Македонија
Во земјите од Западен Балкан има дезинформации и руско мешање, ЕУ треба да им помогне, вели француската министерка за Европа

Европската унија треба да им помогне на земјите да се спротивстават на Владимир Путин со испраќање јасна порака за нивните изгледи за приклучување кон ЕУ, изјави француската министерка за Европа, Лорен Бун за „Политико“.
ЕУ се подготвува за потенцијален бран на проширување што би можел да донесе дури осум нови членки, вклучително и Украина и шест балкански земји, во нејзините редови во наредните години.
Неколку од овие земји се главни цели на кампањите за руско влијание чија цел е да се поткопува поддршката на ЕУ и да се држат надвор од блокот – поради што ЕУ треба да биде „јасна и избалансирана“ за тоа што е потребно за да се приклучат, рече Бун, пренесе „Политико“.
„Во овие земји (кандидати) има многу дезинформации и мешање. Тоа е проблемот. Владимир Путин, покрај територијалните амбиции, има за цел и да ја ослабне Европската унија. Ова е фактор што треба да го земеме предвид и да се бориме против него“, рече таа.
Додаде дека ЕУ треба „да им помогне на овие земји да се борат против стратегијата за влијание (на Русија) што е можно повеќе, почитувајќи го нивниот суверенитет“.
Нејзините коментари доаѓаат една недела пред претседателката на Европската комисија, Урсула фон дер Лајен, да го одржи својот годишен говор за состојбата на Европската унија, во кој се очекува да го објасни темпото и начинот на планираното проширување на ЕУ.
Додека претседателот на Европскиот совет, Шарл Мишел, во својот говор рече дека ЕУ треба да има за цел да прими нови членки до 2030 година, Комисијата реагираше поинаку, велејќи дека секое пристапување останува „засновано на заслуги“.
Но, земјите-кандидати, заедно со новите членки на ЕУ, предупредуваат дека оставањето на земјите во „чекалната“ на ЕУ без јасен пат кон пристапувањето навистина ќе предизвика поделби и ќе го отвори патот за влез на Путин.
Висок дипломат на ЕУ за „Политико“ изјави дека од проевропските протести во Украина, Путин го гледа статусот на кандидат за ЕУ како „блескаво црвена“ цел за неговите обиди да ги поткопа Брисел и Западот. Молдавија, мала земја во сендвич меѓу Украина и Романија, се соочи со особено решителни напори од страна на Москва да ја поништи нејзината кандидатура за пристап во ЕУ.
Секое прекумерно одложување или статус од втор степен на патот кон целосен пристап во ЕУ ќе го охрабри Путин да се обиде да влијае на таквите земји, рече дипломатот, кој исто така го критикуваше предлогот на францускиот претседател Емануел Макрон за повеќебрзински пристап во ЕУ, во кој земјите ќе добијат делумни бенефиции пред стекнување полноправно членство.
Запрашана за таквите критики, Бун рече дека Макрон сака да им дозволи на земјите-кандидати да ги дефинираат нивните односи со ЕУ – како што некои направија со неприфаќањето на еврото или приклучувањето кон Шенген зоната за слободно патување – наместо ограничување на нивните избори.
„Доколку три земји сакаат да формулираат заедничка надворешна политика, дали мислите дека другите 24 би се чувствувале исклучени? Станува збор помалку за идејата да има граѓани од втор ред, а повеќе за задоволување на различни потреби без ограничување на амбициите да се направи повеќе“, рече Бун.
Додека фон дер Лајен го подготвува својот говор на 13 септември, а Комисијата подготвува извештаи за напредокот на земјите-кандидати подоцна во текот на годината, лобирањето за пристапување во ЕУ е во полн ек. Постојаните претставници на ЕУ минатиот петок имаа ручек со Фон дер Лајен и разговараа за проширувањето и внатрешните реформи.
„Најважно е постојано да се испраќа порака за местото на овие земји во ЕУ. Мора да се фокусираме на суштината. Се надеваме на прогресивна динамика каде што нема вообичаен замор и допрва ќе можеме да спроведеме реформи“, рече Бун.
И Тања Фајон за проширување на ЕУ
Министерката за надворешни и европски работи на Словенија, Тања Фајон оцени дека земјите од Западен Балкан треба со полна брзина да ја искористат можноста спомената на Бледскиот стратешки форум, во врска со проширувањето на ЕУ до 2030 година.
За изјавата на претседателот на Европскиот совет Шарл Мишел и дали двете страни навистина би можеле да бидат подготвени за проширување до тој датум, таа вели дека нејзиниот одговор на тие прашања е многу јасен.
„Можноста е тука и треба да ја искористиме со полна брзина. Треба да работиме на изнаоѓање доволна политичка волја во Западен Балкан за реформи и доволна политичка волја во ЕУ за проширување“, рече таа.
Како што вели, треба да се фокусираме на крајната дестинација, а притоа „да не го занемариме патувањето“.
– Кога станува збор за Европската унија, проширувањето на ЕУ несомнено е повторно на дневен ред. Геополитичкиот пејзаж јасно покажува дека нема алтернатива за проширувањето на ЕУ. Војната во Украина го зголеми апетитот за проширување и го потврди впечатокот дека проширувањето е стратешка неопходност за ЕУ. Едноставно кажано, сега е или никогаш – изјави таа.
Според Фајон, тоа секако не значи дека критериумите за проширување на ЕУ ќе бидат отфрлени и дека Западен Балкан би можел да влезе во унијата без нивно исполнување.
– Тоа значи дека ќе се посвети поголемо политичко внимание на регионот и дека од земјите од Западен Балкан ќе се бара што побрзо да ги исполнат критериумите. За ЕУ тоа значи само посветеност да го реформира процесот на одлучување и да се подготви во институционална и финансиска смисла на ЕУ – изјави таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Избегната катастрофа кај Брезница, пожарот се движи кон Козјак

Денес се регистрирани десет пожари на отворен простор, информира директорот на Дирекцијата за заштита и спасување (ДЗС), Стојанче Ангелов, предупредувајќи дека бројката може да се зголеми до крајот на денот.
Ангелов упати нов апел до граѓаните, особено до земјоделците и сточарите, да бидат исклучително внимателни додека ги извршуваат своите активности во овој критичен период.
Најтежок за гаснење и натаму е пожарот што со денови гори во „Јасен“. Според Ангелов, едниот крак бил ставен под контрола во ноќна битка со огнот, при што била спречена негова експанзија кон селото Брезница.
„Не дозволивме пожарот да премине преку шумски пат, со што понатаму ќе беше загрозено селото. Исчистени беа дрвјата долж патот и линијата беше гаснета целосно. Благодарение на Единицата за брзо распоредување (ЕБР), пожарникарите од Македонски Брод и вработените во ‘Јасен’, овој крак е стопиран“, изјави Ангелов.
Тој додаде дека состојбата на другата страна на гребенот, кон езерото Козјак, е многу потешка поради непристапниот терен. Таму пожарот се движи, а очекувањата се дека ќе биде стопиран кај карпестиот предел, а за таа цел таму поставени се надлежните служби.
Покрај „Јасен“, активни пожари се регистрирани и во Лозово, каде што гори шумска површина, во Долнени – со пожар на ниска вегетација, како и во Куманово, во атарот на селото Липково, каде што активни се два пожари, од кои едниот е реактивиран.
Македонија
Кузеска: Властa ја пропушти шансата за фер изборен законик

Жалиме што власта ја пропушти шансата да се обезбеди изборна рамка која е фер, праведна и прифатлива за сите, изјави портпароката на СДСМ, Богданка Кузеска за изборниот законик.
„Пред ЗКП направивме координација и сите партии освен ДУИ поддржаа 0,5 за независните. Се ризикува изборите да се претворат во хаос. Мора многу внимателно да се разгледаат сите правни аспекти. Жалиме што се пропушти шансата да се стави рамка која беше добра и прифатлива за сите“, изјави Кузеска одговарајќи на новинарско прашање.
Македонија
ВМРО-ДПМНЕ: СДС да го праша Филипче дали се живее лошо во Македонија и од каде му се парите за забави на јахта со Заев

СДС пред да зборува за економските политики и за тоа како се живее во државата, нека го праша Филипче како живее, бијдеќи тоа што го збори СДС, а Филипче го прави не соодветствува едно со друго, реагира ВМРО-ДПМНЕ на прес-конференцијата на која СДСМ побара покачување на минималната плата и платите во сите сектори.
„Нека каже Филипче како со лекарска и пратеничка плата, се стига до јахти, облакодери и акции во авиокомпании, па да ја раководиме економијата на државата во тој правец. Секако, ако е легално и законски начинот на кој ги заработил парите.
Кога се зборува за економија и животен стандард, СДС треба да се скрие и да молчи. Од земја на раб на банкрот, зголемени сметки, плати кои стагнираат и не се исплаќаат во време на СДС, за една година го сменивме начинот на живеење. Сега, граѓаните имаат повисоки плати, пензии, нови работни места, земјоделците добиваат субвенции.
Разликата е јасна. Со СДС се крадеше, а сега со ВМРО-ДПМНЕ се градат темелите на промените“, се додава во партиската реакција.