Спорт
(Видео) Салах го помина Џерард, победи за Ливерпул, Брајтон и Брентфорд
Мохамед Салах по деветти пат му даде гол на Борнмут во девет меча, за да ги предводи „црвените“ до 3:1 победа по хаотичниот старт, Брајтон покажа заби со 4:1 победата на гости кај Вулврхемптон, додека Фулам по заминувањето на Александар Митровиќ имаше болен 0:3 пораз од Брентфорд во второто коло од Премиерлигата.
Почетокот на мечот на „Енфилд“ не беше најдобар. По серија грешки на одбраната, Антоан Семејо во третата минута од мечот постигна убав гол со удар меѓу нозе на Виргил ван Дајк за 0:1. Луис Дијаз ги врати Ливерпул во игра во 28. минута со убав гол, пред во 37. минута да биде досуден пенал за домаќините. Првиот удар на Салах не беше прецизен, но тој одбиената топка ја смести во голот за свој 187. гол за Ливерпул, со што го помина легендарниот поранешен капитен, Стивен Џерард на петтото место на вечната листа на „црвените“.
Почетокот на второто полувреме пак не започна најдобро за Ливерпул со црвен картон за Алексис Мекалистер по еден невнимателен старт. Меѓутоа, Диого Жота успеа во 68. минута да го постигна и третиот гол за прва победа за тимот на Јирген Клоп оваа сезона.
Брајтон, пак, повторно покажа дека е сериозен кандидат да биде најпријатното изненадување во лигата со убедливата 4:1 победа на гости кај Вулфс. Каору Митома со фантастичен гол во 15. минута донесе предност за гостите, по што на почетокот на второто полувреме, Митома му асистираше на Еступињан за 0:2 во 48. миута, за Марч да постигне два гола во 51. и 55. минута за 0:4 водство!
ПРЕМИЕРЛИГА, 2.КОЛО
Ливерпул – Борнмут 3:1
Вулверхемптон – Брајтон 1:4
Фулам – Брентфорд 0:3
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Стефано Пиоли повеќе не е тренер на Милан
Стефано Пиоли повеќе не е тренер на Милан. Му пресудија не толку добрите резултати оваа сезона. Милан заврши втор во Серија А, но со голем минус во однос на шампионот Интер, не успеа да излезе од групата во Лигата на шампионите, а во Лига Европа, доживеа елиминација во четвртфиналето од Рома.
„Чао мистер,
Сакам да ти кажам дека се сеќавам на се од тој ден кога повторно станавме шампиони.
Ти и твоите момчиња на врвот на Италија. Јас, со ранец на грб, на врвот на трамвајската станица, додека срцето ми лудува.
Се сеќавам кога започна се, се сеќавам на Бергамо, дождот против Рио Аве, времето на Ковид и повторното раѓање на Милан. Враќањето во Европа и враќањето дома. Лигата на шампионите.
Со тебе почнавме повторно храбро да напаѓаме, да играме на победа, да се лутиме кога не победуваме. Да се навива со гордост.
Рафа, Тео, Мајк и сите други момци кои станаа подобри луѓе со вас затоа што им ги всадивте вредностите на клубот и ги научивте како да им пристапат на предизвиците и на теренот и во животот.
Сето тоа го направивте со страст, понизност и одлучност. За сето тоа сакав само да кажам – благодарам.
За секој пат кога татко ми ми ставаше шал пред да ме крене на рамениците на „Сан Сиро“. За момент можев само да сонувам порано. „Ние сме Милан“, ми рекоа. „И ќе се вратиме. И го направивме тоа. Повторно сме шампиони. И беше прекрасно.
А за се друго што не научи:
Само оние кои веруваат можат да постигнат успех“, со оваа порака фудбалскиот клуб Милан се прости од Пиоли.
Секако, Милан излезе и со официјално соопштение во кое потсети дека Пиоли пристигна во клубот во октомври 2019 година. Во која му се заблагодари на тренерот за се што му дал на клубот.
Пиоли го напушта гигантот од „Сан Сиро“ со биланс од 130 победи на 239 натпревари. Имаше и 57 нерешени и 52 порази. Скудетото го освои во сезоната 2021/22.
На неговото место, според шпекулациите ќе дојде актуелниот тренер на Лил, Пауло Фонсека.
Спорт
Грчки и турски навивачи го „окупираа“ Берлин
Вечерва во „Убер арена“ во Берлин ќе започне завршниот турнир во кошаркарската Евролига. Актуелниот шампион Реал ќе се обиде да ја одбрани титулата во конкуренција на Фенербахче и грчките гиганти Олимпијакос и Панатинаикос.
Првото полуфинале ќе започне во 18 часот, ќе играат Панатинаикос и Фенербахче, три часа подоцна во реприза на финалет од мината сезона ќе се сретнат Реал и Олимпијакос.
Вистинска инвазија на грчки навивачи се очекува во германската престолнина. Според медиумите ќе има најмалку 9.000 навивачи од Атина. Интересно се очекува толкав број и на турски навивачи, што и не е изненадување бидејќи голем број Турци живеат во Германија.
Спорт
Жиру ќе се повлече од националниот тим
Оливие Жиру на Европското првенство ќе ги одигра последните натпревари во дресот на Франција. 37-годишникот кој од наредната сезона ќе игра за Лос Анџелес ФК реши да стави крај на кариерата во репрезентацијата.
„За мене репрезентативната приказна ќе заврши по Европското првенство. Мора да им оставиме простор за младите играчи“, изјави меѓу другото напаѓачот за „Лекип“.
Од своето деби за „Триколорите“ во 2011 година, Жиру одигра 131 натпревар и постигна 57 голови, со Франција стана светски првак во 2018 година.
Франција на ЕУРО 2024 ќе се натпреварува во групата Д заедно со Полска, Холандија и Австрија.