Свет
Путин: Нема да има дополнителна мобилизациja

Рускиот претседател Владимир Путин одржа средба со заменик-министерот за одбрана, Јунус-Бек Јевкуров, и со пензионираниот полковник Андреј Трошев. Во таа пригода тој посочи дека социјалните гаранции мора да бидат исти за сите учесници во специјалната операција бидејќи, кога е во прашање одбраната на татковината, не е важно во каков статус биле борците.
„Го имаме фондот ‘Бранителите на татковината’, многупати сум кажал и ќе повторам: без разлика на статусот на лицето што извршувало борбени задачи, социјалните гаранции мора да бидат исти за сите“, рече Путин.
Медиумите потсетуваат дека рускиот претседател на почетокот на април го потпиша указот за формирање државен фонд за поддршка на учесниците во специјалната операција „Бранителите на татковината“.
Фондот има задача да го координира обезбедувањето социјална, медицинска, психолошка и секаква друга поддршка на учесниците во СВО, како и да решава цела низа прашања.
Генералштабот на руската армија, според објавеното, не планира да спроведе дополнителна мобилизација во земјата.
Есенското регрутирање почнува во Русија на 1 октомври, а заменик-началникот на Генералштабот и контраадмирал, Владимир Цимљански, истакна дека регрутите нема да бидат испратени во областа на СВО.
Тој додаде дека значително е зголемен бројот на оние што доброволно потпишуваат договор со армијата, пренесува „Спутник“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ученик од седмо одделение приведен во Србија: донел нож и список за отстрел во училиште

Ученик од основното училиште „Јован Стерија Поповиќ“ во Нов Белград е однесен во полиција на разговор, објави српски Блиц.
Се сомнева дека вчера во училиштето донел список за убивање и нож.
Момчето е испрашувано од полицијата по наредба на Вишото јавно обвинителство во Белград, а се вели дека станува збор за ученик во седмо одделение.
Сите околности на инцидентот сè уште се утврдуваат, а деталите не се познати.
Регион
Млад човек уапсен во Далмација за силување и детска порнографија

Окружното државно обвинителство во Сплит отвори истрага против 25-годишен хрватски државјанин под сомнение за силување и повеќе кривични дела на детска порнографија.
Според соопштението од државното обвинителство, мажот е осомничен дека ги сторил овие кривични дела во 2024 и почетокот на 2025 година во Сплитско-далматинската жупанија. Тој е обвинет за силување согласно член 153 став 1 од Кривичниот законик и повеќе кривични дела детска порнографија согласно член 163 став 1 и 2.
По сослушувањето на осомничениот, Окружното државно обвинителство му предложи на истражниот судија да му биде одреден притвор поради можноста за влијание врз сведоците и ризикот од повторување на кривичното дело. Судијата го прифати предлогот и му одреди притвор врз основа на законски основи согласно член 123 од Законот за кривична постапка.
Свет
108 камиони со храна и брашно влегоа во Газа

Израелската агенција за координација на активностите на палестинските територии (COGAT) денес објави дека 108 камиони со хуманитарна помош што превезуваат брашно и храна влегоа во Појасот Газа.
Некои од камионите беа транспортирани до нови места за дистрибуција на помош управувани од Хуманитарната фондација Газа (GHF), која е поддржана од Израел и САД.
Помошта поминала инспекција од страна на израелските власти пред да влезе во Газа преку преминот Керем Шалом, каде што голем број камиони сè уште чекаат, објавува „Тајмс оф Израел“.
Израел ја продолжи испораката на помош за Газа на 19 мај, по пауза од повеќе од два месеци, и оттогаш 1.459 камиони влегле во палестинската енклава.
Обединетите нации и другите хуманитарни агенции наведуваат дека ова не е доволна количина помош за 2,1 милиони жители, предупредувајќи на ширењето на гладот во окупираната енклава и критикувајќи ја новата фондација за помош бидејќи е под контрола на Израел, објавува „Танјуг“.