Македонија
Некои училишта ги добиле учебниците, но не им ги доставиле на децата, тврди министерот Шаќири
Министерот за образование, Јетон Шаќири, и денес пред новинарите зборуваше за доцнењето на дел од учебниците оваа година споредувајќи дека, за разлика од лани, сега станува збор само за учебните материјали за шесто одделение.
Тој рече дека според информациите што ги имаат, учебниците се доставени во поголемиот дел од основните училишта од градот Скопје и другите градови, а за онаму каде што не се, ќе побара анализа од службите за колку училишта станува збор.
„Постапките за учебниците по природни науки, математика и македонски јазик се завршени и треба да бидат доставени до основните училишта. Затоа дискусијата сега се води само за шесто одделение и ќе побарам детаљна анализа за кои училишта и региони станува збор“, рече Шаќири.
Според информациите на Министерството за образование, има училишта што ги добиле учебниците, но сè уште поради некои причини не ги доставиле кај децата, дополни министерот.
Прашан дали некој ќе понесе одговорност за доцнењето, Шаќири рече дека од оваа година во Бирото за развој на образование има нов директор и вреди да се спомене дека не дошло до доцнење со свидетелствата, а програмите во трето одделение се доставиле навремено. Што се однесува до седмо одделение, каде што од оваа година се работи според нова образовна програма, Шаќири дал краен рок постапката да биде завршена до крајот на ноември. Ако дотогаш не стигнат програмите, министерот најави дека ќе побара одговорност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Несреќа кај мостот Беласица, огромни гужви кај Транспортен центар
Огромни гужви кај Транспортниот центар во Скопје поради сообраќајна незгода. Две возила се судрија кај мостот „Беласица“.
Колони возила некое време се заглавени и стојат во место. Целосен колапс на сообраќајот во Скопје.
Претходно МВР извести дека на 12, 13 и 14 јуни (среда, четврток и петок), поради одржување на министерски состанок во рамките на Процесот за соработка на Југоисточна Европа (ПСЈИЕ) и Самит на шефови на држави и влади во рамките на Процесот за соработка на Југоисточна Европа, СВР Скопје – Единицата за безбедност на патниот сообраќај ќе преземе мерки за посебен режим на сообраќајот на поширокото централно подрачје на Град Скопје.
Македонија
Силјановска-Давкова – Вјоса Османи: Двете држави имаат одличен политички дијалог
Претседателката Гордана Силјановска-Давкова во пресрет на одржувањето на самитот на шефови на држави и влади на учесниците во Процесот за соработка во Југоисточна Европа оствари средба со претседателката на Република Косово, Вјоса Османи-Садриу.
На средбата беше оценето дека двете држави имаат одличен политички дијалог и беше изразен интерес за натамошно продлабочување на севкупната билатерална соработка и јакнење на добрососедските односи.
Претседателката Силјановска-Давкова посочи дека во интерес на натамошна стабилизација и економски просперитет на регионот е неопходно да вложуваме во регионалната соработка, да се обезбеди непречно одвивање на евроинтеграциските процеси на земјите од регионот, како и доследно спроведување на реформската агенда.
Во таа насока двете претседателки разменија мислења за европската перспектива на регионот, како и за политичките и безбедносните предизвици на регионален и мултилатерален план.
Посочувајќи дека двете држави се значајни трговски партнери, на средбата беше изразена подготвеност за натамошно унапредување на економската соработка и инфраструктурното поврзување.
Македонија
Силјановска-Давкова – Ѓуриќ: Потврдени одличните билатерални односи меѓу двете земји
Претседателката Гордана Силјановска-Давкова денеска оствари средба со министерот за надворешни работи на Република Србија, Марко Ѓуриќ, кој ќе учествува на самитот на шефови на држави и влади на учесниците во Процесот за соработка во Југоисточна Европа.
На средбата беа потврдени одличните билатерални односи меѓу двете земји, кои се карактеризираат со традиционално пријателство, и беше изразена подготвеност за натамошно унапредување на севкупната соработка во областите од заемен интерес.
Двајцата соговорници разменија мислења за политичките случувања во двете земји, актуелните состојби во регионот и европската перспектива.
Претседателката Силјановска-Давкова ја истакна важноста за засилена соработка на билатерален план и во рамките на регионалните иницијативи, што е во интерес на стабилноста, просперитетот и економскиот развој на регионот и во духот на добрососедските односи.
На средбата беше посочена потребата за искористување на потенцијалите за развој во областа на економијата и трговската размена, инвестициите, инфраструктурното и енергетското поврзување меѓу двете земји.