Претседателот на Собранието на Република Северна Македонија, Африм Гаши, се сретна со заменик-министерката за надворешни работи на Република Грција Aлександра Пападополу, со која разменија мислења за јакнење на соработката и дијалогот меѓу двете земји на сите полиња, како и за понатамошниот процес на пристапување на земјава во Европската Унија.

Тој се заблагодари за поддршката од Грција за процесот на евроинтеграција на земјава, по зачленувањето во НАТО, што е резултат, како што рече, на постигнувањето на Преспанскиот договор.

Заменик-министерката на грчкото МНР му го честиташе на претседателот Гаши изборот на функцијата, при што порача дека Северна Македонија има искрен пријател во Грција. Тоа, рече Пападопулу, е пораката што ви ја носам од целото лидерство на Грција – дека ние сме пријатели, соседи, сојузници, партнери во НАТО, а еден ден ќе бидеме и партнери и во ЕУ.

Претседателот Гаши заклучи дека двете земји се на мошне добар пат во унапредувањето на билатералните односи, со оглед на интензивната соработка и комуникација меѓу граѓаните, во делот на економијата и туризмот,со потенцијали за интензивирање во патната инфраструктура, енергетиката, образованието, културата и во сите други области од заеднички интерес.

Соговорниците се осврнаа и на соработката на ниво на парламенти, при што претседателот Гаши покажа интерес за организирање официјални посети и истовремено ја информира заменик-министерката Пападопулу дека во Собранието на РСМ во секој нов мандат се формираат пратенички групи за соработка меѓу двете земји.

Претседателот на Демократската унија за интеграција, Али Ахмети се сретна со заменик министерот за надворешни работи на Грција, Александра Пападопуло која е во посета на Скопје на маргините на состанокот на министрите за надворешни работи на Процесот за соработка во Југоисточна Европа.

Изборите, Охридскиот договор и легитимитетот, европската перспектива на земјата и потребата од натамошна поддршка од Грција, беа дел од разговорот меѓу Ахмети и Пападопулос.

Двете земји како сојузници и партнери играат клучна улога во обезбедувањето стабилност не само на Западен Балкан, туку и пошироко, додека PBEJL како иницијатива е добра платформа за дијалог и решавање на отворените прашања.

Грција отсекогаш била поддржувач на евроинтегративниот пат на Северна Македонија, како и сигурен сојузник во НАТО, беше истакнато на средбата.

Ахмети понатаму додаде дека очекува оваа поддршка за ЕУ и соработката во НАТО да продолжи и во иднина.

Европската интеграција на регионот е од големо стратешко значење и е од заеднички интерес за општата безбедност на Европа.

Двајцата соговорници изразија задоволство од динамиката со која се развиваат билатералните односи, особено во последните седум години по потпишувањето на Договорот од Преспа, со што беше изразена потребата од негово целосно почитување и спроведување од двете страни.

Ахмети го истакна духот на Охридскиот договор, чие почитување 23 години гарантира мир, безбедност, стабилност, социјална кохезија и евроатлантска иднина на државата.

Затоа, од исклучителна важност е мнозинската заедница да го почитува демократскиот легитимитет на втората заедница во државата и другите заедници во согласност со духот на Охридскиот договор.

Меѓународната заедница е гарант на Охридскиот договор и заедно не смееме да дозволиме да се врати назад, туку континуирано да го унапредуваме како што е нагласено во самиот текст на Охридскиот договор, се истакнува во соопштението.

Денеска министерот за внатрешни работи на Република Северна Македонија, Назим Буши оствари работна средба со делегација од Министерството за внатрешни работи на Република Косово, предводена од полковник Ракип Буњаку, еден од претседателите на Заедничкиот експертски комитет на Република Косово и Република Северна Македонија.

Буши пред започнување на официјалниот прв состанок на Заедничкиот експертски комитет на Република Северна Македонија и Република Косово, уште еднаш ја потврди важноста на потпишаниот Договор за соработка помеѓу Владата на Република Северна Македонија и Република Косово за заеднички гранични премини „Блаце – Елез Хан“ и „Јажинце – Глобочица“, кој кон крајот на 2020 година беше инициран од косовска страна, а прифатен за понатамошно разгледување од македонска страна. По заеднички консултации, преговори и заклучоци од двете Влади, на 18 септември 2023 година. Договорот беше потпишан од страна на двајцата министри за внатрешни работи на Република Северна Македонија и Република Косово, а по ратификување на истиот, на 8 февруари 2024 година, согласно член 7 точка 2 од Договорот, беше формиран Заеднички експертски комитет.

Буши се осврна на целта на предметниот договор, односно воспоставувањето на заеднички гранични премини „Јажинце-Глобочица“ за поедноставување и олеснување на движењето на лица, возила и влез и излез на празни товарни моторни возила и „Блаце – Елез Хан“ за поедноставување и олеснување на движењето на лица, возила и стоки. Тој потенцира дека интерес на Министерството за внатрешни работи на Република Северна Македонија е унапредување и продлабочување на билатералната и оперативна меѓународна соработка со Министерството за внатрешни работи на Република Косово, изразена, меѓу другото преку заложбите за подобрување и развивање на регионалната соработка, подобрувањето на меѓународните билатерални односи и продлабочување на прекуграничната соработка. И секако, со стапувањето на сила на овој Договор и неговото спроведување, значително ќе се обезбеди поуспешно спроведување во зацврстувањето на соработката во областа на граничната контрола и безбедност, и непречено движење на граѓаните од двете земји. Сето тоа, со цел продолжување на соработката на двете држави.

На денешниот прв состанок на претставниците на заедничкиот експертски комитет на двете страни, се очекува финализирање на техничкиот дел и реализирање на одредбите од Договорот.