Загрепската полиција предупредува на измамници кои го користат стравот на родителите и им земаат пари.

Измамник од Македонија лажно се претставувал како лекар, искористувајќи го најголемиот човечки страв – потенцијалната загуба на дете, пишува „Дневник.хр“.

Луѓето, водени од паника и сожалување, плаќале, а потоа лекарот исчезнувал без трага. Но, загрепската полиција му ги уништила плановите.

„Едно лице се претставува како лекар кој вели: ‘Вашето дете е во животна опасност. Се случи голема трагедија или несреќа. Потребни се пари за таа тешка операција’“, рече Марија Гоати, портпарол на полициската управа во Загреб.

За да го спасат своето дете, осум родители му предаваат пари на помлад маж на прометните улици во Загреб. Осум граѓани биле оштетени вкупно за повеќе од 270 илјади евра.

Измамникот по потекло од Македонија има 26 години и во моментов е зад решетки. Од Комората на матични лекари апелираат пациентите да не наседнуваат на лажни лекари кои им доаѓаат на прагот.

„Секогаш даваме таргетирани соопштенија, во договор со пациентите. Доаѓаме на домашни посети. За се друго што оди ад хок, се разбира, треба да се посомнева“, изјави докторката Даворка Дошен Мрак.

Иако еден измамник заврши зад решетки – загрепската полиција веќе трага по нов кој на сличен начин измамил уште две загрепски семејства.

Претседателката Гордана Сиљановска-Давкова оствари средба со делегацијата на Уставниот суд на Република Хрватска, предводена од претседателот на судот, Мирослав Шепаровиќ, во придружба на претседателот на македонскиот Уставен суд, Дарко Костадиновски.

Соговорниците оценија дека со оваа посета, која се реализира по дведецениска пауза, се обновува меѓусебната соработка што треба да продолжи да се интензивира и да се продлабочи заради размена на искуства и учење едни од други.

Како професорка по уставно право, претседателката Сиљановска-Давкова ги нотира и објасни забелешките и недостатоците на нашите уставни решенија за Уставниот суд во споредба со оние за Уставниот суд на Хрватска. Таа изрази заложба за пошироки надлежности во заштитата на човековите слободи и права, изборите и референдумот, но и преиспитување на некои од нив, како и прецизирање и заострување на условите за стекнување статус на уставен судија.

Претседателката укажа дека Уставниот суд треба да дејствува како четврта власт, односно медијатор меѓу трите власти.

На средбата се дискутира и за хрватското искуство со Уставниот закон за Уставен суд, како и проблемите врзани за отсуството на законско регулирање на уставно-правните прашања кај нас.

Хрватските уставни судии искажаа подготвеност да помогнат во забрзувањето на македонскиот евроинтегративен процес истакнувајќи ги бенефитите од членството како за членките така и за ЕУ.

Заблагодарувајќи се на поддршката, претседателката истакна дека хрватските лекции од процесот на евроинтеграциите може да бидат драгоцени за нас.

Во пресрет на 23 мај, Националниот ден на Власите, претседателката Гордана Сиљановска-Давкова оствари средба со делегацијата на Организациониот одбор за Националниот ден на Власите, предводена од неговиот претседател, Стерјо Папули.

Истакнувајќи дека сме единствената држава во регионот, но и на светот, во чиј устав се наведени Власите и гарантирани нивните права, претставниците на Власите сметаат дека влашката заедница не е социјално загрозена, но изразуваат загриженост за опстанокот на влашкиот јазик, култура и традиција.

Потенцирајќи ја автохтоноста на Власите, претседателката ја истакна важната улога на влашката заедница во создавањето и развојот на македонската држава.

Таа изрази разбирање за заложбите за негување и зачувување на влашкиот идентитет низ образовниот процес и културните активности, како и поддршка на проектот за отворање на Влашка куќа, како место за различни активности на влашки јазик.

На средбата, претставниците на влашката заедница истакнаа дека и натаму, ангажирано ќе работат на развојот на македонското општество како мултиетничко.

Тие сметаат дека Собранието треба час поскоро да ја ратификува Европската конвенција за регионални и малцински јазици.

Според нив, со Изборниот законик треба да се загарантира по едно пратеничко место за помалите етнички заедници.

Со гордост истакнаа дека годинава се одбележуваат 120 години од признавањето од страна на Отоманската империја на правата на Власите, односно на Влашкиот милет на 22 мај 1905 година.