Култура
Планиравме втор дел од серијата „Опстанок“, со пораснати деца, но Мето си замина, режисерот Грозданоски остана без Осамениот

Во шумски предел, силното невреме го носи сплавот на којшто се децата Босилка, Петре, Анѓа и Стојанче. Далеку од селото и своите најблиски тие го запознаваат Осамениот кој живее со своето куче, изолиран од светот. Тој им помага да се вратат дома, а и тие нему повторно да го пронајде своето место помеѓу луѓето. Вака накусо би се опишала безвременската телевизиска серија „Опстанок“ во режија на Миле Грозданоски со која пораснаа цели генерации. Драмата е снимена во 1990 година, во продукција на МРТВ, и своевремено достигна огромна популарност, а неодамна повторно беше емитувана на јавниот радиодифузен сервис.
Улогата на Осамениот во „Опстанок“ ја толкува еден од најдобрите македонски актери – Мето Јовановски, кој почина денес на 77-годишна возраст.
„Макфакс“ разговараше со режисерот на телевизиската драма, Миле Грозданоски, кој ни раскажа за снимањата, соработката со Јовановски, но и нивните нереализирани планови.

Мето Јовановски во телевизиската серија „Опстанок“
Култната серија била снимана цела година од пролет до пролет, а снимањето воопшто не било лесно, со оглед на тоа што од едната страна се деца-аматери, а од другата врвните македонски актери.
„Мето најмногу време помина во кадар со Петре, Стојанче, Босилка и Анѓа и кучето Волчко. Секој ден на сет со многу трпение и разбирање“,се сеќава Грозданоски.

Мето Јовановски и децата актери во серијата „Опстанок“
Мето Јовановски во крупен план секогаш сакал да му се снима само едната страна од лицето оти таа му била поубава, се шегувале во екипата. Но, на таа страна му била лузната и изваденото око, па Грозданоски вели дека од тој агол бил пострашен.

Мето Јовановски во телевизиската серија „Опстанок“
Има многу досетки од продукцијата, се сеќава режисерот, но тешко му е да зборува многу во овој тажен миг за Мето.
Грозданоски и Јовановски есенва се договарале да снимаат продолжение на „Опстанок“.

Миле Грозданоски – режисер на популарната телевизиска серија „Опстанок“
„Планиравме да снимаме втор дел од серијата, сега веќе со пораснати деца, ако најдевме финансии, се разбира… Но, толку од договорот. Мето замина, се надевам на блажено место. Вечна му слава“, вели Грозданоски за „Макфакс“.
Мето Јовановски зад себе остави бројни театарски, филмски и телевизиски улоги меѓу кои и во „Среќна нова ’49“, „Тетовирање“, „Тајната книга“. Пред 20 дена ја одигра неговата последна театарска претстава во матичниот Драмски театар, насловена „My name is Goran Stefanovski“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.