Скопје
Општина Аеродром: Непријатниот мирис и чад што се шират во Аеродром доаѓаат од околината на градот, апелираме до надлежните итно да го решат проблемот
По реакциите од страна на граѓаните на општина Аеродром за непријатниот мирис што се шири на територијата на општината, општинските инспектори вчера попладне излегоа на терен, при што затекнаа пожар во близина на препумпната станица „Лисиче“, а тој беше веднаш локализиран од страна на противпожарната служба. Но, овој пожар не претставува причина за чадот што се ширеше на територија на општина Аеродром, велат од Општината.
„Воедно, од нивна страна беше констатирано дека чадот и мирисот се предизвикани од пожари што доаѓаат од други општини во градот Скопје и околината. Во насока на решавање на проблемот, а со оглед на тоа дека надлежностите на општинскиот инспекторат се само на нашата територија, Општина Аеродром во неколку наврати реагира за нивно гаснење“, соопштува општина Аеродром.
Од Општината уште еднаш ги повикаа надлежните служби да ги преземат сите неопходни мерки за решавање на проблемот.
Општина Аеродром и понатаму стои на располагање за решавање на сите проблеми што се во надлежност на Општината, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Градоначалникот Ѓорѓиевски разговараше телефонски со 50 жители на Кисела Вода: „Мојот тим ги запишува барањата“
Градоначалникот на Кисела Вода, Орце Ѓорѓиевски денот го поминал во својот кабинет каде телефонски разговарал со повеќе од 50 граѓани за нивните проблеми, потреби и идеи Информираше дека барањата се евидентирани и веднаш ќе се пристапи кон решавање, а сите останати граѓани кои се соочуваат со некаов проблем, можат да се јават на 02/2785400 и да закажат средба.
„Нема одмор – се работи и во сабота Од рано наутро сум во мојот кабинет каде што досега остварив телефонски разговор со повеќе од 50 мои сограѓани, кои имале потреба или оставиле свој контакт на службите од општината. Мојот тим ги запишува барањата и веднаш пристапуваме кон нивно решавање.
Морам да споделам дека ме радува тоа што некои граѓани немаат апсолутно никаков проблем, туку им треба само пријателски разговор во кој ќе споделат и некоја идеја од која ќе произлезе проект во иднина.
Има и такви кои се пријатно изненадени и велат дека во минатото не можеле никако да стигнат до градоначалникот, а не пак лично да ги побара телефонски. Приемот е многу позитивен и за мене тоа е најголемото признание дека сме на добар пат.
Останувам тука да разговарам или остварам лична средба со секој оној кој има потреба, во мојот кабинет или надвор, на пријателско кафе.
На проблемите ќе им погледнеме во очи и заеднички ќе ги решаваме. Секогаш за мојот народ“, изјави градоначалникот Орце Ѓорѓиевски.
Скопје
Град Скопје: Не сме надлежни за постапување во случаите со змии
„Поврзано со дезинформациите пласирани во јавноста, а во врска со последниот случај на појава на змија во Идризово, ја известуваме јавноста дека со Законот за Град Скопје е прецизно утврдено чии се надлежностите за дезинсекција, дезинфекција и дератизација, односно Град Скопје нема надлежност за дератизација или постапување во случаи со змии или други влекачи или глодари“, велат од Град Скопје.
„Во член 15 став 1 точка 4 од Законот за Град Скопје јасно е утврдена обврската на општините во градот за дератизација и дезинфекција, односно десетте општини се надлежни за дератизација и дезинфекција на населените места на својата територија.
Дератизација е збир на процедури кои се спроведуваат со цел да се уништат опасни штетници и можни носители на одредени заразни болести. Дезинфекцијата е постапка насочена кон уништување на најголемиот број на несакани микроорганизми со различни физичко-хемиски средства.
За појаснување со член 10 став 1 точка 4 од Законот за Град Скопје, утврдена е единствено надлежноста на градот за дезинсекција, како збир од процеси кои се преземаат за сузбивање на инсектите“, се наведува во соопштението на Град Скопје.
Скопје
Посебен режим на сообраќај во Скопје в сабота поради „Парадата на гордоста“
Утре во 17.00 часот ќе се одржи настанот „Парада на гордоста“ во централно-градско подрачје во Скопје.
Од тие причини, Одделението за безбедност на патниот сообраќај при СВР Скопје, почнувајќи од 15.00 часот, ќе преземе мерки за посебен режим на сообраќај во централното градско подрачје.
МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива настанот.