Економија
Синот на Мијалков должи над 2 милиона евра за данок на добивка и ДДВ, УЈП објави листа на најголеми неплаќачи
![](https://makfax.com.mk/wp-content/uploads/2023/11/meriot-paricki1.jpg)
Вкупно 1.815 компании се најдоа на листата должници на државата за неплатен ДДВ, персоналец, данок на добивка, придонеси од задолжително социјално осигурување, царини и акцизи. Управата за јавни приходи на веб-страницата ја објави листата на должници, кои заклучно со 31 октомври не ги намириле долговите достасани на 31 јули.
Најголем должник е компанијата „Окитна трејд“ од Визбегово, со долг од 10,5 милиони евра за ДДВ. Зад неа со долг од 3,5 милиони евра е чешката компанија со руски сопственик, „СГСМ оил гас сервис“, а со долг од 2,3 милиона евра на трето место е Јавното комунално претпријатие „Гостивар“.
Четврта компанија на листата најголеми неплаќачи со долг од над 2 милиона евра е „Дивелоп груп“ ДОО, каде што еден од сопствениците е Јордан Мијалков, син на поранешниот шеф на Управата за безбедност и контраразузнавање, Сашо Мијалков преку компанијата „Бест веј инвестмент“ која се појавува како сопственик на „Дивелоп груп“ заедно со Александар Ивановски. Компанијата должник има удел во хотелот „Мериот“ на плоштадот Македонија во најстрогиот центар на Скопје. Долгот е за неплатен данок на добивка и ДДВ.
На листата најголеми должници на УЈП и овој пат е Трајче Заев, братучед на поранешниот премиер Зоран Заев. Компанијата „Фероцем“, во која Трајче Заев се јавува како сопственик заедно со Јанко Јанев, е основана во Струмица, но подоцна перименувана во „Абира плус“ ДООЕЛ, со седиште во Куманово, должи два милиона евра. Освен ново седиште, компанијата доби и нов сопственик и управител, холандски државјанин.
Покрај компании, на листата со должници има и 3.683 физички лица. Зголемен е бројот и на компании и на физички лица што должат во споредба со претходно објавената листа на должници. На листата се 32 правни лица повеќе и 54 физички лица повеќе од претходно објавената листа.
Компаниите и граѓаните заедно должат вкупно 147,4 милиони евра, односно 14 милиони евра повеќе отколку во претходно објавената листа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Економија
Поскапуваат некои од горивата
![](https://makfax.com.mk/wp-content/uploads/2022/11/benzin-gorivo-960x639-1-2.jpg)
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе одлука со која се врши зголемување на малопродажните цени на нафтените деривати во просек за 0,15 % во однос на одлуката од 28.6.2024 година.
Референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 0,868 %, кај дизелот зголемувањето е во просек за 0,368 %, кај екстра-лесното масло зголемувањето е во просек за 0,387 % и кај „мазутот“ зголемување во просек за речиси 0,170 %.
Курсот на денарот во однос на доларот во изминатиот период по кој беа формирани цените со претходната пресметка е повисок 0,042 %.
Од 2.7.2024 година од 00.01 часот максималните цени на нафтените деривати ќе изнесуваат:
– моторен бензин ЕВРОСУПЕР БС-95 – 83,00 (денари/литар)
– моторен бензин ЕВРОСУПЕР БС-98 – 85,00 (денари/литар)
– дизел-гориво ЕВРОДИЗЕЛ БС (Д-Е V) – 76,50 (денари/литар)
– масло за горење екстра-лесно 1 (ЕЛ-1) – 75,00 (денари/литар)
– „мазут М-1 НС“ – 48,008 (денари/килограм)
Малопродажната цена на бензинот ЕВРОСУПЕР БС-95 се зголемува 0,50 денари/л.
Малопродажните цени на бензинoт ЕВРОСУПЕР БС-98, на ЕВРОДИЗЕЛОТ (Д-Е V) и на екстра-=лесното масло за домаќинство (ЕЛ-1) не се менуваат
Малопродажната цена на „мазутот М-1 НС“ се зголемува 0,080 денари/кг.
Економија
Елена Петрова ја презеде функцијата директор на УЈП
![](https://makfax.com.mk/wp-content/uploads/2024/07/elena-petrova-ujp.jpg)
Денеска Елена Петрова формално ја презеде функцијата Директор на УЈП, од Замeник на директорот, Мевљудин Синани.
Елена Петрова е професионалец со долгогодишно работно искуство во УЈП, која во моментот на назначувањето беше Раководител на Секторот за наплата и управување со долгови. Нејзината биографија е достапна на следниот линк.
Директорката Елена Петрова изјави дека нејзина долгорочна и стратешка агенда е трансформацијата на УЈП, создавање „нов лик” на УЈП, „нов амбиент” и за даночните обврзници, за даночните службеници и за соработниците на даночната администрација.
„Во УЈП ќе поттикнам динамичен курс на работа со цел за дигитализација и трансформација, за да обезбедиме плаќањето данок и услугите од УЈП да бидат најмало можно административно оптоварување, а што повеќе да бидат „природно” вградени во деловните системи на компаниите и на „близок дофат” на граѓаните“, изјави Петрова.
Обраќајќи се на даночните обврзници, Петрова истакна дека ќе негува кооперативност со даночните обврзници преку мрежи за директна соработка и отворена дебата за сите заеднички предизвици во плаќањето даноци и остварувањето на даночните права.
Таа изјави: „Даночните обврзници спроти себе нема да имаат бирократи кои настапуваат од позиција на моќ, туку администрација која обезбедува лесно достапни информации, едноставни алатки и директна помош кои ќе водат кон точно плаќање на даночните обврски и лесно и брзо оставрување на своите права“.
Петрова ќе се залага за интензивна соработка со меѓународните организации, експертската јавност, медиумите и други засегнати страни, со цел со заеднички напори да оствариме позитивно влијание, зголемена даночна свест и даночен морал во општеството.
Петрова најави бескомпромисна борба со неплаќачите и затајувачите на данок и криминалните даночни измами, одговорност и казни за секој што ги оштетува народните пари заради противправно стекнување лична имотна корист.
Економија
ВМРО-ДПМНЕ: 250 милиони евра за капитални проекти за општините од септември
![](https://makfax.com.mk/wp-content/uploads/2019/10/evra.jpg)
Во септември градоначалниците од цела држава ќе можат на аплицираат на јавниот повик на Министерството за Локална самоуправа за добивање средства за проекти во нивните општини, информираа од владејачката ВМРО-ДПМНЕ.
„Градоначалниците од цела држава да направат и довршат што е можно повеќе проектна документација, со цел да аплицираат за повеќе проекти.
Ова е прва година за проектот 250 милиони евра за општински проекти, ист ваков повик ќе има секоја година, а вториот ќе се случи веќе за неколку месеци од сега.
Време е за реален раст и развој. Време е за рамнорен развој“, се вели во партиското соопштение.