Македонија
АХВ: Монструозни се обвинувањата на „Анима мунди“ дека на милост и немилост се оставени свињите од фармата во селото Таринци

„Монструозни се обвинувањата на Здружението за заштита на животните ‘Анима мунди’ дека на милост и немилост, без храна, вода и елементарни услови за живеење се оставени свињите од фармата во селото Таринци, општина Карбинци, каде што во тек е спроведувањето мерки за евтаназија во согласност со донесените решенија на Агенцијата за храна и ветеринарство за справување со болеста африканска чума кај свињите, која беше потврдена на фармата. Како одговорна институција и за благосостојбата на животните, вклучително и за оние што се опфатени со овие мерки и кои треба да бидат евтаназирани, најодговорно тврдиме дека во соопштението на Здружението се изнесени лаги“, реагира Агенција за храна и ветеринарство.
„Евтаназијата на животните се спроведува по највисоки стандарди и строго дефинирани процедури, во присуство на официјални ветеринари, под чиј надзор се преземаат сите активности, почнувајќи од утврдување на здравствената и благосостојбата на животните што треба да се евтаназираат, па сè до преземањето на мерките за нештетно отстранување на убиените животни на фармата. Најодговорно тврдиме, животните што треба да се евтаназираат не се оставени сами да умрат како што грубо се тврди во соопштението. Во согласност со одредбите на Законот за заштитата и благосостојбата, на фармата во Таринци се врши редовен дотур во силосите за исхрана, животните се снабдени со доволни количини пивка вода и сместени се во соодветни објекти, кои се добро проветрени и осветлени.
Во услови на справување со епидемија, изнесувањето вакви невистини и манипулирањето со јавноста не оди никому во прилог и е за најголема осуда“, велат од Агенција за храна и ветеринарство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јавна дискусија за ДУП во Ѓорче Петров, граѓаните може да се вклучат

Град Скопје во рамки на постапката за изработка на новиот Генерален урбанистички план ГУП 2022–2032 година организира Јавна дискусија со цел вклучување на граѓаните во процесот на планирање и уредување на просторот.
Јавната дискусија за четвртите лоцирани во Општина Ѓорче Петров ќе се одржи на 15 август со почеток во 9 часот во салата на Град Скопје барака 13 и тоа за Градска четврт СЗ 20 (од 9 до 10 часот), C3 21 (од 10 до 11 часот), C3 24 (од 11 до 12 часот) и C3 25 (од 12 до 13 часот).
„Граѓаните можат да дадат свои предлози мислења и забелешки за време на јавната дискусија а истите можат да ги достават и писмено во архивата на Град Скопје барака 16 или електронски на адресата [email protected]“, се наведува во соопштението.
Град Скопје ги повикува сите заинтересирани граѓани и претставници на заедницата активно да се вклучат во овој процес од јавен интерес.
Македонија
Африм Гаши ги распиша изборите

Претседателот на Собранието, Африм Гаши, денеска ги распиша локалните избори, што ќе се одржат на 19 октомври .
Претседателот Гаши го потпиша Решението за распишување на осмите локални согласно член 12 став 4 од Изборниот законик, почитувајќи го рокот од 70 до 90 дена од распишување до одржување на изборите.
Со распишувањето на изборите, почнуваат да течат роковите за спроведување на изборните дејствија, согласно Изборниот законик и според календарот што треба да го донесе Државната изборна комисија.
Првиот круг за избор на градоначалници и членови на советите на 80 општини и на градот Скопје ќе се одржи на 19 октомври.
Вториот круг од изборите за градоначалници треба да се одржи на 2 ноември, во единиците на локалната самоуправа во кои изборите нема да завршат во првиот круг.
Македонија
МВР се огласи по случајот со началникот во Демир Хисар: Преземаме соодветни мерки

Во однос на реакциите на јавноста поврзани со постапувањето на полициските службеници за време на претресот, Одделот за внатрешна контрола, криминалистички истраги и професионални стандарди презема соодветни мерки и активности од своја надлежност за што дополнително ќе ја известиме јавноста.
Ова го соопшти Министерството за внатрешни работи во врска со видеото што беше објавено на социјалните мрежи на кое началник бара директорката на средно училиште на носилка на Брзата помош да биде однесена на информативен разговор во полициска станица. Од Обвинителството, пак, соопштија дека имало налог за претрес, но не и за приведување и итен распит.
Од МВР соопштија дека биле извршени претреси во врска со сомнение за кривично дело „Одземање или уништување службен печат или спис“.
„На 08.08.2025, по претходна пријава поради постоење основи на сомнение за сторено кривично дело по член 390 од Кривичниот законик – „Одземање или уништување службен печат или спис“ врз основа на наредба од Основен суд Битола, во периодот од 19:25 до 20:20 часот, полициски службеници од Надворешната канцеларија за криминалистички работи Демир Хисар, во присуство на адвокат, извршиле претрес во домот на М.Л. (57) од Демир Хисар. Исто така, со судска наредба, во периодот од 20:45 до 21:30 часот бил извршен претрес и во службените простории во средно училиште кои ги користи М.Л“, соопшти МВР.