Македонија
Грковска – Флоридис: Независни и самостојни институции се клучни за владеење на правото

Заменичката на претседателот на Владата задолжена за политики за добро владеење, Славица Грковска, оствари работна средба со министерот за правда на Република Грција, Јоргос Флоридис.
Вицепремиерката Грковска информира дека Европската Унија во рамките на билатералниот скрининг веќе го објави извештајот за првиот Кластер, „Фундаментални вредности“, каде што се дефинирани реформите што нашата држава треба да ги преземе во наредниот период, а кои се однесуваат на владеењето на правото, реформите во правосудството, борбата против корупцијата и организираниот криминал, зајакнување на функционирањето на демократските институции и реформата во јавната администрација.
Таа додаде дека клучна цел на Република Северна Македонија, од аспект на доброто владеење е зајакнување на транспарентноста, јакнење на независноста на институциите, интегритетот и мерит-системот во правосудниот сектор. Вицепремиерката Грковска информира дека нејзиниот Кабинет ја води координацијата на институциите надлежни за спречување на корупцијата водејќи особено внимание во ниту еден момент е да не се наруши нивната независност.
Двајцата соговорници се осврнаа и на прашањето на долгите судски процеси за што министерот Флоридис информира дека токму за ова прашање веќе во Грција презеле конкретни чекори и мерки со цел да се намали бројот на пресуди пред Европскиот суд за човекови права. Тој истакна дека во моментот во Грција се одвива реформа на правосудниот систем во насока да се намали рокот за процесирање на предметите. Целта е да се постигне оптимален временски рок од 500 дена, кој е среден рок на земјите членки на Европската Унија, од пријава до правосилна пресуда.
Вицепремиерката Грковска и министерот Флоридис разменија искуства и за начинот на избор на судии и јавни обвинители, како и за механизмите, кои овозможуваат на овие позиции да се изберат лица со интегритет, кои нема да подлегнат под никакви влијанија. Тие се осврнаа и на значењето на меѓусебната соработка и искуство во делот на правосудниот систем бидејќи, како што нагласија, тоа не е само национално, туку и регионално прашање. Оттука, беа истакнати заемни заложби за понатамошно продлабочување на соработката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити го претстави носителот на листата за советници за Општина Чаир: Мухамед Муртези, активист од граѓанскиот сектор

Кандидатот за градоначалник на Општина Чаир, Изет Меџити, го претстави името на носителот на листата за Општинскиот совет, Мухамед Муртези.
Во видео-обраќање на социјалните мрежи, Меџити напиша: „Денес сакам да го претставам носителот на листата на советници на ВЛЕН за Општина Чаир, докторот, интелектуалецот, активистот на граѓанското општество и човек со високи вредности, Мухамед Муртези. Заедно кон големата победа.
Само за тебе Чаир“, напиша Меџити.
Муртези за локалните избори во октомври за првпат се вклучува во партиско-политичка дејност. Тој е носител на листата на советници на „Вреди“ за Општина Чаир и кандидат за претседател на Советот. Целта, како што појаснуваат на неговото политичко ангажирање е да даде позитивен придонес и да остави добра трага и во оваа област.
„Нашата визија, заедно со идниот градоначалник на Чаир, Изет Меџити, е еден поубав, почист и побезбеден Чаир. Поквалитетно образование и наука, поразвиена култура и спорт, подобар и подостоинствен живот. Затоа што жителите на Чаир го заслужуваат тоа и јас верувам дека ова е остварливо со добра волја, голема посветеност и чесна работа. Затоа ја бараме вашата поддршка на 19 октомври. За нашиот Чаир,“ изјави Муртези.
Македонија
Герасимовски: Го обновуваме паркингот на „Петар Поп Арсов“, обезбедуваме повеќе ред и подобри услови

Службите на општина Центар интензивно работат на обновување на паркинг просторот на улицата „Петар Поп Арсов“, лоциран зад Вучко.
Во тек е асфалтирање и уредување на паркингот со површина од 550 метри квадратни. По завршувањето на градежните работи, следува обележување на паркинг- местата, по што просторот ќе биде целосно функционален и подготвен за користење, извести Општината.
Реновирањето на паркингот се изведува на барање на жителите во рамки на караванот „Се гледаме во маало”, кои се соочуваат со хаотичната состојба при паркирањето и недостиг на паркинг-места, велат од Општината.
„Со уредувањето и обележувањето на овој паркинг-простор им излегуваме во пресрет на потребите на центарци, овозможувајќи организирано и поефикасно паркирање. Целта ни е да создадеме безбеден и уреден простор, со современи стандарди и подобра пристапност,“ рече градоначалникот Герасимовски.
Со овој зафат, Центар продолжува со инвестиции во подобрување на урбаната и комунална инфраструктура, се додава во соопштението на Општината.
Македонија
„Влен“: Арбен Фетаи ги уништи плановите на ДУИ и на заложниците на Ѓока

„Пропагандната машина на ДУИ и нејзините патерици започнаа ниска кампања на клевети и лаги против вицепремиерот, Арбен Фетаи. Криејќи се зад лажни профили и користејќи валкани методи, тие се обидуваат да ја оцрнат неговата личност и да го попречат процесот на промени што сега стана незапирлив“, велат од „Влен“.
„Овие напади докажуваат само едно: моќта на ВЛЕН ги уништи плановите на ДУИ и Таравари со кланот Ѓока. Тие се плашат од транспарентноста, од чистите раце и од нашата решеност да ги искорениме злоупотребите, корупцијата и мафијашките врски што ја држат државата како заложник две децении.
ВЛЕН има фундаментална разлика со ДУИ и нејзините патерици: Ниту еден јавен денар не е злоупотребен од нашите претставници. Нивното богатство и интегритет се отворена книга, секој цент е заработен чесно. Без компромис и без контакт со ДУИ, нашата дистанца е јасна, бидејќи секој што ќе ја допре ДУИ е извалкан од нивното морално распаѓање. Нашето донесување одлуки е слободно, невлијателно и неуценето, бидејќи нашата единствена зависност е од нашиот народ и нација, а не од олигарси и нарко-босови. Затоа, нивните напади оркестрирани од зад сцената се едноставно очај. Тие не се осмелуваат да се соочат со вистински обвинувања, факти и аргументи, бидејќи знаат дека ВЛЕН е олицетворение на чисти раце и чесна политика.
Нека клеветат со лажни профили, нека лаат нивните дигитални платеници, караванот ВЛЕН незапирливо се движи напред, градејќи иднина каде што Албанците се посилни, а не експлоатирани, иднина без ДУИ, без патерици и без заложниците на Ѓока“, се наведува во соопштението на „Влен“.