Македонија
ЦУК: Сите вчерашни пожари се изгаснати
Центарот за управување со кризи известува дека вчера имало вкупно 28 пожари на отворен простор и дека сите се изгаснати.
„Нема активни пожари од вчерашните. Сите 28 пожари од вчера се изгаснати, при што последен и најдолготраен бил пожарот веднаш над селото Смоларе, на планината Беласица, кој можел да прерасне во опасен и за шумата, а и за селото“, истакнуваат од ЦУК.
Конкретно, шумскиот пожар до горниот дел од с. Смоларе, каде што во близина имало и борова шума што лесно можело да биде зафатена, можел да го загрози селото ако на време не бил детектиран дека се разгорува во неколку наврати и да биде локализиран и гасен. Пожарот избувнал по гром, поточно молња удрила во суво стебло од костен по што и почнал на крајот од денот пред стемнување. Од страна на локалната месна заедница веднаш бил пријавен на бројот за итни случаи 112 во ЦУК. Пожарникарите бргу интервенирале и го локализирале до ноќните часови, но по 21 часот, повторно се појавил чад, а потоа и активно горење, па пожарот потпомогнат од послаб ветер почнал да се разгорува. Мештаните активно се самоорганизирале преку локалната месна заедница да дежураат и до доцна во ноќта го гаснеле и го локализирале, а потоа, кога тоа било можно, утрово, со помош на тим од ЈП „Национални шуми“, повторно го доизгаснувале по што целосно го изгасиле. Мештаните изразија благодарност на пожарникарите од Струмица и на тимот од локалната подружница на ЈП „Национални шуми“, а и на РЦУК „Струмица“, за нивниот ангажман и за советите за безбедност при гаснењето на пожарот, велат од ЦУК.
Вчера биле изгаснати следниве 28 пожари:
– општина Ново Село 2 – кај с. Борисово (висока сува трева, нискостеблеста) и шумски пожар до горниот дел од с. Смоларе,
– општина Битола 2 – с. Лажец и с. Могила кон с. Радобор (запалено ниска вегетација, стрниште);
– општина Крушево во с. Алданци (ниска вегетација);
– општина Прилеп 4 – на улицата Кордун, с. Дебреште, с. Бело Поле, с. Ропотово и месноста Маркови Кули (запалена ниска вегетација и стрништа);
– општина Ресен 2 – с. Козјак и с. Наколец (сува трева и нискостеблести растенија);
– општина Богданци над браната „Паљурци“ (запалена нискостеблеста шума);
– општина Кичево во с. Ивандол (запалена ниска вегетација);
– општина Дебар – во месноста Житинско Поле (сува трева и стрништа);
– општина Струга – с. Калишта (запалена ниска вегетација);
– општина Велес (запалена ниска вегетација и трње и ѓубре);
– општина Кавадарци – с. Манастирец (запалена ниска вегетација);
– општина Чешиново Облешево 2 – с. Чифлик и селата Три Чешми и Долни Балван (запалено стрниште);
– општина Ранковце кај с. Опила (запалена стрниште)
– општина Тетово 5 – с. Волковија (депонија), а кај и с. Теарце, с. Пршовце, с. Камењане и с. Желино.
(сува трева и ниска вегетација);
– општина Гостивар 2 – населба Фазанерија и с. Форино (запалена ниска вегетација)
– општина Чучер Сандево – кај селото Блаце (запалена ниска вегетација и шума).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Руте во посета на Армијата: Дејствувате над вашите капацитети кога станува збор за истурените копнени сили
Генералниот секретар на НАТО, Марк Руте, денес во касарната „Илинден“, Скопје, оствари посета на Армијата, која се реализира во рамки на неговата официјална покана на Македонија.
Генералниот секретар беше пречекан од началникот на Генералштабот на Армијата, генерал-мајор Сашко Лафчиски и министерот за одбрана Владо Мисајловски.

Во рамките на посетата, генералниот секретар се обрати пред припадниците на Армијата истакнувајќи го придонесот што нашата држава го прави во рамки на Алијансата.
„Вие навистина дејствувате над вашите капацитети кога станува збор за истурените копнени сили (Forward Lend Forces)“, истакна Руте, потенцирајќи „со тоа се грижите навистина да ја одбраниме секоја педа од територијата на Алијансата“.

За време на посетата беше извршена смотра на построените единици, како и на опремата и средствата со кои располагаат Лесната пешадиска баталјонска група и декларираните единици од составот на Баталјонот на специјални сили.
Во знак на признание за придонесот во зајакнувањето на соработката и поддршката на Армијата на Република Северна Македонија во рамки на Алијансата, началникот на Генералштабот на Армијата, генерал-мајор Сашко Лафчиски му додели Голема плакета на Армијата на генералниот секретар на НАТО.

На настанот присуствуваа генерали на Армијата и претставници од Армијата и Министерството за одбрана.
Македонија
(Видео) Филипче: Врските на Стоиљковиќ со Москва и кинеските кредити се сериозен сигнал
Претседателот на СДСМ, Венко Филипче, по обраќањето на генералниот секретар на НАТО, Марк Руте, оцени дека пораките упатени од највисоката адреса на Алијансата се јасни и недвосмислени и директно се однесуваат на актуелната влада. Филипче вели дека врските на вицепремиерот Иван Стоиљковиќ со структури блиски до Москва како и кинеските кредити претставуваат сериозен сигнал за загриженост.
„Фактот дека вториот човек во Владата има отворени контакти со лица и организации кои се во директна комуникација со Кремљ, во време кога Русија води агресија врз Украина, е нешто што не може да се игнорира“, нагласи Филипче.
Тој посочи и на финансиските аранжмани на Владата, потенцирајќи дека заемот од една милијарда евра преку Унгарија, за кој европските институции во свој извештај нотирале дека станува збор за средства со кинеско потекло, отвора сериозни прашања.
„Кога на тоа ќе се додадат и кинеските пари кои пристигнаа преку заемот од Унгарија, станува јасно дека станува збор за политики кои испраќаат погрешни сигнали во рамки на Алијансата. Нашиот одбранбен чадор знае точно какви политики води оваа влада и јасно укажува на нив“, истакна Филипче.
Македонија
Утре променливо облачно време со температура до 17 степени
Утре претпладне времето ќе биде сончево со мала до умерена облачност и со услови за појава на утринска магла по одделни котлини. Попладне облачноста ќе се зголеми и ќе преовладува променливо облачно време со сончеви периоди, информира УХМР.
Ќе дува слаб до умерен ветер претежно од јужен правец. Минималната температура ќе биде во интервал од -2 до 5, а максималната ќе достигне од 13 до 17 степени.
Во Скопје, претпладне сончево со мала до умерена облачност, а попладне променливо облачно со сончеви периоди. Ќе дува слаб до умерен ветер од јужен правец сончево со мала до умерена облачност. Минималната температура ќе се спушти до 4, а максималната ќе достигне до 17 степени.
Во следните денови ќе преовладува сончево и релативно топло време со мала до умерена облачност, освен во четврток кога ќе има повремени локални врнежи од дожд. Утре и во четврток по одделни котлини ќе има услови за појава на слаба магла.

