Регион
Курти: Убиен полицаец од Косово во Бањска, ова е терористички напад поддржан од Белград
Косовскиот премиер Аљбин Курти на Фејсбук објави дека ноќеска околу 03:00 часот во селото Бањска во Лепосавиќ била нападната косовската полиција, при што еден полицаец е убиен, а друг повреден, пренесува Косово онлајн повикувајќи се на Коха.
Според овие извештаи, загинатиот полицаец (А.Б.) бил со чин наредник, а повредениот припадник на граничната полиција е надвор од животна опасност.
„Во овој момент продолжува пукањето од огнено оружје од различен калибар кон нашата полиција. Напаѓачите се професионалци со маски и вооружени со тешко оружје. Го осудуваме овој криминален и терористички напад. Организиран криминал со политичка, финансиска и логистичка поддршка на официјален Белград ја напаѓа нашата земја. Владата на Косово и државните институции се подготвени и во координација да одговорат на криминалот и криминалците, теророт и терористите“, рече Курти.
Се огласи и претседателката Вјоса Османи, која ги обвини „српските криминални банди“ за нападот врз полицајците.
Косовската полиција во соопштение изнесе детали за случајот. Како што прецизираат, единицата за брза интервенција на граничната полиција околу 02:34 часот забележала дека на влезот во село Бањска, односно преку мостот се поставени два поголеми камиони, без регистарски таблички и дека патот е блокиран.
„Единиците на Полициската станица Звечан, по добиеното известување, реагирале во врска со случајот и со три единици тргнале во правец на локацијата и веднаш штом пристигнале во близина на местото каде што била пријавена блокадата, наишле на отпор, кога од повеќе различни позиции било пукано кон нив од арсенал огнено оружје, вклучително и рачни бомби и гранати, а од престрелката биле застрелани двајца полицајци“, соопшти полицијата.
Единиците, додаваат дека реагирале во самоодбрана и успеале да го одбијат првичниот напад за да создадат услови за пружање помош и повлекување на застреланите колеги.
„Повредените полицајци се извлечени од локацијата и пренесени во Регионалната болница во Јужна Митровица, каде лекарот констатирал смрт на еден од тешко повредените полицајци, додека другите двајца полицајци се надвор од животна опасност“, додаваат од полицијата.
Како што наведуваат, на терен биле активирани сите релевантни полициски единици, „кои од време на време биле напаѓани со огнено оружје од различни позиции, од организирани и вооружени групи“.
„Косовската полиција во соработка и координација со надлежните институции и правосудни органи ги презема своите дејствија со цел да се зачува редот и јавната безбедност, како и да се изведат сторителите на напади врз полициски службеници пред правосудните органи“, додаваат оттаму.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Србија пронајдени три деца киднапирани во Романија
Киднапирани деца од Романија, денеска биле пронајдени во српскиот град Ниш. Министерот за внатрешни работи Ивица Дачиќ денеска за ова ја информирал министерката за внатрешнира работи на Романија.
Случајот во последните денови ја брануваше романската јавност.
Имено, министерот Дачиќ ја информирал својата романска колешка дека припадниците на Министерството за внатрешни работи, Управата за криминалистичка полиција, Службата за сузбивање криминал и Техничката управа, во соработка со Полициската управа во Ниш, постапувајќи по пријава за кривично дело киднапирање извршено во Романија, уапсен е романски државјанин А.М.(1970) поради сомнение дека ги грабнал неговите три малолетни деца, исто така романски државјани на возраст од 11, 9 и 8 години.
Регион
Мајката на убиеното момче во „Рибникар“: Зошто го уби мојот син единец?; Коста: Се чувствував отфрлено
Во зградата на Специјалниот суд во Белград денеска продолжува судењето на Милјана и Владимир Кецмановиќ, родителите на момчето Коста, кое уби девет ученици и чуварот во основното училиште „Владислав Рибникар“. Момчето убиец и денеска продолжува да дава исказ во постапката. Со оглед на тоа дека за време на масакрот имал 13 години, нема да сноси кривична одговорност за своето дело.
Денеска му поставуваат прашања родителите на убиените деца. Судењето е затворено за јавноста, пренесуваат тамошните медиуми.
„Мајка ми секогаш бараше да бидам најдобар. Се лутеше и викаше кога не бев најдобар. Бидејќи секогаш бараше повеќе од мене, јас ѝ се лутев. Тоа нејзино однесување влијаеше да го направам тоа што го направив. Да го немав пиштолот на татко ми, немаше да го сторам ова“, изјави денеска пред судот Коста К., пренесуваат српските медиуми.
Кога Сузана Станковиќ-Чикиќ, мајката на убиениот Андрија Чикиќ, го прашала зошто ѝ го убил синот единец, тој одговорил: „Се чувствував отфрлено“. Во тој момент речиси сите во судницата плачеа, пишува „Телеграф“.
Огњен Божовиќ, адвокатот на семејствата на оштетените, зборуваше за постапката пред судењето.
„Денеска, треба да продолжи сослушувањето на малолетниот убиец, имаме можност да поставиме дополнителни прашања. Ќе се обидеме да разбереме како се случија настаните, да ги разгледаме темите, кои биле мотивите и што сакал да постигне. Се надевам дека дополнително ќе утврдиме одговорност и ќе разјасниме зошто тоа се случило, верувам дека одиме кон осуда, неговото сведочење не е пресудно во таа смисла, но мислам дека е значајно“, рече адвокатот и додаде:
„Се надевам дека денеска ќе добиеме повеќе дополнителен материјал, кој ќе го потврди нашиот став. Разбирам дека постои легитимен интерес на јавноста и уште од првиот ден ја застапував тезата дека судењето треба да биде отворено за јавноста, но со оглед на судската одлука за изземање, сметам дека секое истекување информации треба да се истражи и санкционира. Со тоа се создава амбиент во кој ние како адвокати не можеме да ги коментираме насловите во порталите и весниците, а во јавноста завршуваат разни детали. Ова ја отежнува нашата работа“, рече тој.
Регион
Вучиќ: Никогаш немало поголем притисок од разни надворешни служби
Претседателот на Србија, Александар Вучиќ, денеска, во безбедносно-информативната агенција (БИА), која го прославува својот ден и 22 години работа, изјави дека никогаш немало поголем внатрешен притисок од разни надворешни служби, кои сакаат да го пренасочат патот на Србија и нагласи дека патот на Србија е единственото добар пат.
Вучиќ во својот говор рече дека никогаш не почувствувал таков притисок однатре.
„Бидејќи сите играчи на разните служби, западни и источни, се под притисок да ги постигнат резултатите што ги бараат странските служби. Речиси е невозможно да го издржам тој притисок. Тоа е на секојдневно ниво на моите колеги и пријатели, и од едната и од другата страна, сакајќи да го свртат патот на Србија некаде на друго место или како што сметаат дека е во вистинската насока, а таа вистинска насока е или овде или таму, а не она што го зацртавме со поддршка на народот, кој е српската насока“, нагласи Вучиќ.