„Периодов се потврди дека енергетската визија на коалицијата СДС – ДПМНЕ во однос на приватниот капитал воопшто нема никаква разлика. Откако енергетската заедница силно се спротистави на скандалозната продажба на Чебрен, Мицкоски ретерираше од својот поранешен став како директор на АД ЕЛЕМ и изјави дека државата треба да го гради овој стратешки проект“, соопшти Левица.

„Овој став е дијаметрално спротивен од времето кога Мицкоски беше генерален директор на АД ЕЛЕМ, кога тој во неколку наврати распиша тендер за концесионер за изградба на хидроцентралите „Чебрен“ и „Галиште“. Доколку ставот на Мицкоски е државата да ги гради овие хидроцентрали, зошто ваквата реализација не ја спровел додека директорувал со ЕЛЕМ, туку распишувал тендер за истата?!

Деновиве сведочиме дека единствената разлика во ставовите на СДС и ДПМНЕ е дали ХЕЦ Тиквеш да се отстапи на грчката компанија веднаш по потпишувањето на договорот за јавно-приватно партнерство или три месеци по завршувањето на изградбата на ХЕЦ Чебрен“, соопштија од партијата Левица.

„Во неодамнешната реакција на СДС е наведено дека доколку ХЕЦ Тиквеш се отстапи на грчката компанија три месеци по изградбата на ХЕЦ Чебрен, тогаш Македонија за период од 6 години ќе заштеди 100 милиони евра. Со ова, СДС ја потврдува теоријата на Левица дека ХЕЦ Тиквеш во ЕСМ внесува 100 милиони евра за период од 6 години, а за 60 години само ХЕЦ Тиквеш ќе ја исплати изградбата на ХЕЦ Чебрен во вредност од една милијарда евра. Злосторничкиот договор за јавно-приватно партнерство на Грците ќе им овозможи гратис 67% од вредноста на ХЕЦ Чебрен за период од 60 години.

Левица, како единствена партија која не е во спрега со олигархијата, најостро се спротиставува на склучувањето на договор за јавно-приватно партнерство со грчката компанија за изградба на Чебрен и за отстапување на ХЕЦ Тиквеш во период од 60 години. Македонија може и мора сама, со сопствени средства, да ја изгради ХЕЦ Чебрен, со оглед на фактот дека изградбата на овој потенцијал ќе ја чини државата исто колку изградбата на корумпираниот проект „Коридор 8”. Еден од условите на Левица за влез во Влада е раскинување на штетниот договор со концесионерот и поведување постапка за утврдување на кривична одговорност против сите учесници во склучувањето на овој штетен договор“, се додава во соопштението на Левица.