Скопје
Герасимовски: Две години фокусирани на реалните потреби на жителите
Инвестиции во современо и инклузивно образование, нови паркинг-места, енергетска ефикасност, инфраструктура, развој на културата и спортот, градоначалникот на општина Центар, Горан Герасимовски, го претстави отчетот за сработеното во изминатите две години. Тој на прес-конференција посочи дека од почетокот на мандатот Општината е фокусирана и посветено работи на реалните потреби на жителите и локалната самоуправа, нејзиниот развој и поставување нови стандарди и иновативни проекти за поквалитетен живот и исполнето секојдневие.
„Оваа година го основавме трговското друштво ‘Енергија Центар’ за производство и продажба на електрична енергија од обновливи извори. Со овој проект Општина Центар ги носи иновациите и ќе биде првата енергетски независна и самоодржлива општина во државата. Првиот фотоволтаичен систем е веќе поставен на покривната површина на градинката ‘Раде Јовчевски-Корчагин’ во објектот ‘Пепелашка’ и тој треба да ги задоволи капацитетите за снабдување со електрична енергија и во зимскиот период. Преку основањето на ‘Енергија Центар’ ќе вложуваме и во нови енергетски фасади, поголемо зеленило, инфраструктурни решенија и проекти што ќе бидат од корист на сите граѓаните“, потенцира Герасимовски.
Тој порача дека грижата за најмладите е најважна поради што изминатите две години Општината посветено работеше на инвестиции во образованието.
„Грижата за најмладите е наша најважна работа, затоа инвестиравме и во нови енергетско-ефикасни фасади и реконструкција на покривните површини во градинките ’13 Ноември’, објект ‘Јасмин’ и објект ‘Пинокио’, а во објектот ‘Парк’ ги реконструиравме сите занимални. По 65 години ги проширивме капацитетите на училиштето ‘Коле Неделковски’. Инвестираме во доградба на 4 нови училници за повеќе од 100 ученици. Вложуваме и во инклузивно образование затоа по реконструкцијата, ‘Коле Неделковски’ ќе има и лифт, пристапна рампа и тоалет за учениците со тешкотии во движењето. Обезбедивме сензорни соби во училиштата ‘Киро Глигоров’, ’11 Октомври’, ‘Песталоци’ и во ‘Гоце Делчев’. Ангажиравме и 50 лични асистенти за учениците со посебни образовни потреби. Тие беа ангажирани и за време на летниот распуст за што во овие две години издвоивме 4 милиони и 800 илјади денари. Исто така, набавивме информатичка опрема за сите училишта во вредност од 4 милиони денари, со што вложуваме во дигитализација, подобри услови и квалитетна настава за сите учениците. Општина Центар со сопствени средства во вредност од 2,5 милиона евра ја гради и најголемата, инклузивна и најмодерна градинка „Пролет“, со капацитет за 150 дечиња во 9 занимални“, рече Герасимовски.
Градоначалникот на Центар ги наброи реконструираните детските и спортски игралишта во Капиштец, Славејко Арсов, фудбалското игралиште кај „Кам маркет“ во Дебар Маало, во близина на трговскиот центар „Зебра“, Градски ѕид кај „Коктел бар“ и уште едно кај Зеленото пазарче, како и двете спортски игралишта во дворот на училиштето „Ј. Х. Песталоци“, но не ги изостави ниту проектите за пензионерите.
„Ветеното кон пензионерите целосно е исполнето. За помалку од една година отворени се сите три пензионерски клубови што беа нивно предизборно барање. Општина Центар исто така за пензионерите го спроведува и проектот ‘Нега на стари лица во домашни услови’, со што обезбедува домашна нега од лиценцирани негуватели, физиотерапевти и психолози за 90 корисници. Во соработка со Банката за храна“, Општина Центар секој месец доделува пакети со храна и хигиенски производи за пензионерите со ниски примања. За нашите највозрасни сограѓани обезбедивме и бесплатни стоматолошки услуги“, истакна Герасимовски.
Тој исто така рече дека локалната власт го исполнила предизборното ветување Јавното претпријатие „Паркинзи на Општина Центар“ да стане и комунално претпријатие. Притоа потсети на акциите за чистење во Паркот на франкофонијата, Паркот „Капиштец“, „Сквер Јадран“, Паркот на новинарите, поранешен „Технометал – Вардар“, околу Фондот за здравствено осигурување, на Калето, како и дивите депонии на Водно, Крњево, Маџир Маало, Нова железничка, Буњаковец, каналите на Загрепска и Водњанска.
Во изминатите две години Општината реконструира 17 улици, обезбеди резидентни паркинзи, постави нова урбана опрема и столпчиња за регулирање на сообраќајот, нова атмосферска, водоводната и фекалната канализација каде што беше потребно, а развивањето на вело-мрежата беше потврдена со наградата „Највело општина за 2023“.
Оваа година, потенцира Герасимовски, фокусот на Општината бил урбанизмот за што градежните инспектори извршиле 269 вонредни инспекциски контроли, препишале 90 казни за правни лица и 208 казни на физички лица.
Годините во Општината ги одбележаа и проектите во културата и спортот, меѓу кои Детската недела, Маалскиот фестивал и големиот концерт „Нешто што ќе остане“, кој ќе стане новото обележје на Центар. Во спортот, рече Герасимовски, обезбедени се нови спонзори, кои го враќаат тимот на старите победнички патеки.
За крај, Герасимовски порача дека Општината останува посветена на реализирање на ветувања за сите проекти што носат бенефит за граѓаните, ја развиваат општината и го подобруваат животот во Центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Кисела Вода: Компјутери, принтери и телевизори за училиштата „Рајко Жинзифов“ и „Кирил Пејчиновиќ“
Набавени се компјутери, принтери и телевизори за основните училишта „Рајко Жинзифов“ и „Кирил Пејчиновиќ“ во Кисела Вода, како дел од континуираните активности за унапредување и модернизација на наставниот процес, извести Општината.

„Во периодот кога учениците се на зимски распуст, во училиштата се врши опремување со нова информатичка опрема, со цел второто полугодие учениците да го започнат со поквалитетна настава и полесен пристап до дигитални содржини.

Со оваа инвестиција, општина Кисела Вода уште еднаш ја потврдува својата определба за дигитализација на образованието и создавање современи услови за учење, во чекор со новите образовни стандарди и потребите на учениците“, соопштуваат од Општината.

– Нашата цел е децата да учат во современи и опремени училишта, каде што ќе имаат можност да стекнуваат знаења и дигитални вештини неопходни за нивниот понатамошен развој. Компјутерите, принтерите и телевизорите кои ги обезбедивме во училиштата „Рајко Жинзифов“ и „Кирил Пејчиновиќ“ се уште еден конкретен чекор во таа насока, а учениците по зимскиот распуст ќе бидат пречекани со значително подобри услови за настава, изјави градоначалничката на општина Кисела Вода, Бети Стаменкоска Трајкоска.



Македонија
(Фото) Во текот на декември подигнати 𝟣𝟥 𝟢𝟢𝟢 тони комунален отпад во Скопје
Во текот на месецот декември 2025 година, ЈП Комунална хигиена-Скопје подигна и транспортираше вкупно 13 000 тони комунален отпад од кантите во индивидуалните домувања и контејнерите поставени на јавни површини на територијата на градот Скопје, известуваат од ЈП Комунална хигиена-Скопје.

„Воедно, екипите на Претпријатието отстранија и 2200 кубни метри претежно кабаст и градежен отпад од диви депонии лоцирани во сите скопски општини.

Во текот на последниот месец од минатата година, Еко-патролата на ЈП Комунална хигиена-Скопје реализираше голем број едукативни разговори со претставници на стопанските субјекти, како и со лица коишто биле затекнати при неправилно одлагање на отпад, при што се изготвени 225 записници.

Најголем број на записници – вкупно 85 – се врачени во скопската општина Kарпош“, се додава во соопштението на ЈП Комунална хигиена-Скопје.
Македонија
Делови од Центар и Зелениково денеска без вода
Од ЈП Водовод и Канализација известуваат дека денеска поради дефект на затварач од ф – 100 мм на ул. 5 бр. 47 во село Моране, во периодот од 08.30 часот па се до отстранување на дефектот без вода ќе останат дел од корисниците од село Моране, општина Зелениково.
Од ЈП Водовод и Канализација исто така информираат дека поради уличен дефект на ул. Васил Ѓорѓов б.б – пред ОУ Киро Глигоров, во периодот од 09.00 часот па се до отстранување на дефектот без вода ќе останат корисниците од улиците Васил Ѓорѓов, Адам Мицкиевиќ, дел од корисниците од улиците Киро Глигоров и Козара, како и објектот на заводот за физикална медицина и рехабилитација, општина Центар.

