Македонија
Ѓорѓиевски: Проширената градинка „Кокиче” врши прием на нови дечиња, родителите да аплицираат

Проширената градинка „Кокиче“ е подготвена за прием на нови дечиња, соопштија од Општина Кисела Вода.
Во целост се завршени повеќемесечните градежни активности на Општина Кисела Вода, кои опфатија проширување, односно преадаптација и кои овозможија капацитетот на овој објект да биде зголемен за нови 90 дечиња. Последниве денови се работеше и на опремување со мебел, кој е обезбеден преку договор со Министерството за труд и социјална политика. Градоначалникот Ѓорѓиевски денес ја посети оваа градинка и упати апел до сите родители да аплицираат за упис. Потенцира дека ова би требало да го сторат и родителите од урбаната заедница Расадник за и во тамошниот објект да се намали бројноста на групите сè додека не биде изграден и таму нов објект, кој е во подготвителна фаза. Воедно, потсети дека сега веќе на располагање во „Кокиче“ стојат и јасли, но и на тоа дека во дворот на овој објект ќе се гради сосема нов, дополнителен објект. Градоначалникот и Општината веќе изготвија проект и обезбедија финансиски средства за доградба, велат од таму. Со ова се отворени околу 300 нови места во градинките во Кисела Вода и наследените листи за чекање од минатото на кои имаше над 450 деца, набргу веќе нема да ги има.
„Со големо задоволство сакам да ги повикам сите родители од Кисела Вода од денес да почнат со аплицирање за упис во проширената градинка ‘Кокиче’ при ЈДГ ‘Весели цветови’ бидејќи таа е комплетно подготвена за прием на нови дечиња. Веќе неколку месеци работевме на преадаптација на 4-5 простории, на проширување на просторот, а сега веќе, откако пристигна и е наместен мебелот, кој го обезбеди Министерството за труд и социјална политика, за што сакам да упатам голема благодарност до нив и до министерката Тренчeвска, по добивањето согласност од нив, есенва ќе можеме да ги отвориме вратите за нови, дополнителни 90 деца. Како значајна новина е дека отсега тука ќе функционираат и јасли, а примени ќе бидат и деца од населбата Расадник додека и таму не биде изграден планираниот нов објект. Во контекст на претходното, сакам да потсетам дека и тука, во дворот на градинката ‘Кокиче’, ќе градиме сосема нов објект за кој веќе го изготвивме проектот и ги обезбедивме финансиските средства. Во него ќе има простор за 120 нови дечиња. Се работи за простор на површина од 525 квадратни метри, со 6 занимални и тоалети, енергетска ефикасност, целосно партерно уредување, изведба во согласност со сите стандарди, правилници и нормативи, кои условуваат и овозможуваат позитивен ран детски развој. Со ова слободно може да каже дека наследените листи за чекање од минатото, на кои имаше над 450 дечиња и кои со напорна работа во целиот овој период по преземањето на градоначалничката функција, отворајќи околу 300 нови места во градинките, набргу воопшто ќе ги нема“, изјави Ѓорѓиевски.
Заинтересираните родители може да извршат упис на своите деца, електронски или лично, во управата на ЈДГ „Весели цветови“, ул. Локов бр 11 (објект „Сончоглед“).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.