Економија
НБРМ: Клубот на истражувачите на Народната банка ја одржа својата 48. сесија: презентиран трудот што ја доби годишната награда
Клубот на истражувачите на Народната банка ја одржа својата 48. сесија. На сесијата, која се одржа виртуелно овој пат, учесниците имаа можност да ја проследат презентацијата на трудот награден со Годишната награда за млади истражувачи на Народната банка, со наслов „Поврат на акции, ризик и карактеристики на претпријатијата на пазарите во развој: Емпириски докази од Македонската берза“ од Александра Данева.
Сесијата ја отвори вицегувернерката на Народната банка, Ана Митреска. Таа посочи дека Народната банка преку поголем број активности и иницијативи дава поддршка и ја стимулира креативната научноистражувачка работа од областа на економијата и финансиите. Една од тие алатки е Годишната награда за млади истражувачи, која оваа година ѝ беше доделена на Александра Данева, авторка на трудот што беше презентиран на 48. сесија на Клубот на истражувачите. Трудот се одликува со конзистентност на тезите и истражува релевантна област, која се однесува на испитувањето на карактеристиките на фирмите што влијаат врз приносите на акциите со кои се тргува и моделирањето индекс на променливост за Македонската берза.
Данева посочи дека овој труд истражува кои карактеристики на фирмите влијаат врз повратот од акции и го пресликуваат индексот на нестабилност на Македонската берза, која е во подем. Покрај тоа, повратот на индекс и карактеристиките на фирмите се споредуваат со една развиена земја, како што е Словенија, за да се види дали пазарите во земјите во подем значително се разликуваат од веќе развиените. Анализата на овој труд е поделена на три дела и се заснова на податоци во периодот од 2017 до 2021 година.
Клубот на истражувачите е отворена платформа за презентација и разгледување научноистражувачки трудови, особено во доменот на монетарната политика и макроекономијата. На сесиите учествуваат аналитичари и истражувачи од научно-образовни и финансиски институции, студенти и други заинтересирани учесници или слушатели. Зачленувањето во Клубот е од отворен карактер и може да се направи преку барање за членство на следната електронска адреса: [email protected]. Членовите на Клубот добиваат редовни известувања за сесиите и активностите на Клубот на истражувачите.
Сесиите на Клубот се одржуваат четирипати годишно. Народната банка објавува повик до истражувачите за поднесување труд, кој може да биде и во работна верзија. Трудовите се работат во согласност со трендовите и стандардите на современите истражувања, односно со солидна емпириска анализа и систематизирани заклучоци од истражувањето. Следната сесија ќе се одржи во декември годинава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Димитриеска Кочоска: Да обезбедиме влез на поголем број учесници на Берзата, ќе работиме на развој на секундарниот пазар
Министерството за финансии и Македонската берза во наредниот период активно ќе работат на развој на секундарниот пазар за тргување со хартии од вредност со цел да се зголеми бројот на учесници и тие да го најдат својот интерес во тоа. Ова го порача министерката за финансии Гордана Димитриеска Кочоска на денешната 23. Годишна конференција на Македонската берза, што се одржува во Охрид.
„Берзата е место на кое се сретнуваат инвеститорите, место каде што се движи капиталот и затоа е многу важно да се создадат услови за влез на што поголем број учесници. Да го најдат интересот и правните и физичките лица, кои можат да вложуваат средства во алтернативни извори на финансирање коишто се нудат на Берзата, покрај она што е традиција кај нас, а го нуди банкарскиот сектор. Во таа насока, во наредниот период, заедно со Македонската берза, поактивно ќе дејствуваме, меѓу другото, и во развој на секундарното тргување на хартиите од вредност кое има повеќекратни придобивки. Имено, за примарниот издавач ќе има придобивка бидејќи ќе се зголеми интересот за инструментите што се ликвидни. За Македонската берза придобивката ќе биде зголемување на обемот на тргување, додека за имателот на хартиите од вредност предноста е во тоа што ќе поседува ликвиден инструмент којшто ќе може да го продаде во секое време, односно да го материјализира“, истакна министерката за финансии и додаде дека Берзата ќе се користи како примарен пазар за обврзници кои Министерството за финансии планира да ги издава во наредниот период.
Според министерката, соработката со Берзата е исклучително важна затоа што клучно за зголемување на интересот за тргување со хартии од вредност што ги издава Министерството за финансии е имателите на тие хартии од вредност да бидат сигурни дека можат во секое време да ги материјализираат на секундарниот пазар и на тој начин да обезбедат ликвидни парични средства.
Најави дека се работи на донесување Одлука за 23-тата емисија на обврзници за денационализација во вредност од 1,5 милиони евра, којашто ќе ја зголеми понудата на хартии од вредност со кои ќе се тргува на секундарниот пазар на Македонската берза. Инаку, вкупната вредност на претходно издадените 22 емисии на обврзници за денационализација изнесува 397 милиони евра.
Поздравувајќи ги позитивните резултати од работењето на Македонската берза во првата половина од оваа година, рече дека Министерството за финансии ќе продолжи со унапредување на регулативата со цел да се обезбеди дополнителен развој на пазарот на капитал.
Економија
Владата ги ограничува профитните маржи, Мицкоски oбјави дека одлуката е помината на седница
Одлуката на Министерството за економија за маржите е веќе помината на владина седница, ќе имаме вакви акции, кои ќе траат еден месец, еден и пол месец, два месеца, во кои бруто-профитот ќе биде ограничен до ниво до 10 проценти за да не ни се случуваат удари по стандардот на граѓаните, ова го изјави премиерот Христијан Мицкоски од Штип одговарајќи на новинарско прашање во врска со одлуката за замрзнување на маржите.
Деновиве, и министерот за економија, Дурмиши, објави дека наместо замрзнување на цените, ќе се ограничуваат профитните бруто-маржи на големо и мало.
„Има таму стотици продукти што ќе бидат опфатени и така континуирано ќе носиме мерки со кои ќе се обидеме да го подобриме стандардот на граѓаните и да ја олесниме живејачката, која и така е тешка“, одговори денеска Мицкоски.
Тој беше дециден дека одлуката за ограничувањето на маржите е помината на владина седница, а се очекува да ја објасни и министерот за економија на прес-конференција.
Инаку, според најавите, со мерката ограничена маржа до 10 отсто ќе бидат опфатени 100-ина производи, а планот според најавите е ваква мерка да има и во наредниот период, особено за време на празници.
Економија
Годишен раст од 9,1 отсто на вкупните депозити и од 7,5 отсто на вкупната кредитна поддршка во август
Анализирано на годишно ниво, вкупните депозити се зголемени за 9,1%, што се должи на зголемените депозити на двата сектора, со доминантен придонес на секторот домаќинства, извести Народна банка.
На годишна основа, вкупните кредити бележат раст од 7,5% како резултат на зголеменото кредитирање на двата сектора, коешто е поизразено кај кредитите на корпоративниот сектор.
Најновото соопштение за монетарните движења е достапно на линкот.