Македонија
Маричиќ: Одлагањето или ставањето во неизвесност на преговорите и на членството на Северна Македонија во ЕУ го става во неизвесност и реформскиот процес

Заменик-претседателот на Владата задолжен за европски прашања, Бојан Маричиќ, денеска се обрати на заедничката седница на Националниот совет за евроинтеграции и Комисијата за европски прашања при Собранието на Република Северна Македонија.
Во своето обраќање се осврна на пакетот за проширување на Европската комисија, кој оваа година се разликува во неколку аспекти од претходните, кои Стратегијата за проширување и извештаите за напредокот на земјите кандидати за членство ги сместуваат во еден посебен геостратешки контекст како резултат на војната во Украина, а и во актуелниот период и воените дејства во Израел, односно во Газа, кои иницираа околности за забрзување на процесот на проширување на Европската Унија за кој Брисел поттикна две сериозни новости, кои го определуваат новиот пристап за забрзување на процесот на проширување на Унијата.
„Првата е проширувањето на пакетот земји кандидати, кои се опфатени со најновата Стратегија за проширување, која, покрај шесте земји од Западен Балкан, ги вклучува уште и Украина, Молдавија и Грузија, а во втората исклучително значајна новина е планот за раст на економиите на Западен Балкан, кој има цел да воведе дополнителна динамика во евроинтегративните процеси на земјите од регионот и силна посветеност и одлучност со значајна финансиска поддршка да го поддржи забрзувањето на реформите, особено во делот на приспособување на националните економии со стандардите на земјите членки на ЕУ“, објасни Маричиќ.
Планот за раст, како што објасни, е финансиска, но и политичка инвестиција на Европската Унија за Северна Македонија, која изрази јасен став дека има потреба и сака да ја види нашата земја во европското семејство.
Вицепремиерот Маричиќ потенцира дека пакетот за проширување и извештајот на Европската комисија за нашата земја, како и планот за раст, се најважните пораки за што не смееме да си дозволиме да ги пролонгираме роковите, кои се јасно определени. Одлагањето или ставањето во неизвесност на преговорите и на членството на Северна Македонија во Европската Унија го става во неизвесност и реформскиот процес според ЕУ-стандарди.
Вицепремиерот Маричиќ се осврна и на најновиот извештај за реформскиот напредок за Северна Македонија, Европската комисија запиша дека земјата ги спроведува реформите во согласност со ЕУ-стандардите и секојдневно работи во исполнувањето на обврските, на укажувањата во извештајот гледаме како на препораки за утврдување приоритети во наредниот период и како на важен показател за нашиот напредок. Во делот на функционирањето на демократските институции, Европската комисија посочува дека е потребно да има конструктивен и инклузивен политички дијалог во Собранието, особено за реформите поврзани со Европската Унија. Комисијата, како и секогаш, и овој пат дава објективен пресек на состојбите и напредокот во реформите и ги идентификува областите во кои треба да ги зголемиме напорите и да испорачаме повеќе резултати.
Во оваа насока Маричиќ потенцира дека оценката на Европската комисија за вкупната подготвеност на земјата за 2023 година е „добро ниво на подготвеност“. Таа е солидна константа веќе неколку години, нема уназадување во ниту едно поглавје во споредба со другите земји во регионот, од кои некои многу порано ги почнаа преговорите, а Северна Македонија бележи напредок.
Шпанското претседателство со Советот на ЕУ го достави писмото со кое ја повикува Република Северна Македонија да ги достави патоказите, кои се наша обврска, а што произлегува од преговарачката рамка за пристапување на Република Северна Македонија во членство во Европската Унија усвоена на 19 јули 2022 година. Со цел нивна подготовка, на начин наведен во самото писмо, преку суштински консултации и преку инклузивен процес, ќе предложиме одржување на заедничката седница на Националниот совет за евроинтеграции и Комисијата за европски прашања при Собранието на Република Северна Македонија за разгледување нацрт-патоказ за владеење на правото и нацрт-патоказ за реформа на јавната администрација, а паралелно ќе одржиме консултации и со граѓанското општество, стопанските комори, академската заедница.
На крајот од својот говор вицепремиерот Маричиќ истакна дека ние сме веќе пред втората фаза на преговорите, што ја потврдува и констатацијата на Комисијата дека процесот на скринингот се одвива непречено, а земјата и Владата на Северна Македонија покажуваат високо ниво на посветеност и секое одлагање, стопирање и отворање нов процес за утврдување на преговарачката рамка е апсурд и неодговорен политички волунтаризам, особено за едно вакво стратешко прашање од посебен и исклучителен интерес на граѓаните и за иднината на Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.