Култура
Костадиновска-Стојчевска: Нашата држава 30 години е дел од семејството ИКРОМ, кое посветено работи на изучување, чување и реставрација на културните добра
Северна Македонија со гордост ја одбележува тридецениската соработка со Меѓународниот центар за изучување на заштитата и реставрацијата на културните добра, познат како ИКРОМ.
Основан во 1956 година, ИКРОМ е глобален лидер посветен на изучувањето, зачувувањето и реставрацијата на културните добра. При неговата мисија да го заштити културното наследство за сегашните и за идните генерации, ИКРОМ ги обучува и ги зајакнува професионалците, институциите и земјите членки со знаење и експертиза потребни за заштита и зачувување на светското наследство.
Нашата држава 30 години е дел од семејството, кое посветено работи на изучување, чување и реставрација на културните добра.
Министерката за култура, Бисера Костадиновска-Стојчевска, честитајќи го јубилејот, истакна дека во 1993 година нашите институции и здруженија се приклучија на инспиративното патување создавајќи партнерство што го збогати нашето разбирање за заштитата и ги зајакна нашите врски со меѓународната заедница.
„Во овие 30 години голем број од нашите стручни лица се стекнаа со знаења и вештини неопходни за заштита и зачувување на нашите културни богатства. Заедничките проекти со УНЕСКО и со неговите советодавни тела сведочат за нашата посветеност во справувањето со современите предизвици во заштитата“, нагласи Костадиновска-Стојчевска.
Таа додаде дека ИКРОМ ја продолжува својата мисија за заштита на културното наследство во целиот свет, а ние ја потврдуваме нашата непоколеблива посветеност во остварување на целите на Меѓународниот центар.
„Заедно продолжуваме да го штитиме и да го промовираме нашето исклучително културно наследство поттикнувајќи подлабоко разбирање и ценење на нашата богата историја“, потенцира министерката за култура, која изрази срдечна благодарност до ИКРОМ за трајната поддршка и верба дека во следниот период ќе има уште поголеми достигнувања во зачувувањето на културното наследство што нè обединува сите нас.
„Им го честитаме денот на сите што работат на првите линии на зачувување на наследството: научници, конзерватори, куратори на музеи, менаџери на локации, архивари, истражувачи и археолози, кои се потпираат на ИКРОМ во заштитата на културното наследство“, истакна Костадиновска-Стојчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Поетски портрет на Веле Смилевски во Битола
Во Културно-информативниот центар, во свечената сала на Офицерскиот дом во Битола, утре (14 мај) во 12 часот ќе се одржи портрет на поетот Веле Смилевски.
За творештвото на Веле Смилевски ќе зборуваат Милица Радевска и Симона Ристевска, а музичката придружба е на Влатко Симоновски и Тамара Василевска. Стихови од творештвото на поетот ќе читаат гиманзиски ученици од средното училиште „Таки Даскало“, кое утре го одбележува својот патронен празник.
Веле Смилевски основно и средно образование заврши во Битола. Годинава се одбележува неговиот јубилеј, 75 години живот и 50 години творештво. По тој повод неодамна, во рамките на годишната програма на министерството за култура, излезе од печат избор од неговото творештво под наслов „Кула Вавилонска“
Култура
Доделено Гран при на „Остен биенале Скопје 2024“ на Микеланџело Пистолето
На 11 мај 2024 (сабота) „Остен арт“ – Скопје му ја врачи официјалната награда Гран при за животно остварување на „Остен биеналето Скопје 2024“ на еден од најголемите уметници на денешницата – Микеланџело Пистолето.
Според желбата на Пистолето да биде мотив за поврзување и обединување на луѓето и институциите во регионот, чинот на врачување се одржа во Музејот на современата уметност во Белград како дел од програмата во рамките на неговата самостојна изложба „Превентивен мир“. Официјалното Гран при – скулптура од Петар Хаџи Бошков, на маестро Пистолето му ја врачи Корнелија Конеска, извршен директор на „Остен Скопје“.
Настанот беше организиран во соработка со Музејот на современата уметност на Белград, Србија, „Зеринтија“ – Асоцијација за современа уметност (https://bit.ly/4acredW) Рим, Италија и Марио Перони.
Доделувањето на највисоката награда предвидена во рамките на „Остен биенале Скопје 2024“ е најважниот настан од годишната програма на Биеналето, која почна со изложбата „Тркало на времето“ од Марко Бањоли, Италија (23 април – 5 мај 2024) во НГМ – Чифте амам, со која се најави Италија како земја во фокус и континуирано се одвива со самостојни и групни изложби во Галеријата „Остен“.
Култура
„Заспаната убавица“ од Чајковски на 15 мај на Мајските оперски вечери
Безвременскиот, волшебен класичен балет „Заспаната убавица“, преточен во прекрасната музика на Петар Илич Чајковски, ќе се изведе на 15 мај со почеток во 20 часот, во рамките на меѓународниот фестивал 52. Мајски оперски вечери.
Диригент на претставата е гостинот од Египет, Најер Нагуи, главен диригент на оркестарот на операта во Каиро, кореограф е Виктор Јаременко (Украина), асистент-кореограф е Тетјана Белецка од Украина, сценограф и костимограф е Миодраг Табачки од Србија, светло-дизајн Милчо Александров, концерт-мајстор Јане Бакевски, соло виолина Климент Тодороски, а соло виолочело Кирил Јосифов.
Во главните улоги ќе настапат балетските ѕвезди од Софиската опера и Балет: Марта Петкова и Никола Хаџитанев, добитници на голем број престижни награди и признанија. Настапуваат солистите, балетскиот ансамбл и оркестарот на Националната опера и Балет.
Вечната борба помеѓу доброто и злото, класичната балетска бајка „Заспаната убавица“ од Петар Илич Чајковски, ја воодушевува публиката на најголемите светски сцени повеќе од 100 години. Сложените варијации, брилијантната изведба и чистата класична техника го прават овој балет од бајките врвен балетски бисер.