За мене, шокантен беше податокот кога прочитав дека фирмата „Еуровија“ е главен подизведувач на Коридорот 8 на компанијата „Бехтел и Енка“. Компанијата „Еуровија“, како што беше во јавноста кажано, има основано сомневање дека на сомнителен начин добила и тендер од Министерството за надворешни работи за преуредување на спортскиот центар „Борис Трајковски“, а за потребите на настан што го организира министерот за надворешни работи на крајот од годината. И истата таа фирма или фирма поврзана со оваа фирма се јавува како еден донаторите на партијата Демократска унија за интеграција, вели претседателот на ВМРО-ДПМНЕ, Христијан Мицкоски, запрашан за коментар за тоа дека фирмата донатор на ДУИ, која доби тендер од МНР на чело со Бујар Османи, сега е избрана и за главен подизведувач конзорциумот „Бехтел и Енка“ за изградба на Коридорот 8.

И уште што е пошокантно за мене, додаде Мицкоски, е што во услови кога Македонија се наоѓа на најниско ниво во владеењето на правото, а на највисоко ниво на степенот на корупција и степенот на криминал, ние имаме фирма што на одреден начин пркоси пред претставниците на меѓународната заедница, кои и вчера беа таму, но претпоставувам и голем дел претставници од меѓународната заедница тоа го гледаат.

„И ако мислите дека тоа ние ќе го премолчиме, нема да го премолчиме, ако мислите дека ќе го заборавиме, нема да го заборавиме. Или ќе владее правото за сите, или нема да нè биде. Не може за едни да важи правото, а за други да не важи. Не може ВМРО-ДПМНЕ за ни приближно сличен случај да има замрзнат имот и да се влече по судски ходници повеќе од пет години, а Обвинителството да е немо за случај во кој и Државната комисија за спречување на корупцијата вели дека е случај од највисок вид криминал и корупција, односно компанијата донатор за која постои основано сомневање дека добива тендери на сомнителен начин. Или ќе важи за сите или нема да нè биде. И ако ова мислат, сите претставници на меѓународната заедница, дека ние ќе го премолчиме и ќе бидеме слепи при очи и глуви при уши, се лажат од каде и да доаѓаат“, истакна Мицкоски.

Посочи дека мора еднаш за секогаш законот во Македонија да владее за сите, а не некои да бидат заштитени, други да одговараат, на пример, и за кикиритки.

„Мора да владее еднаш и за сите законот во оваа држава. Не може одредени да бидат затитшени како бели мечки, а други да одговараат за кикиритки, тоа не може. Ако сакаме да нè биде. Ако не сакаме да нè биде, еве ќе гледате вакви примери“, рече Мицкоски.