Кандидатот за градоначалник на Општина Центар Горан Герасимовски, синоќа беше на терен „од врата до врата“ во Буњаковец, кадешто на центарци им го презентираше отчетот за сработеното во изминатите четири години, но и новата програма за работа која е направена на база на неговите темелни средби со сите граѓани, во секое маало, со секоја целна група – пензионери, млади, родители.

Герасимовски, рече дека од клучните проекти најважен е новиот дом за стари лица, кој ќе биде со практично минимална партиципација за сместување.

„Во Центар живеат многу пензионери и ова е на нивно барање. Сите знаеме колку е тешко и скапо сместувањето по приватните домови. Ќе ја зголемиме и финансиската поддршка од 2.500 на 5.000 денари за пензионерите во социјален ризик, но и низа проекти за социјализација, бесплатни екскурзии и нови содржини“, порачува Герасимовски.

Тој, истакнува дека за родителите се предвидени низа олеснувања.

„Најважното е што оброкот за сите ученици во целодневна настава ќе биде бесплатен, што значи заштеда до 2.500 денари месечно по ученик за секое семејство. Ќе продолжиме интензивно со реконструкција на училиштата и градинките за идеални услови за нашите најмили. Планираме изградба на нова градинка во близина на Клиничкиот центар „Мајка Тереза“. Оваа градинка ќе биде изградена според највисоки стандарди за безбедност и квалитет, по примерот на новата градинка „Пролет“ за која сите велат дека е најубавата градинка во државата. Ова многу ме радува затоа што успеавме да ја изградиме во еден мандат, со општински буџет. Со изградбата на новата градинка нова шанса за работа ќе добијат околу 25 воспитувачи, негуватели, стручни соработници и помошен персонал“, вели Герасимовски.

Герасимовски потенцира дека сака младите да стекнат здрави спортски навики уште од рана возраст и поради тоа, почнува со реалзиација на проект за изградба и реконструкција на два нови покриени базени, кои се лоцирани во ООУ „Димитар Миладинов“ и во ООУ „11 Октомври“.

„Како новина, би ја издвоил Центарската картичка што ќе им овозможи пристап до бројни попусти и поволности на жителите и на бизнис-заедницата од Центар. Тие ќе можат да ја користат во маркети и бутици, угостителски објекти, кина и театри, теретани и други спортски објекти, но и за медицински и козметички услуги. Со ова, ќе им овозможиме на центарци подобри услови и поволности во секојдневието“, додава Герасимовски.

Тој, најави и зголемување на надоместокот за новороденче за 50% и стипендии за талентираните ученици за 50%.

„Продолжуваме со реконструкција и на улиците, со цел поголема безбедност во сообраќајот за пешаците и возачите. Ова се само еден дел од проектите кои ќе почнеме да ги реализираме во новиот мандат. Нашата програма за работа ја пишувавме заедно со граѓаните. Слушавме, разговаравме, консултиравме експерти и ја подготвивме со конкретен план, за сите граѓани, за сите маала и населби. Верувам дека повторно граѓаните, сите ние ќе го направиме вистинскиот избор за Центар што го сакаме“, вели Герасимовски.

Претседателот на СДСМ Венко Филипче на вечерашната трибина „Се бориме за нашиот дом“ од Кавадарци потенцираше дека достоинството на земјоделците и лозарите е срушена поради неспособноста и погрешните политики на власта.

„Тиквешијата страда од оваа власт. Ако има еден сектор кој беше срушен целосно во изминатата година, тоа е земјоделието. Неспособноста на Мицкоски и Трипуновски го сруши достоинството на земјоделците, но најмногу на лозарите. СДСМ и јас лично се заложивме да помогнеме, предложивме конкретни мерки и закони, но власта ги одби. Одби затоа што оваа влада не се грижи за обичниот човек, за работникот, за оној кој произведува, се грижи само за крупниот бизнис. Но и таму не им оди работата, затоа што индустријата слабее и инвестициите паѓаат“, рече Филипче.

Тој од Кавадарци зборуваше за напорот на СДСМ да им помогне на земјоделците и од опозиција, предлагајќи дополнителна субвенција од три денари по килограм предадено грозје за сите лозари кои ќе го предадат грозјето кај регистрираните винарии од 1 август 2025 година, но од власта предлогот не беше прифатен.

„Реагиравме остро и на тоа што оваа година не ја објавија производната цена на грозјето, иако се законски обврзани да го сторат тоа. Со објавувањето законот кој го донесе СДСМ винариите ќе мораа да ја почитуваат методологијата која предвидува надомест од најмалку 25% над производната цена. И намерно не ја објавија, за да не се знае колку е точната цена на трудот на лозарите и колкави се нивните трошоци“, рече Филипче.

Тој исто така рече дека СДСМ предложи и укинување на одредбата која овозможува винариите да ја намалат цената за 8% доколу лозарите побараат брза исплата, што според Филипче е пракса која се користи за уцена и манипулација со трудот на производителите. Но и оваа мерка, како што кажа не била прифатена.

Александар Георгиевски, кандидат за градоначалник за општина „Илинден“ од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, се обрати и истакна дел од реализираните проекти во општина Илинден.

„Ја подобривме инфраструктурата, изградивме фекални канализации и ја модернизиравме водоводната мрежа. Јавните комунални претпријатија добија современа механизација и зголемен возен парк, за полесно да ги извршуваат своите обврски кон граѓаните на Илинден, бидејќи нашите граѓани заслужуваат современи услови за живеење. Илинден, е финансиски стабилна општина без долгови“, рече Георгиевски.

Георгиевски истакна дел од проектите на изборната програма.

„Ќе изградиме и реконструираме над 15км главни и локални улици и патишта низ сите локални места, ќе изградиме и реконструираме најмалку 5 локални моста, ќе продолжиме со изградба на пешачки и велосипедски патеки, како и со проектот светла општина Илинден каде што предвидуваме поставување на нови линии на улично осветлување, во делот на образованието, ќе продолжиме со инвестиции во инфраструктурата на нашите училишта, во рамки на основното училиште „Гоце Делчев“ ќе изградиме нова училишна зграда која ќе обезбеди современи и безбедни услови за учење, исто така, ќе изградиме и нова спортска сала во основното училиште „Браќа Миладиновци“ која ќе обезбеди современ простор за физичко образование, спортски активности и рекреација, во овој дел, важно е да се спомене и финансиската поддршка за секое ново прваче која за прв пат ќе ја доделиме со почеток од новата учебна година, на новиот мандат, ќе изградиме нова градинка“, истакна Георгиевски.

Го истакна еден од најзначајните проекти и тоа отворањето на полициска станица, која ќе обезбеди безбедна и мирна животна средина за сите граѓани.

„Како дел од нашите напори за зајакнување на јавниот ред и мир, ќе отвориме полициска станица, оваа Влада, предводена од ВМРО-ДПМНЕ, конечно оваа година со промена на законските регулативи овозможи отворање на полициска станица од општа надлежност во Илинден. Оваа полициска станица ќе овозможи побрза и поефикасна реакција на полицијата, како и поголема присутност во заедницата, што ќе создаде безбедна и мирна животна средина за сите граѓани“, рече Георгиевски.

Ги повика граѓаните да изберат чесност и посветена работа и да го заокружат бројот 9.