои од најранливите бебиња. Тие што работеле со неа не знаеле дека меѓу нив има убиец, изјави Паскал Џонс, висок обвинител.
„Таа даде се од себе за да ги прикрие своите злосторства, менувајќи го начинот на кој ги повредуваше бебињата“, додаде Џонс.
Судењето траеше 10 месеци, пришто можните мотиви за злосторствата беа обелоденети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
28 милиони долари за кампањата на Бајден собраа холивудските ѕвезди
Голем број холивудски ѕвезди, меѓу кои и Џорџ Клуни и Џулија Робертс на синоќешната донаторска вечера за кампањата на претседателот Џо Бајден собраа 28 милиони долари.
Тоа е најголема сума во историјата собрана за некој демократски кандидат.
Донаторската вечера се одржа во театарот Пикок во Лос Анџелес, а водителот на емисијата „Лејт најт“ (Late night), Џими Кимел, ги интервјуираше Бајден и поранешниот претседател Барак Обама, кои ја истакнаа потребата да се победи поранешниот претседател Доналд Трамп.
Бајден истакна дека за време на неговиот претседателски мандат „усвоен е секој главен закон што бил планиран“. Додека Обама изрази восхит за сеопфатната легислатива за здравствена заштита, јавни работи, животна средина, новите технологии, безбедноста на оружјето и другите големи иницијативи што ги спроведува сегашната администрација.
Трамп синоќа беше во Детроит и ја критикуваше економската политика на Бајден.
Европа
Германската полиција уби навивач кој со секира влегол во фан-зоната на Европско првенство (ВИДЕО)
Германската полиција во Хамбург имаше полни раце работа. Во градот каде хрватската фудбалска репрезентација ќе го одигра следниот натпревар на ЕП, оној против Албанија, полицијата застрела и уби еден маж. Германските полицајци биле принудени на тоа, бидејќи мажот сакал со секира да нападне случајни минувачи во фан-зоната за време на Првенството.
Напаѓачот во Хамбург прво ги нападнал навивачите со секира, а потоа ги нападнал и обезбедувањето.
Полицијата прво употребила солзавец, а потоа пукала. Еден од истрелите на полицаецот бил предупредувачки, а вториот го погодил.
Наспроти првичните вести, нападот очигледно нема никаква врска со Европското фудбалско првенство.
„Местото на нападот е далеку од просторот каде се следат првенствените натпревари. Нема индиции дека напаѓачот има врски со некоја од навивачките групи“, соопштија од полицијата.
Денеска во Хамбург се игра натпреварот помеѓу Полска и Холандија и градот е преполн со навивачи на двата табора.
Европа
Четворица загинати во страшна сообраќајка во Грција, пожарникарите го сечеа возилото за да ги извадат телата (ВИДЕО)
Во сударот меѓу автобус и автомобил, што се случи денес наутро пред Токсотес Ксанти, на стариот национален пат Ксанти-Кавала во Грција, четири лица загинаа, а три се повредени.
Според првите информации, во судирот што се случил нешто по 08:00 часот, едно возило изгубило контрола и удрило во автобус што минувал.
Патниците загинале на лице место, а пожарникарите го сечеле возилото за да дојдат до телата на настраданите во автомобилот.