Свет
Полицијата во Њујорк најде киднапирано 9-годишно девојче – киднаперот оставил отпечаток
Полицијата пронашла деветгодишно девојче со помош на отпечаток од прст на порака за откуп и моментално е безбедно.
Шарлот Сена исчезна во саботата додека возеше велосипед во северниот дел на Њујорк, што предизвика огромна 48-часовна потрага од стотици луѓе.
Пораката со барање за откуп подоцна била доставена до семејната куќа. Властите објавија дека на спорната порака имало отпечатоци од прстите на осомничениот. Полицијата успеала да го идентификува бидејќи отпечатокот од прст бил во нивната база на податоци од инцидент предизвикан од возење под дејство на алкохол во 1999 година.
Киднаперот бил пронајден на имотот во сопственост на неговата мајка и уапсен.
„По отпорот, осомничениот е приведен, а девојчето веднаш било пронајдено во шкаф. Знаела дека е спасувана, знаела дека е во сигурни раце“, изјавила гувернерката на Њујорк, Кети Хочул на прес-конференција.
„Она што се случи беше извонредно“, додаде таа. Гувернерот го именуваше осомничениот како 47-годишен маж со име Крег Нелсон Рос Џуниор. Од полицијата потврдија дека истрагата се уште е во тек и дека осомничениот е на распит.
Семејството на Шарлот кампувало кога таа исчезнала во саботата во шумска област на Државниот парк, популарно место на околу 70 километри северно од Олбани.
Гувернерката Хочул рече дека тоа е „најлошиот кошмар на секој родител“, додавајќи дека за време на потрагата добила телефонски повици од загрижени луѓе од целата држава. По исчезнувањето на Шарлот, пораката за откуп била фрлена во поштенското сандаче на нејзината семејна куќа во раните утрински часови во понеделникот.
Полицијата која ја надгледувала куќата собрала и идентификувала отпечатоци од прсти. Истрагата беше дополнително поддржана со податоци од мобилни телефони и евиденција на посетители на паркот, истакна Хочул за Си-Ен-Ен. Полицајците рекоа дека Шарлот е „безбедна и добро“, но превентивно е префрлена во болница.
Калахан Волш од Националниот центар за исчезнати и експлоатирани деца рече дека Шарлот можеби доживеала огромна траума. Полицијата соопшти дека во потрагата учествувале стотици луѓе, меѓу кои и вработени во ФБИ, доброволни противпожарни служби и доброволци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелците со тенк убија пет свои војници во Газа
Петмина израелски војници загинаа во пријателски оган во северниот дел на Појасот Газа, а тројца се тешко ранети, соопштија израелските одбранбени сили.
Според израелските медиуми, војниците загинале вчера во пријателски оган од израелски тенкови за време на судирите со милитантите на Хамас.
Извештаите велат дека тенк удрил во зграда во бегалскиот камп Џабалија каде што биле сместени војници.
Според податоците на израелската армија, од почетокот на војната во Газа, во борбите загинале 626 војници, а околу 3.500 се ранети.
Свет
Тинејџер исчезна во Алжир во 1998 година, по 26 години пронајден е жив во шталата на соседот
Алжирецот кој исчезнал пред 26 години бил пронајден во шталата на соседот, на само неколку минути пешачење, објави оваа недела Министерството за правда на земјата.
Човекот, идентификуван само како Омар Б., исчезнал на 19-годишна возраст, за време на граѓанската војна во Алжир во 1998 година, а неговото семејство претпоставувало дека бил киднапиран или убиен, пренесува „Си-би-ес“.
Сега, на 45-годишна возраст, тој бил пронајден меѓу стоговите сено на само околу 200 метри, откако братот на киднаперот се пожалил на социјалните мрежи за спор околу наследството.
Алжирските медиуми објавија дека кога членовите на семејството почнале да ја пребаруваат куќата на осомничениот, тој станал напнат кога се приближиле до стогот сено и на крајот го пронашле Омар Б. како седи под него во тишина.
Соседот (61) на семејството на Омар е приведен откако се обидел да избега, соопшти Министерството. Алжирските медиуми објавија дека жртвата изјавила дека не можел да повика помош „поради магијата што ја фрлил врз него неговиот киднапер“.
Киднаперот на тинејџерот е обвинет и дека го убил своето куче со отров, јавуваат алжирските медиуми.
Министерството соопшти дека истрагата се уште е во тек, додавајќи дека мажот добил медицинска и психолошка нега по злосторството, кое беше опишано како грозоморно.
Алжирските медиуми објавија дека мажот бил прегледан од лекар и префрлен во специјално психолошко одделение.
Свет
Заздравувањето на Фицо е доведено во прашање, на напаѓачот му пречела и владината политика кон Украина
Здравјето на словачкиот премиер Роберт Фиц се уште е тешко и рано е да се каже дали ќе закрепне, изјави неговиот заменик Роберт Калинак, ден по атентатот што ја шокираше Европа.
„За жал, сè уште не можам да кажам дека победуваме во напорите да го спасиме животот на Фиц, ниту дека прогнозите се позитивни бидејќи последиците од повредите предизвикани од четирите прострелни рани се такви што одговорот на телото на нив ќе продолжи да биде многу тежок“, рече Калинак.
Миријам Лапуникова, директорка на Универзитетската болница Рузвелт во Банска Бистрица, каде што се лекува премиерот Фицо, рече дека 59-годишниот премиер бил подложен на петчасовна операција во која учествувале два медицински тима за да ги санираат повеќете прострелни рани.
„Во овој момент успеавме да ја стабилизираме неговата состојба, но сепак е многу сериозна. Тој ќе биде задржан на интензивна нега“, изјави таа за новинарите.
Министерот за внатрешни работи Матус Сутај Есток на прес-конференција рече дека напаѓачот кого полицијата го товари за обид за убиство, дејствувал сам и дека претходно учествувал во антивладини протести.
„Станува збор за волк-самотник кој се радикализирал неодамна, во периодот по претседателските избори одржани во април“, изјави Сутај Есток.
„Како причини за нападот осомничениот ја наведе политиката на владата кон Украина, плановите за реформа на јавниот сервис и распуштањето на специјалното обвинителство“, рече министерот за внатрешни работи.
Словачки експерти во средата ги критикуваа безбедносните мерки преземени за заштита на премиерот по обидот за атентат врз Фиц.
„Самиот Фицо пред неколку недели зборуваше за опасностите од пукање врз политичарите“, изјави поранешниот началник на словачката полиција Стефан Хамран за весникот „Денник Н“ во четвртокот.
Тој се запраша кој ја анализирал потенцијалната опасност и ја проценил заканата. Хамран ја критикуваше реакцијата на телохранителите по пукањето.
Поранешниот шеф на словачката единица за обезбедување на заштитени лица, Јурај Забојник, исто така ги критикуваше телохранителите на премиерот.