Македонија
ЦУК: Вчера имаше 29 пожари на отворен простор, има уште еден активен пожар

Центарот за управување со кризи информира дека вчера имаше 29 пожари на отворен простор. Гореле стрништа, пасишта, отпадоци, сува трева, трње, трска, лозје, грмушки, нискостеблеста и мешана шума, борова шума и неколку депонии, според податоците од Секторот за операции и координација во ЦУК.
До утрово, според извештаите стигнати во ЦУК, активни пожари од последното деноноќие има уште еден – во општина Македонски Брод, во пределот кај село Белица (каде што гори ниска вегетација и нискостеблеста шума).
Инаку, 29-те пожари државата во последното деноноќие биле конкретно во општините:
– Општина Шуто Оризари, покрај улицата „Индира Ганди“ (каде што горела ниска вегетација)
– Општина Студеничани, село Батинци (ниска вегетација);
– Општина Зелениково; помеѓу село Вржале и село Морани (шума);
– Општина Гази Баба, два пожара, Парк шума „Гази Баба“ (грмушки) и кај село Раштак (ниска вегетација);
– Општина Ѓорче Петров, село Ново Село кон река Лепенец (ниска вегетација);
– Општина Бутел, село Луботен (ниска вегетација и отпадоци);
– Општина Илинден, во населба „Илинден“ (стрниште);
– Општина Прилеп, два пожара, село Селце (ниска вегетација) и село Ново Селани (ниска вегетација);
– Општина Босилово, помеѓу село Басилево и село Пиперево (ниска вегетација и ѓубре);
– Општина Гевгелија, три пожари во близина на Железничка станица „Гевгелија“ (ниска вегетација и капини), кај место Прдејци (ниска вегетација нискостеблеста шума) и село Богданци (ниска вегетација и прнар);
– Општина Радовиш, помеѓу село Јаргулица и село Калуѓерци (ниска вегетација);
– Општина Кичево, село Козица (стрниште);
– Општина Чашка, село Горно Јаболчиште (букова шума);
– Општина Неготино, село Пепелиште (ниска вегетација);
– Општина Карбинци, село Горно Трогерци (ниска вегетација);
– Општина Куманово, два, кај село Долно Којнаре кон село Речица (ниска вегетација и стрниште) и кај село Никуштак (ниска вегетација и стрниште);
– Општина Старо Нагоричане, село Драгоманце (ниска вегетација и стрниште);
– Општина Тетово, пет пожари, кај село Жеровјане (ниска вегетација), село Боговиње(картонски одпад), село Одри (ниска вегетација), село Доброште (ниска вегетација) и кај село Палатица (ниви).
– Општина Гостивар, кај село Старо Чајле (каде што горела нискостеблеста вегетација).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.