Свет
Шојгу: Западот сака да ја прошири војната од Украина во азиско-пацифичкиот регион
Рускиот министер за одбрана Сергеј Шојгу изјави дека Западот сака да го прошири конфликтот од Украина во азиско-пацифичкиот регион, пренесе руската новинска агенција ТАСС, цитирајќи ги неговите коментари на форумот во Пекинг.
Говорејќи на најголемиот настан во организација на кинеската воена дипломатија, Шојгу изјави дека НАТО го прикрива трупањето сили во азиско-пацифичкиот регион со „наметлива желба да воспостави дијалог“, објави Ројтерс.
Шојгу нагласи дека членките на НАТО всушност промовираат трка во вооружување во регионот, преку зголемување на нивното воено присуство таму, како и зачестеноста и обемот на воените вежби.
„Американските сили ќе ја искористат размената на информации со Јапонија и Јужна Кореја за лансирање на проектили за да ги одвратат Русија и Кина“, рече Шојгу.
Тој, исто така, го обвини Вашингтон дека се обидува да ги искористи климатските промени и природните катастрофи како изговор за „хуманитарни интервенции“. Според него, формирањето на нови блокови, како што се КВАД и АУКУС, ја поткопува улогата на Асоцијацијата на нациите од Југоисточна Азија (АСЕАН) и напорите за неширење на нуклеарното оружје во регионот.
Во исто време, рече тој, потегот на Русија за отповикување на ратификацијата на Договорот за сеопфатна забрана на нуклеарни тестови не значи крај на договорот.
„Бараме само да се врати паритетот со Соединетите Американски Држави, кои не го ни ратификуваа овој договор,“ наведува руската РИА, цитирајќи го Шојгу.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шји Џјинпинг вети помош за Газа: Правдата не треба трајно да отсуствува
Кинескиот претседател, Шји Џјинпинг, во четвртокот вети помош за Појасот Газа и се заложи за мировна конференција на состанокот со највисоките претставници на арапските земји.
Кина го поддржува полноправното членство на Палестина во ОН и свикувањето на поголема, поавторитативна и ефективна меѓународна мировна конференција, рече Шји во четвртокот во Пекинг.
Шји рече дека Пекинг има намера да помогне во повоената реконструкција и ќе донира 3 милиони долари на Агенцијата на Обединетите нации за помош и работа за палестинските бегалци на Блискиот Исток (UNRWA).
„Војната не треба да продолжи бесконечно, правдата не треба трајно да отсуствува“, изјави претседателот на кинеската држава и лидер на Комунистичката партија.
Пекинг зазеде неутрален став во тековниот конфликт во Газа и постојано повикува на разговори за прекин на огнот без директно да ги осуди нападите на палестинската милитантна група Хамас на 7 октомври кои го предизвикаа конфликтот.
Во средата, Министерството за надворешни работи во Пекинг уште еднаш ја изрази својата загриженост поради израелската офанзива врз градот Рафа во јужниот дел на Газа и ги повика „релевантните страни“ да ги прекинат борбите.
Кина со години има добри односи со арапскиот свет богат со ресурси.
Кралот на Бахреин Хамад бин Иса Ал Калифа, египетскиот претседател Абдел-Фатах ал-Сиси, тунискиот претседател Каис Сајед и претседателот на Обединетите Арапски Емирати шеикот Мохамед бин Зајед Ал Најан отпатуваа во Пекинг на Кинеско-арапскиот форум за соработка.
Пекинг инвестира пари во голем број проекти во регионот преку својата иницијатива „Појас и пат“. Шји ги наведе зелените технологии и вештачката интелигенција како други потенцијални области на соработка.
Европа
Фајненшл Тајмс: НАТО не може да ја заштити Источна Европа
НАТО има помалку од пет отсто од капацитетите за противвоздушна одбрана потребни за заштита на Источна и Централна Европа во случај на интензивен напад, пишува Фајненшл тајмс, повикувајќи се на неколку извори запознаени со доверливите одбранбени планови на алијансата, направени во 2023 година, пренесува Спутник.
„Воздушната одбрана е една од најголемите празнини што ги имаме. Тоа не можеме да го негираме“, изјави неименуван дипломат на НАТО.
„Способноста на алијансата да издржи ракетни и воздушни напади беше суштински дел од планот за одбрана на Источна Европа од инвазија“, вели друг извор.
„И сега го немаме тоа“, додаде тој.
Во написот се вели дека и на Велика Британија ѝ оди лошо во оваа област. Според „Фајненшл тајмс“, шесте разурнувачи дизајнирани за противвоздушна одбрана имаат недостатоци во дизајнот, а шесте модерни системи за воздушна одбрана „Скај Сабер“ имаат дострел од само 40 километри, а два од нив се наоѓаат во странство.
Регион
Српски медиуми: Еден од осомничените за убиството на малата Данка повеќе нема да се брани со молчење
Срѓан Јанковиќ, осомничениот за убиството на двегодишната Данка Илиќ, повеќе нема да се брани со молчење, туку реши да зборува за случајот со девојчето чиешто тело се’ уште не е пронајдено два месеци по нејзиното исчезнување, дознава „Блиц“.
Според неофицијалните информации на српскиот портал, тој размислувал дали ќе даде исказ во Вишото јавно обвинителство во Зајечар и на крајот решил да го прекине молкот.
За потсетување, двегодишното девојче од Данска исчезна на 26 март во Бањско поле кај Бор во Србија, а полицијата 10 дена по претресот ги уапси Срѓан Јанковиќ и Дејан Драгијевиќ од Бор. Се сомневаат дека девојчето го удриле со автомобил, го ставиле телото во багажникот и го однеле на депонија.
Полицијата ги приведе таткото и братот на Дејан Драгијевиќ. Таткото по два месеци излезе од притвор, а истрагата за случајот е во сенка на насилната смрт на братот на Дејан Драгијевиќ – Далибор. Имено, тој починал во притвор, а од МУП соопштија дека му се слошило. Но, според извештајот од обдукцијата, кој го објави српскиот портал „Радар“, тој наводно бил претепан во затвор.
Новинарите од порталот „Србија Данас“ ја посетија мајката на девојчето. Таа не сакаше да го коментира ослободувањето на таткото на Дејан Драгијевиќ од притвор.
„Сум слушнала различни приказни, дека е виновен и дека не е, а од полицијата немам информации“.
Рекла дека била шокирана и разочарана од приказните на нејзините соседи од Бор. Велат дека се шири лагата дека заминала во Германија.
„Не отидов никаде, тука сум. Луѓето ми се јавуваа во два часот по полноќ и ме малтретираа и ми се закануваа. Морав да го сменам бројот неколку пати“, рекла таа.
Телото на двегодишната Данка се уште не е пронајдено.