Македонија
ЦУК: Иако вчера имаше 10 пожари на отворено, за последните три дена просекот е по 30 дневно

Според информациите што стигнале до Секторот за операции и координација во Центарот за управување со кризи (ЦУК), во текот на вчерашниот ден биле регистрирани 10 пожари на отворен простор и противпожарните тимови сите пожари до утрово ги изгаснале.
Бројката од 10 пожари изгледа мала за разлика од неделата кога имаше и беа изгаснати 45 пожари, односно за викендот, за два дена – во саботата и во неделата имаше и беа изгаснати 71 пожар. Практично, просекот за последните три дена е по 30-ина дневно пожари на отворено на целата територија на државата, велат од ЦУК.
Вчерашните пожари, при што горела сува трева, ниска вегетација, мешана шума и борова шума, биле во општините Долнени, Гази Баба, Липково, Чучер Сандево, Прилеп, Струмица, Велес, Куманово и во општина Крива Паланка.
Вчера, во 17.56 часот. е добиена информација за палење запаливи материјали на улицата Иван Хаџиниколов во близина на ООУ „Рајко Жинзифов“ во населбата Драчево во општина Кисела Вода. Како последица на пожарот се ширеле густ чад и неподнослива миризба. За оваа ситуација, РЦУК – Скопје веднаш ги известил МВР и Инспекторатот за животна средина на Град Скопје за нивна понатамошна постапка.
Според „Железници на Република Северна Македонија – транспорт“ АД Скопје, поради пожар на отворен простор и опожарување на железничките прагови, железничкиот сообраќај не се одвива на пругата Велес – Битола.
ЦУК апелира до граѓаните, и покрај влажните метеоролошки услови, да се воздржат од палење огнови на отворено и да не палат отпадоци, дури и во дворовите бидејќи ветерот многу лесно може огнот да го пренесе на околната вегетација која сè уште е сува, а е и многу нарасната оваа година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Спасовски: Градоначалникот на Крива Паланка лажеше дека има цијанид 100-тици пати над дозволеното

Градоначалникот на Крива Паланка лажеше дека во водата во Крива Паланка има цијанид 100-тици пати над дозволеното, за да шири паника и манипулира пред избори, кажа денеска на прес-конференција Емил Спасовски, пратеник на ВМРО-ДПМНЕ.
„Сашко Митовски свесно ги лажеше граѓаните и на Крива Паланка и на целата држава дека загадувањето на водата во Крива Паланка со цијанид е 100-тици пати над дозволеното. Анализите кои ги објави Државниот инспекторат за животна средина го покажуваат спротивното и го демаскираат трулиот обид на Митовски да манипулира. Мизерно е како Митовски не се колебаше да манипулира со најчувстителната тема за граѓаните – безбедноста на водите и почвата, само за да шири паника и ќари некој ситен политички поен пред избори“, рече Спасовски.
Пратеникот го повика Јавното обвинителство да поднесе кривична пријава против Митовски, за ширење паника.
„Дејствијата на Митовски се дотолку поголеми што тој е носител на јавна функција, која во дел од јавноста може да создаде краткотраен привид дека тој ја говори вистината, и со тоа да предизвика огромен страв. ЈО треба да ги земе во предвид овие околности, но и стварниот ефект предизвикан од паниката која ја рашири Сашко Митовски и да поднесе кривична пријава против него“, истакна Спасовски.
Македонија
(Видео) Кузеска: Со Тошковски на чело, МВР е во хаос – бодигарди аздисуваат на улиците како на див запад

Со Панче Тошковски на чело на МВР хаос се случува по македонските улици, безбедноста е загрозена, нема никаков ред и поредок, кажа денеска на прес-конференција Богданка Кузеска, портпаролка на СДСМ.
„МВР се сведе на тоа да не може ниту еден џип неправилно паркиран да санкционира. Скандалот во Дебар Маало по којзнае кој пат го потврди нефункционирањето на МВР ама го покажа и каубојското аздисување на бодигардите на функционерите на власт. Двајца полициски службеници, обезбедувачи на претседателката на државата лажно тврделе дека погрешни паркираното „порше“ на Срѓан Керим е службено. Тие барале „поршето“ на Керим да не биде кренато од пајакот, тие поттикнале неказнивост. Да не беше реакцијата на младите и овој случај ќе беше заташкан. Но по бурните реакции МВР беше принудена да поведе дисциплински постапки“, рече Кузеска.
Таа потенцираше дека во последниве 9 месеци, како на лента се редат скандал по скандал со телохранители на највисоките државни функционери.
„Од обезбедувањето на премиерот Мицкоски, едниот оддавал државни тајни другиот нападна полицаец попречувајќи акција против дрога. Обезбедувањето на Гаши направи инцидент на скопскиот аеродром, извади пиштол, турна и нападна полицаец. Сега обезбедувањето на претседателката вмешана во скандалот во Дебар Маало. Ова не се изолирани инциденти – ова е системски распад на безбедносниот апарат! Полицајци кои треба да не чуваат – работат за интересите на криминалци, моќници и тајкуни. На чело на сите нив е Панче Тошковски – како министер кој го дозволи овој распад во МВР. Сите овие инциденти отвораат сериозни прашања за целосна нефункционалност за безбедносниот апарат, за можната поврзаност на луѓе од власта со криминални структури. Нема ред и поредок, нема одговорност. Вака не може! Одговорност мора да има и таа мора да започне со најодговорниот а тоа е министерот Панче Тошковски“, истакна Кузеска.
Македонија
(Видео) Манасиевски: Левица и Апасиев во директен договор со Извршител и банка купиле конфискуван имот за 3 пати пониска цена

Левица и Апасиев во директен договор со Извршител и банка купиле конфискуван имот за 3 пати пониска цена, кажа денеска на прес-конференција Валентин Манасиевски, член на ЦК на ВМРО-ДПМНЕ.
„Левица и Апасиев се фатени ин флагранти во зделката на деценијата, за која многу светски инвеститори можат да им позавидат. Само Левица и Апасиев можат да купат деловен објект одземен преку извршител од некој граѓанин или фирма кои не можеле да го враќаат кредитот, за 3 пати пониска цена од пазарната. Левица и Апасиев кои декларативно беа против Извршителите, не се колебаат да купат одземен имот, од истите тие Извршители“, рече Манасиевски.
Според него, уште поголем проблем е ставот на Левица дека Извршителот немал ништо со преговорите, туку дека тие се договориле со банката и објектот го земале со хипотекарен кредит.
„Ако договарале со банката, како истите ја постигнале таа цена, кога во околината се продава имот за 3 пати повисока цена? Дали има некој скриен договор или друга услуга која не е заведена договорно? Граѓаните ја немаат таа среќа да купуваат одземен имот од Извршители кои извршуваат граѓани во финансиски потешкотии, како Левица, ниту да се договорат со некоја банка за толку ниски цени. Левица и Апасиев се демаскирани, аскетизмот одамна го замениле со хедонизам, ако воопшто и некогаш биле аскети“, истакна Манасиевски.