Македонија
Битиќи и Шукова во Велес: Социјалните станови се повеќе од градба, тие се дом за оние на кои најмногу им треба
Домувањето за многу поединци и семејства може да биде тешко или отежнато достапно и затоа на 29 социјално ранливи семејства од Велес, лица без родители и лица со посебни потреби, им градиме реална можност да добијат свој дом.
Ова го изјави заменикот на претседателот на Владата задолжен за економски прашања, координација на економските ресори и инвестиции, Фатмир Битиќи, кој заедно со Министерката за животна средина и просторно планирање, Каја Шукова го посетија Велес каде извршија обиколка на социјалната зграда која се изгради во овој град, и избршија увид на рехабилитацијата на регионалниот пат Катланово-Велес.
Во неговата изјава за медиумите, вицепремиерот Битиќи рече дека со овие станови, социјално ранливите категории на граѓани и граѓанки ќе постигнат своја независност, стабилност и ќе изградат чувство на припадност на заедницата.
„Затоа денес сме овде во Велес, каде направиме обиколка на оваа пет катна социјална зграда, за да покажеме дека водиме грижа и создаваме можности за оние на кои им е најпотребно. На 29 социјално ранливи граѓани и граѓанки, лица без родители и лица со посебни потреби, како и за оние со ниски плати им градиме реална можност да добијат свој дом, дом за себе, за своите семејства, за своите деца. Изградбата на 29-те стана е завршена, се очекува наскоро и распределбата да биде извршена. Животниот простор во овие ново изградени домови се движи во квадратура од 30,40 и 50 метри квадратни“, изјави Битиќи.
Вицепремиерот Битиќи додаде дека од 2017 година до денес, изградени и во фаза на изградба се 864 социјални станови.
„Владата покажува солидарност и создава можност за исто толкав број на социјално загрозени граѓани и граѓанки насекаде низ државата да дојдат до свој дом. Никој не треба да биде изоставен, на никого не треба да му биде скратено правото на дом, ниту на тие кои имаат потреба во Македонски Брод, ниту на нашите сограѓани во Бутел“, изјави Битиќи.
Вицепремиерот Битиќи во изјавата за медиуми посочи дека Владата има создадено цврста мрежа од социјални станови низ целата држава, во Струмица, Пробиштип, Виница, Свети Николе, Гостивар, а во септември годинава дел од клучевите од социјалните становите ги поделивме на наши сограѓани и сограѓанки во Демир Капија, Гевгелија, додека за Неготино, распределбата на становите е во финална фаза и се очекува конечната листа, а се гради и во Кочани како и во Сарај и Дебар.
„Владата преку изградбата на социјалните станови нуди реално решение на несигурноста во домувањето, стабилно живеалиште за сите оние кои се наоѓаат во економски или социјални потешкотии. Со развојот и реализацијата на овој тип на инфраструктурни проекти градиме инклузивно општество во кое секое лице и покрај економските и социјалните предизвици, ќе може да напредува и да го негува својот живот. Остануваме посветени и неуморни, секој граѓанин и граѓанка, без оглед на својот социо-економски статус да го оствари своето основно човеково право, правото на безбедно и достоинствено домување“, изјави Битиќи.
Министерката за животна средина и просторно планирање, Каја Шукова, во нејзината изјава осврна на рехабилитацијата на регионалниот пат Катланово-Велес.
„Рехабилитацијата на регионалниот пат Катланово-Велес и поврзувањето на Велес со Велешкото Езеро ќе придонесе кон економскиот локален развој, подобри услови за патување и поголем број на туристи. Ова исто така, значи и врзување на два важни сегменти – подобар и безбеден транспорт, но и подобри услови за управување со отпадот. Со обезбедување проток на транспортните возила за отпад, ќе се овозможи функционирањето на регионалните системи и одржливото управање со отпадот“, рече Шукова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Oбединетата македонска дијаспора: Инаугурацијата на Силјановска е историска
Организацијата Обединета Македонска Дијаспора (ОМД), и честита на професорката Гордана Силјановска Давкова за нејзината значајна инаугурација како прва жена претседател на Македонија.
„Претседателката Силјановска Давкова на историската церемонија го реафирмираше уставното име на нашата Македонија, потврдувајќи го основното право на Македонците на самоопределување. ОМД ја поздравува нејзината непоколеблива заложба за зачувување на нашиот национален идентитет и суверенитет, чувство што се повторува во нејзините обемни придонеси, вклучително и основниот труд „За „Договорот од Преспа“ и понатаму“, објавен од ОМД во октомври 2018 година, достапен на нашата веб-страница со кликнување овде.
Во оваа значајна пригода, додека го славиме Денот на мајката, ОМД упатува срдечни честитки не само до претседателката Силјановска Давкова, туку и до сите извонредни мајки ширум светот. Денешниот ден симболизира не само триумф на родовата еднаквост, туку и доказ за силата и издржливоста на жените лидери насекаде.
Историската победа на претседателката Силјановска Давкова означува ново поглавје во патувањето на Македонија, влевајќи надеж и оптимизам за посветла иднина. ОМД со нетрпение очекува да соработува со нејзината администрација за зајакнување на врските меѓу македонската дијаспора и нашата татковина, поттикнувајќи просперитет и напредок за генерациите што доаѓаат.
Додека ја славиме оваа значајна пригода, да ја потврдиме нашата посветеност на единството, напредокот и трајниот дух на македонскиот народ“, се наведува во реакцијата.
Обединета македонска дијаспора (ОМД) е водечка меѓународна невладина организација која се занимава со интересите и потребите на Македонците и македонските заедници ширум светот. ОМД работи на промовирање на кохезивна глобална македонска заедница.
Македонија
Бугарскиот претседател и премиерот: Не прифаќаме изјави од Северна Македонија што се во спротивност со меѓународните договори
Бугарија не прифаќа изјави и однесувања што се во спротивност со договорот за пријателство, добрососедство и соработка од 2017 година, како и со другите меѓународни договори што ги има потпишано Северна Македонија. Бугарија постојано и јасно го кажува својот став дека договорите мора да се реализираат, наведува во својот став бугарскиот претседател, Румен Радев.
„Европската перспектива на Северна Македонија зависи од строгото спроведување на меѓународните договори во кои таа е страна, како и од преговарачката рамка одобрена од Европскиот совет во јули 2022 година, која нема да се ревидира“, нагласува шефот на бугарската држава.
Реагира и премиерот Димитар Главчев.
„По повод церемонијата на инаугурацијата на новиот претседател на Република Северна Македонија, Бугарија не прифаќа изјави и однесување што се во спротивност и со договорот за пријателство, добрососедство и соработка од 2017 година и во принцип со договорите меѓу Европската Унија и Република Северна Македонија“, се наведува во реакцијата, пренесе „БНР.бг“.
Главчев додава и дека Северна Македонија е земја членка на НАТО, од која произлегуваат соодветните обврски и одговорности.
Новоизбраната претседателка Гордана Силјановска-Давкова вчера предизвика остра реакција и предупредувања од Грција и ЕУ кога при полагањето заклетва како шеф на државата изјави дека ќе го почитува Уставот и ќе ја брани независноста на Македонија користејќи го името што го имаше земјата пред договорот од Преспа со Грција во 2018 година, потсетуваат бугарските медуими.
Македонија
МНР повика на внимателност од државните функционери: Со Грција развивме политички дијалог на високо ниво
Министерството за надворешни работи објави дека ја потврдува цврстата определба на земјата кон недвојбено почитување на уставните одредби, како и сите меѓународно преземени обврски, како што е целосното почитување на договорот за стратешко партнерство меѓу Северна Македонија и Грција, познат како договорот од Преспа.
„Изминативе седум години двете соседни земји развија исклучително високо ниво на политички дијалог, кое резултира и со неколкукратно зголемување на економската соработка и изградбата на позитивни врски меѓу луѓето. Овие придобивки резултираа со членството на земјата во НАТО, отворање на преговорите со Европската Унија, како и со надградба на стратешкото партнерство во стратешки дијалог со САД“, велат од МНР.
Повикуваат на внимателност од страна на сите политички фактори, особено на избраните државни функционери.
Од тука додаваат дека задржувањето на евро-атлантскиот курс на земјата претставува основен стратешки интерес и гарант за долгорочната безбедност и стабилност на земјата.
Новоизбраната претседателка Гордана Силјановска-Давкова на вчерашната инаугурација во Собранието положи заклетва за претседател во која го употреби името Македонија, што предизвика реакции во Грција, а грчката амбасадорка демонстративно ја напушти пленарната сала во Собранието. Грчкото МНР излезе со остра реакција коментирајќи дека се прекршува договорот од Преспа. ЕУ повика на почитување на договорите, кои, како што велат, се неопходни за продолжување по патот во Европската Унија. Утрово, реагира и грчкиот премиер Киријакос Мицотакис, кој рече дека нема да прифатат слични лапсузи.