Свет
(Видео) Вознемирувачки снимки од Либија: болниците не можат да ги примат жртвите од разорните поплави, улици полни со тела
Бројот на загинати во разорните поплави во градот Дерна во источна Либија драстично се зголеми. Во соопштението за медиумите, Министерството за внатрешни работи наведува дека загинале 5.300 луѓе, додека илјадници се водат како исчезнати.
На социјалните мрежи се појавија видеа од тела расфрлани по улиците во близина на болницата, која не може да прими толку многу мртви.
🚨ALERT – After devastating flooding in Libya over 2000+ people reported DEAD and over 10, 000+ reported to be missing due to two dams collapsing from the Storm Daniel 💔🙏#Libya #Flood #Derna #StormDaniel#Emergency #Fema #Africa pic.twitter.com/YAgoVHhnLw
— T R U T H P O L E (@Truthpole) September 12, 2023
„Улиците се полни со тела“, се вели во описот на видеото, снимено во градот Дерна.
„Локалните спасувачки тимови ја продолжуваат потрагата по исчезнатите лица“, изјави Мохамед Аболмоса, портпарол на министерството и повика на „меѓународна интервенција за помош во спасувачките напори“.
The streets are filled with corpses. 💔🇱🇾
Exclusive footage shows the overcrowded hospital sidewalks in the Libyan city of Derna with the bodies of flood victims that have struck the country.#Libya #إعصار_دانيال #انقذوا_الشرق_الليبي #ليبيا pic.twitter.com/GTGULYckDr
— Algeria Mix II (@AlgMiix) September 12, 2023
Преживеаните од поплавите во Либија претходно опишаа дека слушнале експлозија кога една од двете брани во Дерна пукнала и цунами го зафатил градот, а водата се искачила на третиот кат од зградите. Некои избегаа скокајќи од покрив на покрив, други со часови останаа во своите поплавени станови, додека водата речиси стигна до таванот, стои во написите.
На влезот во Дерна, град со 100.000 жители во источна Либија, група преживеани побараа засолниште откако нивните домови беа уништени. Многумина беа во пижами и влечки, бидејќи немаа време да се пресоблечат: трчаа најбрзо што можеа за да се спасат.
Раџа Саси (39) побегнал со сопругата и ќерката кога водата стигнала до горниот кат од нивната куќа. Сите други членови на семејството беа убиени.
„Прво мислевме дека е само силен дожд, но на полноќ слушнавме огромна експлозија. Браната пукна“, рече тој, додавајќи дека улиците во центарот на градот се полни со мртви.
Претседателскиот совет на Либија во понеделникот апелираше до соседните земји и меѓународните хуманитарни групи да се соберат во областите погодени од поплавите во источниот регион.
Други градови и населени места погодени од уништувањето за време на викендот се Бенгази, Бајда, Ал Марџ и Суза.
Абдул Хамид Дбеибех, шеф на либиската влада со седиште во Триполи, ги прогласи сите области погодени од смртоносните поплави за зони на катастрофа и прогласи тридневна национална жалост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лидерот на Хезболах: Непријателот ги премина сите црвени линии, сакаа да убијат 4.000 луѓе одеднаш
За време на телевизиско обраќање, лидерот на Хезболах, Хасан Насралах, детонирањето на пејџери и воки-токи низ Либан го нарече „терористички чин“ и изјави дека „непријателот на Израел ги преминал сите црвени линии“ со намера да убие 4.000 луѓе во еден момент.
Тој призна дека на Хезболах му бил зададен тежок удар, но подвлече дека тоа „нема да го скрши“ отпорот и дека операциите во јужен Либан нема да престанат додека не заврши војната во Газа.
Насралах на почетокот рече дека настаните во изминатите два дена го навеле да го одржи говорот. Тој објасни дека планирал да ја претстави својата анализа и извештај за борбите во изминатата година на 7 октомври, но дека она што се случило во изминатите 48 часа „ја барало оваа порака“.
Тој им изрази сочувство на паднатите на фронтот во јужен Либан и на загинатите како последица на експлозиите, а на повредените им посака брзо закрепнување. Тој им се заблагодари на лекарите, официјалните лица и на сите кои помогнаа во лекувањето на жртвите од нападот и на луѓето кои даруваа крв за повредените и ја поздрави солидарноста и единството на народот во земјата.
Тој подвлече дека експлозиите се случиле во болниците бидејќи пејџерите ги користеле и медицинските работници, како и во аптеките, маркетите, продавниците, куќите, автомобилите и на улиците каде што имало многу цивили.
Насралах изјави дека Израел имал за цел да убие „4.000 луѓе одеднаш“.
„Тоа беше намерата на непријателот и ова е обемот на нивниот криминал. Како да го наречеме овој вид криминална активност? Дали е тоа голема операција? Дали е тоа геноцид? Дали е тоа масакр?“, рече тој.
Тој призна дека на Хезболах му бил зададен „многу тежок“ удар, опишувајќи ги нападите како „невидени“ во Либан. Тој рече дека се формирани истражни комисии кои ќе проучат како се случиле експлозиите и дека ќе ги чекаат резултатите од истрагата.
„Претрпевме многу тежок удар. Но, ова е воена состојба“, рече тој.
Тој рече дека неговата група е свесна дека Израел има технолошка предност бидејќи е поддржан од САД и други технолошки суперсили, но храбро ќе се соочи со овој предизвикувачки момент со крената глава.
„Не може да бидеме скршени од овој удар, колку и да е силен. И можам верно и самоуверено да ве уверам дека овој тежок и невиден удар не нè клекна – и нема“, подвлече тој.
„Јасно велам: без разлика какви се последиците, без разлика на жртвите, без разлика на сценаријата, отпорот во Либан нема да престане да го поддржува отпорот во Газа и Западниот Брег и сите повредени на окупираните територии“, рече Насралах.
Тој изјави дека нападите низ Либан биле насочени кон инфраструктурата на Хезболах и дека тоа е обид да се предизвикаат поделби во неа.
„Нека знае непријателот дека тоа што се случи не ја разниша нашата вера, верба, решителност, подготвеност или инфраструктура. Напротив, нè направи порешителни, поробусни и истрајни. Ако целта на Израелците беше да не разделат од она што се случува во Газа, тоа не успеа“, подвлече тој.
Свет
По расправија извадил нож и солзавец, има повредени: тепачка во трговски центар во Германија
Неколку лица се повредени во тепачка што се случила денеска во трговски центар во Ерфурт, Германија, кога еден маж по расправија извадил нож и го расекол мажот.
Полицијата брзо пристигнала на местото на настанот и го евакуирала трговскиот центар, а според полицијата дошло до вербална, а потоа и физичка пресметка меѓу група лица, кои не се по потекло од Германија, пренесуваат германските медиуми.
Се се случило околу 15 часот и 30 минути, а еден од учесниците во тепачката извадил нож. Како што објави „Билд“, мажот (27) бил пренесен во болница поради сериозни повреди на раката, но неговиот живот не е во животна опасност.
Во трговскиот центар бил употребен и солзавец, па лекарска помош побарале и посетителите на центарот. Се пожалиле дека им горат очите и дека имаат проблеми со дишењето.
Полицијата соопшти дека е приведен маж (26), кој е осомничен дека извадил нож и ранил најмалку едно лице.
„Ве уверуваме дека не се работи за напад, немало опасност за граѓаните“, соопштија од полицијата.
Според написите,не се знае зошто дошло до тепачката, ниту точно колку лица се повредени во инцидентот.
Свет
Велика Британија ги повика граѓаните веднаш да го напуштат Либан
Британскиот министер за надворешни работи Дејвид Лами изрази длабока загриженост за зголемените тензии во Либан, повикувајќи ги британските граѓани да ја напуштат земјата.
Во телефонски разговор со либанскиот премиер Наџиб Микати, Лами ја изрази својата длабока загриженост поради растечките тензии и цивилните жртви во Либан.
Британскиот министер за надворешни работи рече дека разговарале за потребата од преговори за изнаоѓање решение за враќање на стабилноста и безбедноста преку Сината линија.
Лами исто така ги повика британските граѓани да го напуштат Либан, наведувајќи ги како причина зголемените тензии во регионот.
„Тензиите се високи и ситуацијата може брзо да се влоши“, напиша Лами на платформата X.
Во вторникот и средата во различни делови на Либан се случија експлозии на пејџери и радио уреди (воки-токи).
Во експлозиите загинаа најмалку 37 лица, а неколку илјади беа повредени.
Либанската влада и Хезболах го обвинија Израел дека го извршил нападот, а Хезболах вети одмазда.