Македонија
(Видео) Спасовски промовира нов превентивен проект за младите: „Кажи ‘не’ на дрогата, ‘да’ на животот!“
Министерот за внатрешни работи, Оливер Спасовски, денеска, во СУГС Гимназија „Јосип Броз Тито“ – Скопје го промовира новиот превентивен проект на Министерството за внатрешни работи за превенција од зависностите од дроги и психотропни супстанции кај младите со мотото: „Кажи ‘не’ на дрогата, ‘да’ на животот!“
Спасовски оствари работна средба со директорката на гимназијата, Силвана Кржовска, и градоначалникот на општина Центар, Горан Герасимовски, на која министерот потенцира дека за оваа проблематика е потребна континуирана и сериозна институционална активност на сите фактори што на еден или друг начин се инволвирани во развојот, образованието, воспитувањето и грижата за малолетничката популација.
„Односот што го градиме, како и посветеноста во превентивната работа со малолетната популација, со основците и средношколците, беа и се на самиот врв на приоритетите на МВР, вклучително и областа за која сме денеска овде во Гимназијата ‘Јосип Броз Тито, каде што го промовираме новиот превентивен проект за спречување на зависностите од дроги и психотропни супстанции кај младите“, истакна министерот Спасовски надополнувајќи дека полицијата, односно Министерството за внатрешни работи, веќе со години преку своите организациски единици од областа на превенцијата, а во соработка со другите стручни служби во доменот на недозволената трговија со дрога и психотропни супстанции, е целосно ангажирана и отворена за соработка во квалитетната едукација и заштита на нашите деца од опасностите и пороците на зависностите од дроги.
Министерот Спасовски потенцира дека покрај работењето на превентивен план, се продолжува и интензивната борба за сузбивање на нелегалната трговија со дрога.
„Нашата полиција во првото полугодие од 2023 година откри 372 кривични дела од областа на недозволена трговија со дроги и психотропни супстанции, при што кривично беа пријавени 440 сторители. Притоа во овие активности запленети беа 286 килограми марихуана, три килограми кокаин, седум килограми амфетамин, над 3.500 парчиња синтетичка дрога ‘екстази’, а дополнително беше разоткриена и лабораторија за производство на амфетамин, беа пресечени три транспортни канали за марихуана и сузбиени пет криминални наркотрафикантски групи. Македонската полиција беше дел и од меѓународната акција, која резултира со заплена на речиси 105 килограми кокаин во соседна Грција“, рече Спасовски.
Стратешката определба на македонската полиција е да биде реален и квалитетен сервис на граѓаните во согласност со концептот наречен community policing или познат и како „Полицијата во заедницата“, осмислен во соработка со Мисијата на ОБСЕ во Република Северна Македонија.
Покрај репресивниот дел, МВР е посветено и на превенцијата од ова зло, на подрачјата на секторите за внатрешни работи во целата држава преку организациски единици за превенција во соработка со Македонскиот полициски синдикат, а се разбира и со училиштата и со претставниците на локалната самоуправа. За новиот превентивен проект „Кажи ‘не’ на дрогата, ‘да’ на животот!“ изработени се едукативно-информативни летоци и плакати наменети за младите, а полициските службеници преку директна комуникација со младите ќе работат интензивно во наредниот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.
Македонија
Системот за видеонадзор на сообраќајниците „Безбеден град“ е поставен во Скопје, Куманово и Тетово
Министерот за внатрешни работи Панче Тошковски денес оствари работна средба на Единицата за оперативно-технички работи при Бирото за јавна безбедност во чија надлежност е системот за видеонадзор на сообраќајниците познат како “Безбеден град“.
Во рамки на посетата министерот беше запознаен со работата на оваа организациска единица, тековните активности и проблеми од делокругот на нивната работа.
„Во тој контекст беше истакнато дека во моментот ваков систем е поставен само во Скопје, Куманово и Тетово, има недостаток на покриеност на многу значајни крстосници, а голем дел од камерите и опремата која се користи во овој систем е технички застарена, а дел и неисправна. Исто така бев информиран за наградбата на системот која е во тек, а која опфаќа замена на постојните камери со нови и проширување на системот со нови камери на точки кои досега не беа покриени. Водено, во фаза на тестирање е системот за автоматско евидентирање на сообраќајни прекршоци за чие целосно ставање во функција потребно е да се направат и соодветни законски измени“, издвои министерот Тошковски од средбата и додаде:
Во иднина треба во континуитет да се инвестира во овој дел, да се прошири и во другите градови низ државата, како и да се распредели дополнителен кадар со цел оваа организациска единица да работи непречено во текот на 24 часа, бидејќи е од круцијално значење за обезбедување на поволна безбедносна состојба.