Македонија
На Османи не му е гајле за Македонија, тој се грижи за Косово: интервју со Најчевска, која го открива значењето на изјавите на албанските политичари
Осврнувајќи се на политиката што се води во државата и на луѓето одговорни за тоа, професорката Мирјана Најчевска во интервју за „Макфакс“ посочува дека кај нас тие што се на власт не се плашат од ништо, а некои од нив, како што вели, алудирајќи на лидерите на двете најголеми политички партии, Мицкоски и Ковачевски, се случајни луѓе, кои во случаен момент дошле на позициите и тоа е многу лошо за Македонија.
За првиот човек на дипломатијата, Бујар Османи, ќе каже дека нему не му е гајле за Македонија.
„Османи се грижи за Косово. Османи гледа како да се искористи ситуацијата на претседателството на Македонија во ОБСЕ за да може да се зајакнат позициите на Косово. Тој се грижи како да се решат проблемите меѓу Косово и Србија, а Македонија му е последен елемент на интерес“, одговара Најчевска.
Професорката со остри критики и за албанскиот политички табор, односно изјавите на Скендер Реџепи и на Таравари.
„Мислам дека тоа е класичен говор на омраза, тоа е кривично дело и треба да се разговара за кривичен прогон на луѓето што се обидуваат да ја искористат оваа ситуација за ширење омраза. Доколку во моментот не застанеме на таквиот вид реторика, ќе дојде до замав на тркалото и ќе влеземе во националистичка лавина“, објаснува таа.
Според неа, зборовите на политичарите од албанската етничка заедница, кои се нацицани со национализам, не значат ништо друго, освен дека тие откриле оти на тој начин може да ги мобилизираат граѓаните од албанската етничка заедница бидејќи не може да понудат ништо друго.
„Секојдневно ги трујат. Гледаме дека урбаната мафија цвета во неверојатни размери, немаат ни Д од демократија во рамките на сопствените партии, владеењето на правото го сведоа на обичен мафијашки рекет. Единствено за кое може да се обединат е веење знаме и продавање националистичка магла. Тие немаат никаква идеја ниту за голема Албанија, тие си нашле алатка и викаат – еј, супер е овој чекан – мавни го телевизорот, работи, мавни го уште еднаш додека не го скршат, па ќе поминат на друг“.
Каква е оценката на Најчевска за владината кампања преку која граѓаните ќе се убедуваат за уставните измени, дали на Европа ѝ одговара изолација, дали собранискиот спикер направи злоупотреба и го прекрши Деловникот, до кога ќе трае неизвесноста во државата и што ќе донесат странските дипломати, во интервју за „Макфакс“ одговара професорката Мирјана Најчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.