Македонија
Одговорност за двете свирепи убиства во Куманово, бара Левица

Како резултат на несоодветното постапување на институциите и несанкционирање на монструмот Дејан Јовановски од страна на правосудните органи, по десет години тортура врз двете жени, тој останал на слобода и свирепо ги уби сопругата и мајка ѝ, а осумгодишното синче се криело во собата, велат од Левицата.
Овој хорор, како што појаснуваат од партијата, го трпеле двете жени со години, а и покрај тоа што убиецот имал пет кривични пријави, изречени биле само две условни пресуди. Втората пресуда Основниот суд во Куманово ја донел во 2021 година откако претходната година ја претепал својата партнерка, потсетуваат од партијата на Апасиев.
Левицата јавно бара одговори од ОЈО Куманово по кој основ поднеле обвинителен предлог против убиецот, со оглед на фактот дека на насилникот му се изречени само две условни пресуди, од три и седум месеци?!
„Бараме одговор од Основниот суд Куманово како судиите ги ценеле овие околностите и зошто по низата физички напади и закани, не предвиделе дека може да бидат кобни за жртвите и не било изречена построга санкција за убиецот?
Казните за нанесување телесна повреда, односно тешка телесна повреда извршена како семејно насилство, варираат до 3 години, односно 5 години казна затвор, во зависност од делот. Доколку убиецот бил зад решетки, можеби никогаш немало да се случи ова злосторство.
Убиството на двете жени во Куманово повторно го отвори прашањето колку нашите институции имаат капацитет да ги заштитат жртвите на семејно насилство и да им овозможат соодветна заштита. Поразително е тоа што насилството врз жени во овој гнил систем институциите одлучуваат да го игнорираат наместо навремено да преземат соодветни мерки за заштита.
Неефикасните бирократски процедури и институционалните бариери, економската зависност, страв од бездомништво и сиромаштија се најчести причини жените жртви да бидат обесхрабрени да го пријават случајот. Нужни се системски промени со кои брзо и ефикасно ќе се справува со насилниците, за да се заштитат жртвите, а потребно е зголемување и заострување на казните затвор за семејно насилство“, реагираат од Левица.
За жал, како што велат, во Македонија не постои официјална статистика за бројот на фемициди, но некои неофицијални статистики велат дека во периодот од 2001 до 2020 имало 54 такви случаи.
„Случаите на фемицид го потресоа регионот, откако во Босна и Херцеговина во период од 10 дена беа убиени две жени од своите поранешни партнери.
Министерството за труд и социјална политика, на чело со министерката Јованка Тренчевска од редовите на СДСМ, остануваат неми за насилствата кои секојдневно го трпат жените во Македонија, како и за загрижувачката бројка на случаи на фемицид.
Бараме одговорност од сите чинители во низата кои се директни соучесници во убиството на жените“, потенцираат од Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сергеј Попов ги матираше СДММ, извади документ од кој се гледа како лажат, велат од ВМРО-ДПМНЕ

„Се е пријавено дечки, затоа вчера ви рековме два пати да размислите пред да излезете на прес. Ама толку слушате, затоа сте младина сведена на статистичка грешка“, напиша Сергеј Попов, претседател на УМС и пратеник на ВМРО-ДПМНЕ, на социјалните мрежи.
„Штета, паметам времиња кога СДММ беше подмладок за почит“, додаде тој.
Македонија
Пратеничката Мимоза Муса на 73. КОСАК конференција во Варшава

Пратеничката Мимоза Муса, членка на Комисијата за европски прашања, учествува на 73. Конференција на комисиите за европски прашања на Парламентите на земјите членки на Европската Унија (КОСАК), која се одржува од 8 до 10 јуни 2025 година во Варшава, Република Полска.
Конференцијата се одржува во Сејмот на Република Полска, а учество земаат претставници на Парламентите од земјите членки и кандидатите за членство во Европската Унија, како и претставници на Европската комисија и Европскиот парламент.
Темите опфатени на Конференцијата се: приоритетите на Полското претседателство со Советот на ЕУ, работните програми на Европската комисија и Европскиот парламент во новиот институционален циклус, идната повеќегодишна финансиска рамка на ЕУ, политиката за проширување и јакнењето на сајбер отпорноста и борбата против дезинформации.
Настанот беше свечено отворен од страна на маршалот на Сејмот на Република Полска, Шимон Холовниа, а Конференцијата се одвива под копретседателство на Агњешка Помаска, претседателка на Комисијата за европски прашања на Сејмот на Република Полска и Томаш Гродsки, претседател на Комисијата за европски прашања на Сенатот на Република Полска.
Во своите воведни обраќања ја нагласија важноста на парламентарната соработка и единството на европските институции во справување со заедничките предизвици. Тие упатија повик за продлабочена вклученост на националните парламенти во процесот на донесување политики на ниво на ЕУ и подвлекоа дека проширувањето останува клучен инструмент за стабилност и просперитет на целиот континент.
Пратеничката Мимоза Муса имаше свое обраќања на втората сесија од Конференцијата.
На втората сесија, каде се дебатираше за работните програми на европските институции и Стратешката агенда на ЕУ, Муса истакна дека приоритетите на Комисијата и Парламентот се од исклучително значење за земјите кандидати. Таа подвлече дека Северна Македонија активно работи на зелена транзиција, дигитализација, економски развој и борба против корупцијата, и ја потенцираше важноста на продолжување на политиката на проширување врз основа на заслуги.
Во рамки на своето учество, пратеничката оствари средба со голем број колеги и со амбасадорот на Република Северна Македонија во Република Полска, Јасмин Ќахил.
КОСАК претставува форум за соработка меѓу комисиите за европски прашања од националните парламенти и Европскиот парламент, кој овозможува редовна размена на информации, ставови и добри практики во однос на европското законодавство и политики. Форумот постои од 1989 година и има важна улога во вклучувањето на националните парламенти во процесите на донесување одлуки на ниво на ЕУ.
Македонија
Арсенал илегално оружје и муниција пронајдени кај скопјанец, поведена истрага

Јавен обвинител од Основното јавно обвинителство Скопје донесе Наредба за спроведување истражна постапка против едно лице за кривични дела – Неовластено изработување, држење, посредување и тргување со оружје и експлозивни материи од член 396 од Кривичниот законик.
При претрес во домот во кој престојувал осомничениот 29-годишник на улицата “Благоја Паровиќ” во Скопје, било пронајдено поголемо количество огнено оружје, муниција и експлозивни материи кои на граѓаните им се забранети и тоа: автоматска пушка со калибар 7,62×39 мм, четири рамки со 120 куршуми и уште дополнителни 779 куршуми боева муниција од истиот калибар наменета за испалување од автоматски, полуавтоматски пушки, митралези, пушкомитралези и репетирачки пушки. Биле пронајдени и 3 рамки со вкупно 51 куршум со калибар 9 мм Para и уште 136 куршуми од тој калибар наменети за испалување од автоматски огнени оружја и полуавтоматски пиштоли. Потоа биле откриени и 31 куршум боева муниција со калибар 7,65 мм, која исто така се користи за автоматски и полуавтоматски оружја, како и рачна граната од моделот РГД 5, која е од офанзивен тип со ефективно убиствено дејство од 15-20 метри и ранувачко дејство до 30 метри.
Покрај ова оружје, муниција и експлозивни направи кои се целосно забранети за граѓаните, тој во домот без дозвола држел и огнено оружје кое било преправено – пиштол ZORAKI М 906-B со кој било овозможено истрелување на проектили од куршуми од боева муниција со кал.7,65 мм, пневматски пиштол марка SIG SAUER M17 наменет за истрелување на топчести проектили со калибар 4,5 мм, полуавтоматски пиштол RANGER RA9, како и 51 куршум со калибар 9 мм P.A.K. наменета за предизвикување звучен-сигнален ефект при испалување од оружје за светлосно-звучна сигнализација. Целото пронајдено илегално оружје и муниција се одземени од осомничениот.
Поради опасност од бегство и можност да го повтори делото, јавниот обвинител до Судот достави предлог за определување мерка притвор за осомничениот.