Регион
Бериша: Однесувањето на Рама во Блед е срамно, тој го создаде првиот режим на наркодржава во Европа
Лидерот на Демократската партија на Албанија, Сали Бериша, го нарече премиерот Еди Рама дрзок поради говорот што тој го одржа на Стратешкиот форум во Блед, Словенија, објави „Албанска пошта“.
Бериша рече дека однесувањето на премиерот Еди Рама е срамно.
Рама ги шокира со неговото однесување сите учесници, вклучително и новинарите, забележува бугарски „Бгнес“. Тој ја споредил Бугарија со Русија, но не ја потценил Хрватска, идентификувајќи ги двете држави како агресори.
„Бугарија лесно може да ја нападне Северна Македонија како Русија – Украина, Хрватска лесно ќе ја нападне Србија, Србија – Косово, а Босна може самата да се нападне. Ова го рече албанскиот премиер во дискусијата што може да се направи за побрз влез во ЕУ, како што сега се случува со Украина поради конфликтот со Русија.
Гледајќи го конфликтот во Украина и забрзувањето на патот кон ЕУ поради него, се прашувам: кој кого треба да нападне за побргу да влезе во ЕУ како Украина? И си одговарам: Бугарија лесно може да ја нападне Северна Македонија, без сомнение, Хрватска лесно може да ја нападне Србија, Србија – Косово, Босна може да се нападне без проблеми. Ние, Албанија, можеме да бараме од Грците да нè нападнат и тие со задоволство ќе го направат тоа, Црна Гора може само да лежи на плажа. И така сите ќе бидеме подготвени да влеземе во ЕУ заедно со Украина“, изјавил Рама.
Бериша на социјалната мрежа го напиша следново: „Во позиција на дрзок јастреб, Еди Рама, за да го изрази своето незадоволство од студениот однос на ЕУ кон Албанија, во Словенија изјави дека ако борбата за членство на Украина е земени како основа на ЕУ, балканските земји се подготвени да се напаѓаат едни со други. Ова е ненадејна, срамна изјава“.
Бериша додаде дека „Украинците го потпишаа статутот за кандидат за членство на својата земја во ЕУ со крв, херојство, жртви и извонредна борба и отпор, мачеништво на стотици илјади нивни синови и ќерки за слободата и суверенитетот на својата земја од варварскиот руски агресор, но и во заштитата на слободата и суверенитетот на сите слободни народи во Европа“.
„Еди Рама го создаде во Албанија првиот и единствен режим на наркодржава во Европа, заснован на организиран криминал, наркотици, корупција на албанските администратори, што ги принуди Албанците да ја напуштат Албанија повеќе отколку што останаа Украинците од руското бомбардирање на нивните села и градови“, заклучува Бериша и додава дека „за Албанците е срамно тоа што им го претставува Рама“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес го погоди Сараево
Послаб земјотрес го потресе Сараево изутрината.
Како што соопшти Федералниот хидрометеоролошки завод во Сараево, во Центарот за сеизмологија е регистриран во 8.04 часот слаб земјотрес во областа на главниот град на Босна и Херцеговина.
Магнитудата на земјотресот била 2,2 степена според Рихтеровата скала, а интензитетот во епицентарот бил III степен според Меркалиевата скала.
Многубројни жители на Сараево пријавиле тресење на земјата на услугата EMSC.
„Кратко, но силно“, „Кратко, татнеж“, „Само мал трепет и силен звук“, „Кратко, но жестоко“, изјавија тие во своите коментари.
Регион
Ердоган ги спореди израелските напади во Газа со геноцидот во Сребреница
Турскиот претседател Реџеп Тајип Ердоган денеска по разговорот со претседавачот на Претседателството на БиХ, Денис Беќировиќ изјави дека Израел ќе одговара за злосторствата во Газа, споредувајќи ги со геноцидот во Сребреница.
„За жал, денес во Газа и на окупираните палестински територии сме сведоци на сличен масакр што беше извршен пред очите на целиот свет во Босна и Херцеговина во 1990-тите“, рече Ердоган, кој денеска го прими Беќировиќ во Истанбул.
Тој додаде дека Израел ќе биде кривично гонет за убиствата на повеќе од 41.000 Палестинци во Газа, вклучително и турскиот активист Ајсенур Езги Ејги, кој беше убиен на Западниот Брег минатата недела.
„Сторителите на геноцидот во Газа, како оние во Сребреница во 1995 година, ќе одговараат пред меѓународните судови“, рече Ердоган.
Тој потсети дека Турција ја спонзорирала Резолуцијата на ОН за осуда на геноцидот во Сребреница и дека таа земја се залага за стабилноста на Босна и Херцеговина. Тој ги повика властите во БиХ да се приклучат во борбата против движењето ФЕТО, сметајќи дека таа организација е терористичка.
Фето е движење на Фетулах Ѓулен, поранешен сојузник, а сега противник на претседателот Ердоган, кого го смета за виновен за обидот за воен удар во јули 2016 година. Беќировиќ рече дека пријателството меѓу Босна и Херцеговина и Турција е нераскинливо.
„Република Турција е докажан пријател на Босна и Херцеговина и една од најсилните членки на НАТО алијансата и затоа, меѓу другото, нејзината поддршка за Босна и Херцеговина е исклучително важна“, нагласи Беќировиќ.
Регион
Двe лица се удавија во Будва и Бар, холандски турист спаси жена и дете од разбрануваното море
Две лица се удавија во петокот вечерта во Будва и Бар, јавија денеска црногорските медиуми, повикувајќи се на полициски извори.
Едно лице се удавило во градот Дробни Пијесак кај Будва, соопшти Управата за поморска безбедност и управување со пристаништа (УПСУЛ), пренесува порталот ЦДМ. Удавеникот, како што се наведува во соопштението, бил извлечен од спасувачкиот чамец САР-5 заедно со екипажот на УПСУЛ и членови на Секторот за гранична полиција.
Претходно синоќа се удави и украинскиот државјанин О.Ј. (36) во морето кај Бар, пренесува порталот Бар инфо. Спасени биле сопругата и детето.
„Семејството на давеникот е спасено, благодарение на холандски државјанин кој скокнал во брановите за да им помогне, а потоа биле испратени во Општата болница во Бар за медицинска помош“, изјавија од полицијата за Радио Бар и Бар Инфо.
УПСУЛ предупреди дека е на сила црвен метеоролошки аларм и предупредување за многу силни ветрови кои создаваат големи бранови и силни струи.
И покрај ова предупредување, на плажите беа забележани капачи кои влегуваат во морето и на тој начин ги ризикуваат своите животи, но и животите на припадниците на службите кои ги спасуваат на многу турбулентен, карпест и непристапен терен.
Вакви и слични ситуации се повторуваат со години и, за жал, резултираат со непотребна загуба на човечки животи, а УПСУЛ ги повикува капачите да бидат многу внимателни во наредните денови за да се избегнат непотребни несреќи и давење, се заклучува во соопштението.
Од УПСУЛ потсетуваат дека граѓаните и туристите можат да се јават и да пријават каква било ризична ситуација на море директно на бесплатниот број 129 или преку мобилната апликација safesea.me.