Поранешниот американски претседател Џо Бајден вчера им се заблагодари на своите поддржувачи за „изразите на љубов“ што му ги покажаа откако еден ден претходно објави дека боледува од рак, додека сојузниците на Доналд Трамп изразија сомневање дека помошниците на Бајден ги прикриваат неговите здравствени проблеми. „Ракот нè погодува сите. Ви благодариме што нè поддржувате со вашата љубов и охрабрување“, напиша 82-годишниот демократ во кратка порака на социјалните мрежи, споделувајќи фотографија со својата сопруга.

Неговите соработници во неделата објавија дека неколку дена претходно му е дијагностициран „агресивен“ облик на рак на простата кој се проширил и „метастазирал во коските“. Дијагнозата повторно ги разгоре шпекулациите дека помошниците на Бајден криеле информации за неговото влошено здравје за време на неговиот мандат.

„Да бидеме искрени“, рече американскиот потпретседател Џеј Ди Венс, додека Доналд Трамп помладиот, еден од синовите на сегашниот претседател, отиде дотаму што отворено ја доведе во прашање можноста за „прикривање“ на информации.

„Иако ракот на простата генерално се дијагностицира порано од другите видови за време на рутинските прегледи, не е невозможно да бил занемарен или брзо да се развил кај Џо Бајден“, изјави за АФП Отис Броули, професор по онкологија на престижниот универзитет Џонс Хопкинс.

„Не е невообичаено кај маж да биде дијагностицирана метастатска болест на простатата и покрај тоа што има редовен годишен преглед“, рече Броули.

„Не може да се исклучи можноста дека ова е исклучително агресивна форма која брзо се развила“, изјави онкологот Наташа Наун од францускиот институт „Гистав-Руси“. Ракот на простата е најчестиот рак кај машката популација и сочинува 15 проценти од сите видови на рак кај мажите. Во Соединетите Американски Држави, тоа е „втора водечка причина за смрт од рак кај мажите“, според Американското здружение за рак.

„Џо Бајден и неговото семејство ги разгледуваат опциите за лекување со неговите лекари“, соопшти канцеларијата на Бајден. Актуелниот претседател Доналд Трамп изјави дека е „тажен“ од веста и му посака на својот претходник „брзо закрепнување“, иако со години се потсмеваше на неговите физички и когнитивни способности.

„Џо е борец“, коментираше поранешната потпретседателка Камала Харис, а британскиот крал Чарлс, кој самиот боледува од рак, му испрати писмо на Бајден со поддршка, објави вчера Бакингемската палата.

Првата дама Меланија Трамп му се придружи на својот сопруг, претседателот Доналд Трамп, додека тој го потпиша законот со кој се криминализира објавувањето на таканаречена порнографија за одмазда и експлицитна „дипфејк“ содржина, објави Би-би-си.

Законот за отстранување (Take It Down Act) го криминализира објавувањето интимни фотографии, вистински или вештачки генерирани, на интернет без согласност на лицето и бара од технолошките компании да ја отстранат таквата содржина во рок од 48 часа.

Иако законот доби силна двопартиска поддршка, некои групи за дигитални права тврдат дека е премногу широк и би можел да доведе до цензура.

Првата дама се залага за овој закон откако нејзиниот сопруг го започна својот втор мандат, тврдејќи дека децата треба да бидат заштитени од злонамерно и навредливо однесување на интернет.

Ова е шестиот закон што Трамп го потпиша во својот втор мандат, при што претседателот во голема мера претпочита да ја спроведува својата агенда преку регулативи. „Секој што свесно дистрибуира експлицитни слики без согласност на друго лице ќе се соочи со казна затвор до три години“, рече Трамп.

Портпаролката на Белата куќа, Каролин Ливит, претходно изјави дека Меланија Трамп одиграла клучна улога во донесувањето на законот во Конгресот. Првата дама, која ретко се појавува во јавноста, го опиша новиот закон како национална победа што ќе им помогне на родителите и семејствата да ги заштитат децата од онлајн експлоатација.

„Овој закон е силен чекор напред во нашите напори да обезбедиме секој Американец, особено младите луѓе, да се чувствуваат подобро заштитени од злоупотреба на нивниот лик или идентитет“, додаде таа. Предлог-законот беше усвоен во Долниот дом на Конгресот со 409 гласови „за“ и 2 „против“ кон крајот на април, а Сенатот едногласно го одобри во февруари.

Меланија Трамп го искористи своето прво самостојно појавување во јавноста за да ги повика членовите на Конгресот да го усвојат законот во март.

„Тешко е да се гледаат млади тинејџери, особено девојчиња, како се борат со огромните предизвици што ги претставуваат злонамерните онлајн содржини, како што се ‘дипфејкс’“, рече првата дама за време на дискусијата на тркалезна маса за законот на 3 март.

Министрите за надворешни работи и одбрана од земјите-членки на Европската унија денес се состануваат во Брисел за да разговараат за континуираниот конфликт во Украина, одбранбените капацитети на блокот и зголемените тензии на Блискиот Исток. Министрите за надворешни работи треба официјално да го одобрат 17-от пакет санкции на Европската Унија против Москва поради војната на Русија во Украина, а ќе се фокусираат на таканаречената руска флота во сенка.

Станува збор за бродови што пловат под знамиња на трети земји, кои Русија ги користи за да избегне санкции.

Лични санкции како што се забрана за влез во Европската Унија и замрзнување на средства се предвидени во повеќе од десет случаи. Исто така, постојат планови за казнување на неколку десетици компании вклучени во избегнување на руските санкции.

Се очекува украинскиот министер за надворешни работи Андриј Сибиха да се сретне со своите европски колеги преку видео врска откако разговорите меѓу украинските и руските претставници за прекин на огнот предложен од Киев не дадоа конкретни резултати.

Министрите за надворешни работи ќе разговараат за најновите случувања на Блискиот Исток, вклучувајќи ги Појасот Газа и Сирија. Министрите за одбрана ќе започнат со дискусија за воената поддршка на Унијата за Украина, која е разорена од војна. Украинскиот министер за одбрана Рустем Умеров ќе се приклучи на разговорите преку видео врска, а се очекува генералниот секретар на НАТО, Марк Руте, лично да учествува во Брисел.

Министрите за одбрана ќе разговараат и за тоа како да се подобрат европските одбранбени капацитети и да се зголемат воените трошоци, вклучително и предлог за фонд за одбрана од 150 милијарди евра.