Македонија
Министерот ќе бара учебници да се доставуваат и в сабота и в недела, шестоодделенците денес почнаа да ги добиваат

Во октомври, наместо во септември, шестоодделенците почнаа да добиваат учебници. Министерот за образование Јетон Шаќири вели дека денес почнала дистрибуцијата на учебниците, која ќе продолжи и претстојниот викенд доколку има потреба.
„Ме радува фактот дека денеска во некои од училиштата има достава на учебници за шесто одделение, која ќе продолжи тековно утре, задутре и до крајот на неделата очекувам сите учебници да се достават. Во зависност од тоа, ќе побарам од економскиот оператор да им достава и в сабота, ако треба и в недела, за да се заврши и сите одобрени учебници да се достават кај учениците“, рече министерот Шаќири и не прецизира колку од учебниците ќе добијат шестоодделенците, кои ја почнаа учебната година без ниту еден учебник.
Учебната година без ниту еден учебник ја почнаа и третоодделенците, но министерот Шаќири кај себе не гледа одговорност оти постапките што доцнеле не зависеле од него.
„Секој одобрен учебник што доаѓа од Националната комисија за учебници, што ги има завршено сите законски постапки, ако има задоцнување од страна на Министерството, тука е делот за одговорност на министерот. Сите учебници што се одобрени веднаш, во прашање се денови, од страна на педагошката служба веднаш се дадени со договор за печатење. Одговорност поради тоа што одреден учебник има жалбени постапки, кои не зависат од министерот, има жалбени постапки од страната на авторите, има жалбени постапки во постапката, не може да се бара. Вие сами се уверивте во тоа што јас го кажав минатиот септември дека другиот септември ќе биде многу поинаков од претходниот“, рече министерот Шаќири.
Тој денес извести дека овој септември биле доставени повеќе од 80 % од учебниците во училиштата. Првпат по десет години се доставуваат учебници во гимназиското образование, по повеќе од 13 години, достава има и во стручното образование.
Комисијата за спречување и заштита од дискриминација минатиот месец утврди дека наспроти препораката од нив, Министерството дозволило учебната година да почне без 43 учебници од вкупно 126, односно недостигале 34 % од учебниците. Со комплет учебници комисијата утврди дека годинава ја почнале само прво и второ одделение. Бидејќи Министерството за образование не успеало да го отстрани недостигот од учебници констатиран во мај годинава, а поради огромниот број дискриминирани ученици, комисијата првпат најави тужба за Министерството и за другите одговорни институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без дозвола реконструиран, со употреба на несоодветни материјали: дискотеката во Кочани не ги исполнувала ниту минималните услови за угостителска дејност

Вчера се приведени 13 лица инволвирани во трагедијата во Кочани, потсети денеска на прес-конференција јавниот обвинител Љупчо Коцевски.
Тој извести и дека денеска до Основниот суд во Кочани е поднесено обвинение против 34 физички и три правни лица за кривични дела поврзани со пожарот во дискотеката „Пулс“ во Кочани.
„Денеска до Основен суд во Кочани се поднесува обвинителен акт против 34 физички и три правни лица за кривични дела со кои предизвикале значителна опасност за животот и телото на луѓето и за имотот од поголеми размери, на место на кое се собрале поголем број на луѓе, односно за пожарот при настапот на музичката група ДНК на 16 март, каде што животот го загубија 62 лица, 157 се здобиле со тешки повреди и 54 лица со повреди“, изјави Коцевски.
За полицајците се бараат мерки за обезбедување на присуство, бидејќи при акциската контрола дозволиле употреба на пиротехника.
Јавниот обвинител предложи спрема осомничените да се определат соодветни мерки за забрана за напуштање на живеалиштето и да се јавуваат кај институциите за спроведување на законот, одземање на патните исправи и слично.
Обвинетите делото го сториле со свесно постапување рече обвинителот, и дејствувале спротивно на прописите за заштита.
Палењето на пиротехниката не било пријавено во полицијата.
Тој рече дека тие се гонат за тешки дела против општата сигурност.
Во деталите за случајот Коцевски кажа дека објектот не ги исполнувал ниту минималните услови за угостителска дејност.
За објектот, меѓу другото, немало основен проект за реконструкција со пренамена со соодветна статика и сеизмика, електротехнички и термички елаборати како и елаборат за заштита од пожари.
Не донеле и изработиле план за заштита и спасување.
Наспроти ова, првообвинетиот, сопственикот на објектот, преземал градежни дејствија и реконструиал и вградувал несоодветни материјали кои носата ризик од предизвикување на пожар, објасни Коцевски.
Во објектот не бил испочитуван ниту еден пропис во однос на квалитетот на вградените материјали, носивоста и стабилноста на конструктивните материјали, излезот, и влезот, паркингот, средства за ганење на пожари.
Обвинет е и братот на сопственикот на објектот кој продавал влезници, за поголем број на посетители од дозволеното и дозволувал влез на лица помлади од 18 години иако бил свесен за незаконските дејствија, појасни Коцевски како дел од деталите.
Тој потенцира дека во дискотеката никогаш не бил спроведен инспекциски надзор.
Оцени дека секоја од алките во случајот со трагедијата во Кочани имала моќ да го спречи трагичниот настан но никој не го сторил тоа.
Македонија
Се одложи судењето за убиството на бездомното куче Феликс, активистите в недела излегуваат на протест

Се одложи судското рочиште за свирепото убиство на бездомното куче Феликс. Поради тоа, актвистите за заштита на правата на животните повикаа на мирен протестен марш, што ќе се одржи на 15 јуни (недела), со почеток во 12:00 часот, пред Министерството за внатрешни работи.
„Судот немаше друг избор, почитувајќи го начелото на правичност, освен да ја одложи главната расправа поради наводни здравствени причини на бранителот на обвинетиот, токму во момент кога требаше да се произнесе одбраната. Случајност или сепак не?“, велат од граѓанската иницијатива ЗЕЛЕН ХУМАН ГРАД, кое е организаторт на протестот.
„Вчера требаше да сведочи Злате Димески — предложен од одбраната и присутен на самото место на убиството. Злате Димески го донесе стапот со кој беше убиен Феликс и на видеоснимките се гледа како немо набљудува со рацете зад грб додека Феликс беше немилосрдно претепуван и за жал подоцна им подлегна на повредите“, се наведува во соопштението.
Давањето можност убиецот да го брани лице кое со право може да се смета за соучесник — нем набљудувач кој не само што во ниту еден момент не се обиде да го спречи насилството врз недолжно животно туку и е истиот тој што го обезбеди оружјето за извршување на убиството, според Зелен хуман град, претставува дополнителна неправда и болно извртување на правото на фер судење.
„До кога ќе ја чекаме правдата за Феликс, имајќи ги предвид сите одложувања, годишни одмори, судска ферија? Ќе ја добиеме ли воопшто?“, прашуваат од Здружението.
На протестот ќе побараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од 1 година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.
Македонија
(Видео) МВР предаде обемна документација за истрагата за Кочани и никој не е поштеден, вели Петрушевски

Пукна балонот на лаги и манипулации на СДС во врска со истрагата за несреќата во Кочани. Сите може да видат дека институциите постапуваат професионално и неселективно, изјави Бране Петрушевски, пратеник на ВМРО-ДПМНЕ.
„Потенцираме дека МВР и институциите на системот ги доставиле сите потребни докази и информации за несреќата во Кочани до јавното обвинителство уште пред еден месец. Сите преземени акции од ЈО до сега, сега и од сега, се исклучиво врз основа на доказите кои ги обезбедиле МВР. МВР предаде обемна документација во ЈО, и никој не е поштеден“, рече тој.
Петрушевски вели дека задача на јавното обвинителство е сега врз основа на обемната документација за случајот која им е предадена да ја лоцираат вината и да подигнат обвиненија за секој еден за кој сметаат дека според правната логика е на било кој начин виновен за пожарот и смртта на децата во Кочани.
„Ниту еден полицаец, функционер, или кој и да е граѓанин кој имал допирна точка со предметот не е изоставен и се е опфатено во документацијата“, рече тој.
Колку е сериозен обемот на документацијата, вели Петрушевски, покажува и фактот дека во овој случај се опфатени над 60 лица, од министри, преку МВР, институциите, бизнисмени, градоначалници, секој еден кој можел да има вина.
„А сега да прашаме, колку лица беа опфатени во истрагата за Модуларната болница? Нула. Колку беа во Беса транс и Ласкарци? Нула. Е сега тоа е разликата од МВР сега и од МВР кога СДС беше на власт. Одговорност има за секој, без разлика кој е и од каде е“, рече Петрушевски.