Македонија
(Видео) Mицкоски: Да се обединиме за 61 пратеник
„Благодарам на големата поддршка, поддршка која што лично мене многу ми значи, но истовремено и обврзува. Затоа што колку е поголема поддршката, толку и очекувањата се поголеми. Бидејќи оваа Влада на ДУИ и СДСМ нема дно кое што не го проби овие шест години“, истакна претседателот на ВМРО-ДПМНЕ, Христијан Мицкоски на средба со граѓаните од Струмица во рамки на активноста „Важно е! Од тебе зависат промените!“.
Мицкоски додаде дека оваа активност која што ја спроведува ВМРО-ДПМНЕ скоро два месеци е определена подготовка за тоа што следи, а тоа се парламентарните и претседателските избори. Со оваа теренска активност, вели Мицкоски, ВМРО-ДПМНЕ сака да разговара со што е можно повеќе сограѓани ширум Македонија од кои што може да се слушне што е тоа што тие очекуваат од следната Влада на ВМРО-ДПМНЕ.
„Изминативе три децении поминале многу политичари, многу раце се стегнале, многу зборови се кажани, но за жал многу малку дела останале запаметени. И за жал денеска главното мислење помеѓу нашите сограѓани е дека сите се исти. Но, ние сакаме да покажеме и да докажеме дека не сме сите исти, и дека оваа генерација политичари во ВМРО-ДПМНЕ се луѓе патриоти, луѓе кои што навистина сакаат да направат нешто за својата татковина, за Македонија, за македонскиот народ, но и на сите граѓани кои што се наши соседи, пријатели, кои што делат иста судбина како што и ние делиме“, рече тој.
Посочи дека е важно оваа активност која што ја води ВМРО-ДПМНЕ два месеци да се спроведе насекаде, да се слушнат граѓаните што е тоа што очекуваат од ВМРО-ДПМНЕ.
„Јасно е од било кога дека ВМРО-ДПМНЕ ја формира следната Влада, тука не треба никој да има дилема. Победата ќе биде голема, и ВМРО-ДПМНЕ ќе ја формира следната Влада. Тука да бидете сигурни“, наглас Мицкоски.
Тој укажа дека тоа што ќе го каже ВМРО-ДПМНЕ, тоа што ќе го вети, тоа ќе се исполни.
„Тоа што ќе го кажеме, ќе биде дефинирано со јасен рок и тоа ќе биде испорачано“, рече претседателот на ВМРО-ДПМНЕ.
„Сакам да најавам нешто што насекаде низ Македонија го зборувам, а тоа се оние 250 милиони евра инвестиција која следната Влада на ВМРО-ДПМНЕ има намера да ја направи во сите општини во Македонија, без разлика дали градоначалникот е од редовите на ВМРО-ДПМНЕ, дали градоначалникот од СДСМ, ДУИ, Алијанса за Албанците, БЕСА, некоја друга политичка партија“, порача Мицкоски.
Тој нагласи дека ВМРО-ДПМНЕ не ги дели општините како што ги дели оваа Влада. И идната Влада на ВМРО-ДПМНЕ планира во еден четиригодишен мандат за потребите на струмичани да инвестира 26 милиони евра.
„Сакам да предупредам на една работа што периодот што следи ќе се случува, на следните избори не постои трета опција, на следните избори постои од една страна ВМРО-ДПМНЕ и Коалицијата која ќе ја предводи ВМРО-ДПМНЕ и од другата страна Али Ахмети, Артан Груби, Бујар Османи, Маричиќ, Зечевиќ и Димитар Ковачевски. Секој оној кој што ви вели дека постои трета опција, секој оној кој што ќе ве гледа во очи и ќе ви ветува се што сакате да слушнете немојте ве молам да заборавате дека тој има таква задача токму од овие 6-мина кои што ви ги споменав Али Ахмети, Артан Груби, Бујар Османи, Маричиќ, Зечевиќ и Димитар Ковачевски. Тие кои што ќе се претставуваат како трет пат имаат единствена цел антивладините гласови да ги разделат, да го поделат македонскиот гласач“, рече Мицкоски.
Тој посочи дека да не дозволи македонскиот гласач да се подели, бидејќи тоа е целта на власта за да ВМРО-ДПМНЕ да не дојде до зацртаните 61 пратеник. А, целта на ВМРО-ДПМНЕ е 61 пратеник во македонскиот Парламент.
„Верувам дека Македонецот кога е најтешко се обединувал. Знам, го чувствувам тоа кога го гледам секој еден човек чија што рака ја стегам овие веќе два месеци ширум Македонија, дека овој пат народот ќе се обедини околу ВМРО-ДПМНЕ. ВМРО-ДПМНЕ е идентитетот македонски“, порача Мицкоски од Струмица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Според Села мал е бројот на ресори што ќе ги добие „Влен“, му одговорија дека е губитник, а иднината на албанскиот народ е сигурна
Алијансата на Албанците преводена од Зијадин Села, влезе во вербална расправија за бројот на ресори со кои ќе раководат Албанците во новата Влада предводена од ВМРО-ДПМНЕ и Влен (Вреди).
На неговите политички опоненти, од кои дел до скоро му беа сопартијци им порача дека во минатото Албанците воделе најмалку 5,6 а на крајот и 8 од 16 министерства, а сега за првпат се случува да имаат четири ресори.
„Уште полошо е што ќе направат законски измени за да бидат 4 од 19, што ќе биде политичко-институционално егзекутирање на Албанците во РСМ. Нема ресор Министерство за интеграции – не постои. Нема ресор Министерство за политики за добро владеење – не постои. Ке има двајца министри без ресор, кои ќе имаат околу 5 вработени, еден возач и еден фотограф“, велат од Алијансата.
По коментарот, следеше реакција на „Влен“. Од коалицијата на Села му порачаа дека се обидува да изгради алиби пред своите зошто ја згрешил страната, и наместо да биде победник останал со губитниците. Од тука велат декќе водат шест министерски ресори, покрај функцијата претседател на Собранието.
Според „Влен“, токму броењето ресори со кои раководат Албанци е концепт кој не донел ништо добро за нивната кауза. Напротив, велат од „Влен“, благодарение на политичката корупција на режимот на ДУИ, чии функционери ги гледаа ресорите како алатки за богатење наместо да бидат сервис на граѓаните, ВМРО-ДПМНЕ на овие избори освои 58 пратеници и преговара од позиција на апсолутен победник во македонскиот политички блок.
„Влен добива исклучително важна политичка одлука во новата Влада и ќе обезбеди сигурна иднина за Албанскиот народ. Ќе го води собранието на РСМ и шест министерски ресори, а има и целосен легитимитет од Албанците. Времето на национални понижувања заради задоволување лични амбиции и суети завршува. Кој разбере сега добро, кој нема да разбере ќе му се појасни на локалните избори, кога ќе излезе на мегдан пред гласачите без злоупотреби на институциите на извршната власт“, велат од коалицијата на опозицијата на албанските политички партии.
Македонија
Бугарските медиуми: Фондација од Бугарија купи две-третини од куќата на писателот Димитар Талев во Прилеп
Две третини од родната куќа на писателот Димитар Талев во Прилеп купила приватна бугарска фондација „Манол Пејков и пријателите“. Ова е направено за речиси 84.000 евра собрани од донаторите. Преостанатата една третина е во сопственост на лице кое нема желба да ја продаде. Ова го соопштија бугарските медиуми БГНЕС и Нова ТВ.
Претходно, на 26 мај беше објавено дека се урнал дел од покривот на куќата на Талев.
Бугарската фондација информира дека сега треба да се изврши итна поправка на покривот, подготовка на план и тим за реконструкција и реставрација со експерти и градежници од Бугарија и Македонија, назначување на лице со трајна посветеност на одржување и стопанисување со куќата, пречекување луѓе и организирање настани во родното место на Димитар Талев во Прилеп, пишува БНР.бг.
Како што се пишуваше, одлука за стекнување на имотот од страна на бугарската држава била почната уште во јуни 2023 година, но само сопственичката на двете-третини од имотот се изјаснила дека сака да го продаде нејзиниот дел, а во 2023 година цената што таа ја побарала е 100.000 евра. Останатата една-третина е на друг сопственик, кој одбива да го продаде својот дел.
Во Бугарија, Талев се смета за еден од класичните бугарски автори од XX век.
Македонија
Од денес и за Македонците уште полесно до работа во Германија
Работниците од земјите кои не се членки на ЕУ од денеска, 1. јуни ќе можат да аплицираат за „карта за шанси“ која им овозможува да дојдат во Германија и да бараат работа до една година.
Од „картата за шанси“ и проширување на Западнобалканско правило ќе профитираат и работниците од Македонија, пишува „Дојче Веле“.
„Картата за шанси“, која беше најавена пред две години, е наменета да ги пополни празнините на германскиот пазар на труд, особено во секторите инженеринг, информатичка технологија (ИТ) и здравство, каде има недостиг од дури 400.000 работници годишно.
„Со ‘картата за шанси’ луѓе со искуство и потенцијал можат побрзо и поедноставно да најдат соодветна работа“, истакна германската сојузна министерка за внатрешни работи Ненси Фезер вчера во Берлин.
„Картата за шанси“ обезбедува привремена виза или работна дозвола, што им овозможува на оние кои ќе ја добијат да работат до 20 часа неделно или да стекнат двенеделно пробно работно искуство. Доколку работниците од земјите кои не се членки на ЕУ сакаат да работат со полно работно време, можат да аплицираат за продолжување на престојот доколку веќе имаат понуда за работа.
За да ја добијат картата, апликантите мора да зборуваат германски или англиски јазик и да имаат доказ за средства или плата доволни за покривање на трошоците за едногодишен престој во Германија.
За добивање на картата, кандидатите се бодуваат. Повеќе за начинот на бодување на ЛИНКОТ.