Свет
„Доаѓа зима, подгответе се“: предупредување на Зеленски до народот на Украина
Украинскиот претседател Володимир Зеленски ги предупреди граѓаните да се подготват за нови бранови руски напади врз инфраструктурата како што се приближува зимата.
Зеленски рече дека војниците очекуваат напад на источниот фронт.
Украинската воена разузнавачка служба соопшти дека најмалку тројца руски војници загинале во експлозија во јужниот град Мелитопол, окупиран од Русија, што го опиша како акт на одмазда на групите на отпорот.
Зеленски им се обрати на граѓаните преку видеопорака еден ден откако руските сили извршија воздушен напад врз Киев, прв во последните седум недели.
„Речиси е средината на ноември и мораме да бидеме подготвени за фактот дека непријателот може да го зголеми бројот на напади со беспилотни летала или ракети врз нашата инфраструктура. Oвде, во Украина, целото внимание треба да се насочи кон одбраната, одговорот на терористите, сè што може Украина да направи за да ја надмине зимата и да ги подобри способностите на нашите војници“, рече Зеленски.
Минатата зима Русија изврши многубројни напади врз електрани и други објекти поврзани со енергетската мрежа, што доведе до прекини на струја во разни региони, пренесуваат медиумите во светот.
Министерот за енергетика Немат Галушченко во саботата изјави дека Украина ќе има доволно енергетски ресурси за да ја преживее зимата, но рече дека „прашањето е колку идните напади може да влијаат на снабдувањето“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лидерот на Хезболах: Непријателот ги премина сите црвени линии, сакаа да убијат 4.000 луѓе одеднаш
За време на телевизиско обраќање, лидерот на Хезболах, Хасан Насралах, детонирањето на пејџери и воки-токи низ Либан го нарече „терористички чин“ и изјави дека „непријателот на Израел ги преминал сите црвени линии“ со намера да убие 4.000 луѓе во еден момент.
Тој призна дека на Хезболах му бил зададен тежок удар, но подвлече дека тоа „нема да го скрши“ отпорот и дека операциите во јужен Либан нема да престанат додека не заврши војната во Газа.
Насралах на почетокот рече дека настаните во изминатите два дена го навеле да го одржи говорот. Тој објасни дека планирал да ја претстави својата анализа и извештај за борбите во изминатата година на 7 октомври, но дека она што се случило во изминатите 48 часа „ја барало оваа порака“.
Тој им изрази сочувство на паднатите на фронтот во јужен Либан и на загинатите како последица на експлозиите, а на повредените им посака брзо закрепнување. Тој им се заблагодари на лекарите, официјалните лица и на сите кои помогнаа во лекувањето на жртвите од нападот и на луѓето кои даруваа крв за повредените и ја поздрави солидарноста и единството на народот во земјата.
Тој подвлече дека експлозиите се случиле во болниците бидејќи пејџерите ги користеле и медицинските работници, како и во аптеките, маркетите, продавниците, куќите, автомобилите и на улиците каде што имало многу цивили.
Насралах изјави дека Израел имал за цел да убие „4.000 луѓе одеднаш“.
„Тоа беше намерата на непријателот и ова е обемот на нивниот криминал. Како да го наречеме овој вид криминална активност? Дали е тоа голема операција? Дали е тоа геноцид? Дали е тоа масакр?“, рече тој.
Тој призна дека на Хезболах му бил зададен „многу тежок“ удар, опишувајќи ги нападите како „невидени“ во Либан. Тој рече дека се формирани истражни комисии кои ќе проучат како се случиле експлозиите и дека ќе ги чекаат резултатите од истрагата.
„Претрпевме многу тежок удар. Но, ова е воена состојба“, рече тој.
Тој рече дека неговата група е свесна дека Израел има технолошка предност бидејќи е поддржан од САД и други технолошки суперсили, но храбро ќе се соочи со овој предизвикувачки момент со крената глава.
„Не може да бидеме скршени од овој удар, колку и да е силен. И можам верно и самоуверено да ве уверам дека овој тежок и невиден удар не нè клекна – и нема“, подвлече тој.
„Јасно велам: без разлика какви се последиците, без разлика на жртвите, без разлика на сценаријата, отпорот во Либан нема да престане да го поддржува отпорот во Газа и Западниот Брег и сите повредени на окупираните територии“, рече Насралах.
Тој изјави дека нападите низ Либан биле насочени кон инфраструктурата на Хезболах и дека тоа е обид да се предизвикаат поделби во неа.
„Нека знае непријателот дека тоа што се случи не ја разниша нашата вера, верба, решителност, подготвеност или инфраструктура. Напротив, нè направи порешителни, поробусни и истрајни. Ако целта на Израелците беше да не разделат од она што се случува во Газа, тоа не успеа“, подвлече тој.
Свет
По расправија извадил нож и солзавец, има повредени: тепачка во трговски центар во Германија
Неколку лица се повредени во тепачка што се случила денеска во трговски центар во Ерфурт, Германија, кога еден маж по расправија извадил нож и го расекол мажот.
Полицијата брзо пристигнала на местото на настанот и го евакуирала трговскиот центар, а според полицијата дошло до вербална, а потоа и физичка пресметка меѓу група лица, кои не се по потекло од Германија, пренесуваат германските медиуми.
Се се случило околу 15 часот и 30 минути, а еден од учесниците во тепачката извадил нож. Како што објави „Билд“, мажот (27) бил пренесен во болница поради сериозни повреди на раката, но неговиот живот не е во животна опасност.
Во трговскиот центар бил употребен и солзавец, па лекарска помош побарале и посетителите на центарот. Се пожалиле дека им горат очите и дека имаат проблеми со дишењето.
Полицијата соопшти дека е приведен маж (26), кој е осомничен дека извадил нож и ранил најмалку едно лице.
„Ве уверуваме дека не се работи за напад, немало опасност за граѓаните“, соопштија од полицијата.
Според написите,не се знае зошто дошло до тепачката, ниту точно колку лица се повредени во инцидентот.
Свет
Велика Британија ги повика граѓаните веднаш да го напуштат Либан
Британскиот министер за надворешни работи Дејвид Лами изрази длабока загриженост за зголемените тензии во Либан, повикувајќи ги британските граѓани да ја напуштат земјата.
Во телефонски разговор со либанскиот премиер Наџиб Микати, Лами ја изрази својата длабока загриженост поради растечките тензии и цивилните жртви во Либан.
Британскиот министер за надворешни работи рече дека разговарале за потребата од преговори за изнаоѓање решение за враќање на стабилноста и безбедноста преку Сината линија.
Лами исто така ги повика британските граѓани да го напуштат Либан, наведувајќи ги како причина зголемените тензии во регионот.
„Тензиите се високи и ситуацијата може брзо да се влоши“, напиша Лами на платформата X.
Во вторникот и средата во различни делови на Либан се случија експлозии на пејџери и радио уреди (воки-токи).
Во експлозиите загинаа најмалку 37 лица, а неколку илјади беа повредени.
Либанската влада и Хезболах го обвинија Израел дека го извршил нападот, а Хезболах вети одмазда.