Свет
Лавров со порака до Западот: Нема да ви успее
Одбивањето на Западот да се справи со проблемот на Корејскиот Полуостров ги блокира обидите да се протурка резолуцијата против Северна Кореја во Советот за безбедност на ОН.
Ова го изјави министерот за надворешни работи на Русија, Сергеј Лавров.
Рускиот министер изјави дека Западот префрла елементи на своите стратешки сили на југот на Корејскиот Полуостров.
„Веќе се во тек разговори за поседување нуклеарно оружје во една или друга форма на југот на Корејскиот Полуостров, во Јужна Кореја и во Јапонија. Нивното категорично одбивање да се вклучат во какви било политички мерки исклучува какви било понатамошни обиди да се протурка во Советот за безбедност резолуција за санкции“, рече Лавров.
Потсети дека претходните санкции против Северна Кореја беа усвоени во сосема поинаква геополитичка средина.
„Од моментот кога беше имплементирана последната резолуција, рековме дека нема да има повеќе санкции против Северна Кореја, а овој став го зазедоа и нашите кинески партнери. Пред сè, затоа што паралелно со мерките преземени од Советот за безбедност сите западни колеги ветија дека ќе тргнат политички по рутата и ќе ги решат хуманитарните прашања. Тоа беше уште една лага. Нè измамија нас, Кинезите и Севернокорејците“, нагласи рускиот министер за надворешни работи.
Тој додаде дека кога Американците сакале да усвојат друга резолуција минатата пролет, Русија не го дозволила тоа.
„Со нашите кинески пријатели подготвивме нацрт-резолуција насочена кон решавање на хуманитарните прашања, кои се многу сериозни во Северна Кореја. Подготвивме и резолуција насочена кон рестартирање на политичкиот процес со цел да се зајакне безбедноста во североисточна Азија. Сепак, Американците, заедно со Јужна Кореја, Јапонија, вклучително и Британците, Австралијците, вклучително и Нов Зеланд, се занимаваат со акумулација на оружје во тој регион и префрлање дел од стратешките сили на југот на Корејскиот Полуостров“, заклучи Лавров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Премиерката на Естонија: Немаме план Б ако Украина ја загуби војната
Естонската премиерка Каја Калас изјави дека Естонија нема план Б доколку Украина ја загуби војната.
„Не треба да се предаваме на песимизмот. Победата во Украина не е само територија. Ако Украина влезе во НАТО, дури и без одредена територија, тогаш тоа е победа бидејќи ќе биде ставена под чадорот на НАТО“, рече Калас во интервју за Би-Би-Си.
Владата на Естонија одвои повеќе од еден процент од естонскиот БДП за воена и финансиска помош за Украина.
„Ако секоја земја на НАТО го направи тоа, Украина ќе победи“, посочува Калас.
Естонија, мала балтичка држава која некогаш беше дел од Советскиот Сојуз, е уверена дека откако ќе завршат борбите во Украина, рускиот претседател Владимир Путин ќе го сврти своето внимание кон Балтикот, барајќи да ги врати земјите како Естонија под контрола на Москва.
Свет
(Видео) Поплави во јужна Германија, жителите евакуирани со хеликоптери
Невреме вчера и денеска погоди големи делови од јужна Германија, предизвикувајќи прекин на сообраќајот, а некои жители мораа да бидат евакуирани со хеликоптер.
Во областа на баварскиот град Аугсбург, жителите мораа да бидат евакуирани поради дефект на насип и брана, соопштија властите.
Поради поплавите, во прекин е железничкиот сообраќај меѓу главниот град на Баварија, Минхен, Брегенц во Австрија и Цирих во Швајцарија.
Во прекин беше и линијата меѓу Улм и Аугсбург, а меѓуградските возови на релација Штутгарт-Минхен беа пренасочени.
Жителите на баварскиот град Фишах, западно од Минхен, биле изнесени со хеликоптер од своите домови откако се излеа реката Шмутер.
Update zum Wehr#Hochwasser pic.twitter.com/lX5hrZp46M
— Bummibaer 🐻 🇺🇦 (@MrBummiBinBaer) June 1, 2024
Водостојот расте, дождот не престанува да паѓа. Прогласена вонредна состојба
Мештаните поинаку не можеа да ги напуштат своите домови, изјави портпаролката на окружните власти. Според полицијата, службите за итни случаи и чамците ќе ги преземат луѓето во поплавените домови. Неколку соседни окрузи прогласија вонредна состојба бидејќи дождот продолжува да паѓа и нивото на водата расте.
Во сојузната покраина Баден Виртемберг, западно од Баварија, ситуацијата брзо се влоши откако реката Ротум почна да се излева на неколку места.
Во малиот град Рајнштетен, 150 служби за итни случаи работат повеќе од 22 часа за да ја ублажат поплавата што се случи по пукањето на браната, изјави градоначалникот Филип Буеркл за ДПА.
Буеркл рече дека противпожарните служби од блиската област пумпаат вода од подрумот и дистрибуираат вреќи со песок. Досега е евакуиран само еден дом за стари и изнемоштени лица во кој престојувале 15 лица.
Училиште во селото Мекенбеурен, во близина на езерото Констанца, мораше да биде евакуирано откако локалната река проби вреќи со песок поставени околу него.
Германската метеоролошка служба предвиде дополнителни грмежи и до 80 литри дожд на метар квадратен во јужните делови на Германија. Невремето се очекува да продолжи и утре.
Свет
Пукање во западна Германија, ранети четири лица, напаѓачот е во бегство
Четири лица се ранети денеска во престрелка во Хаген, во западна Германија, а осомничениот сторител е во бегство, соопшти полицијата. Во потрагата бил вклучен и полициски хеликоптер.
Властите претходно потврдија за ДПА дека двете места на злосторството вклучуваат фризерски салон и блиска станбена зграда во Хаген, јужно од Дортмунд.
Полицијата е на местото на злосторството, а на граѓаните им се препорачува да го избегнуваат просторот околу местото на злосторството.